ఏపీలో మరో 7 కరోనా కేసులు.. మొత్తం 26కు చేరిన‌ కేసుల సంఖ్య

ఆంధ్రప్రదేశ్‌లో మంగళవారం కొత్తగా మరో 7 కోవిడ్-19 కేసులు నమోదయ్యాయని, దీనితో రాష్ట్రంలో మొత్తం కేసుల సంఖ్య 26కు చేరిందని ఆరోగ్య శాఖ వెల్లడించింది. తాజాగా నమోదైన కేసుల్లో గుంటూరు జిల్లా నుంచి నాలుగు, తూర్పుగోదావరి నుంచి రెండు, బాపట్ల జిల్లా నుంచి ఒక కేసు నమోదయ్యాయి.

రాష్ట్రంలో నమోదైన కేసులు వేర్వేరు జిల్లాల్లో విడివిడిగా బయటపడ్డాయని, ఎక్కడా క్లస్టర్ తరహాలో కేసులు నమోదు కాలేదని ఆరోగ్య శాఖ తన పత్రికా ప్రకటనలో స్పష్టం చేసింది. జిల్లాల వారీగా పరిశీలిస్తే.. కడప జిల్లాలో అత్యధికంగా 8 కేసులు నమోదు కాగా, గుంటూరులో 6, తూర్పుగోదావరిలో 3, కాకినాడలో 2, బాపట్లలో 2 కేసులు నమోదయ్యాయి. విశాఖపట్నం, ఏలూరు, శ్రీ పొట్టి శ్రీరాములు నెల్లూరు, ఎన్టీఆర్, పార్వతీపురం మన్యం జిల్లాల్లో ఒక్కొక్క కేసు చొప్పున నమోదయ్యాయి.

రాష్ట్రవ్యాప్తంగా ఇప్పటివరకు 145 నమూనాలను పరీక్షించినట్లు అధికారులు తెలిపారు. నమోదు అయిన 26 మంది బాధితులలో 10 మంది ఆసుపత్రుల్లో చికిత్స పొందుతుండగా, 9 మంది హోమ్ ఐసోలేషన్‌లో ఉన్నారు. ఇప్పటివరకు ముగ్గురు రోగులు కోలుకుని ఆసుపత్రుల నుంచి డిశ్చార్జ్ కాగా, నలుగురు మరణించారు. మరణించిన నలుగురూ కోవిడ్ సోకడానికి ముందే తీవ్రమైన ఇతర ఆరోగ్య సమస్యలతో బాధపడుతున్నారని ఆరోగ్య శాఖ వివరించింది.

ప్రపంచ ఆరోగ్య సంస్థ (డబ్ల్యూహెచ్‌ఓ) వివరాల ప్రకారం.. కోవిడ్-19 అనేది SARS-CoV-2 వైరస్ వల్ల వచ్చే అంటువ్యాధి. ఈ వైరస్ సోకిన చాలామంది తీవ్రమైన లక్షణాలు లేకుండానే సాధారణ చికిత్సతో కోలుకుంటారు. అయితే వయోవృద్ధులు, గుండె సంబంధిత వ్యాధులు, మధుమేహం (షుగర్), శ్వాసకోశ సమస్యలు లేదా క్యాన్సర్ వంటి దీర్ఘకాలిక ఆరోగ్య సమస్యలు ఉన్నవారికి ఈ వైరస్ వల్ల తీవ్ర అనారోగ్య సమస్యలు తలెత్తే ప్రమాదం ఎక్కువగా ఉంటుంది. పరిస్థితి అదుపులోనే ఉందని, ప్రజలు ఆందోళన చెందాల్సిన అవసరం లేదని ఆరోగ్య శాఖ పేర్కొంది.