ఏఐ అభివృద్ధి కోసం జాతీయ వార్రూమ్ ఏర్పాటు చేయాలి: సీఎం రేవంత్ రెడ్డి
కృత్రిమ మేధస్సు (ఏఐ) ప్రపంచాన్ని వేగంగా మార్చేస్తున్న నేపథ్యంలో, జాతీయ స్థాయిలో సమగ్ర విధానాలు రూపొందించాల్సిన అవసరాన్ని తెలంగాణ ముఖ్యమంత్రి రేవంత్ రెడ్డి ప్రస్తావించారు. జీఎస్టీ కౌన్సిల్, నీతి ఆయోగ్ తరహాలో దేశవ్యాప్తంగా విధానాలు సమన్వయం చేసే ప్రత్యేక “ఏఐ కౌన్సిల్”ను ఏర్పాటు చేయాలని ఆయన ప్రధానమంత్రిని కోరారు. అంతేకాకుండా, జాతీయ భద్రత, జాతీయ ప్రయోజనాలకు విఘాతం కలగకుండా చట్టపరమైన రక్షణ చర్యలు తీసుకునేందుకు ప్రత్యేక “ఏఐ మంత్రిత్వ శాఖ” అవసరమని సూచించారు.
హైదరాబాద్ కేంద్రంగా ఏఐ వార్రూమ్
న్యూఢిల్లీలోని భారత్ మండపం వేదికగా జరిగిన ఇండియా – ఏఐ ఇంపాక్ట్ సమ్మిట్ 2026లో ముఖ్యమంత్రి కీలకోపన్యాసం చేశారు. భారత ప్రభుత్వం సహకారంతో దేశానికి ఒక “ఏఐ స్టార్టప్ విలేజ్”ను ఏర్పాటు చేయడానికి తెలంగాణ సిద్ధంగా ఉందని ప్రకటించారు. ఏఐలో వస్తున్న శరవేగ మార్పులను పర్యవేక్షించేందుకు కేంద్రం, రాష్ట్రాలు కలిసి పనిచేసే జాతీయ ఏఐ వార్రూమ్ ఏర్పాటు అవసరమని వివరించారు. కేంద్రం అనుమతిస్తే, హైదరాబాద్ కేంద్రంగా వార్రూమ్ను ఏర్పాటు చేయడానికి రాష్ట్రం సిద్ధంగా ఉందని ఆయన తెలిపారు.
ప్రపంచ నాయకులు, సాంకేతిక నిపుణులు తెలంగాణతో భాగస్వామ్యం కావాలని ఆయన ఆహ్వానం పలికారు. సామాజిక న్యాయం సాధనకు, పేదరిక నిర్మూలనకు ఏఐ శక్తివంతమైన సాధనమని ఆయన పేర్కొన్నారు. సాంకేతిక రంగం వేగంగా మారుతున్న నేపథ్యంలో, ఏఐపై సంవత్సరానికి ఒక్కసారి చర్చలు సరిపోవని, దేశంలోని వివిధ నగరాల్లో ఏడాదికి రెండుసార్లు ఏఐ సమ్మిట్లు నిర్వహించాలని ప్రతిపాదించారు.
జీపీయూ చిప్ తయారీ నుంచి గ్రీన్ ఎనర్జీ, డేటా స్టోరేజీ, కోర్ ల్యాంగ్వేజెస్ ఆధారిత సేవల వరకు ఏఐ చైన్ మొత్తం మీద భారత్ నాయకత్వం వహించాల్సిన అవసరం ఉందని ఆయన పేర్కొన్నారు. ఇందుకోసం స్పష్టమైన జాతీయ రోడ్మ్యాప్ అవసరమని అభిప్రాయపడ్డారు. ప్రమాణిక పరిశోధనల కోసం అత్యున్నత ప్రమాణాలతో, తగిన నిధులతో అనేక క్యాంపస్లతో కూడిన ప్రత్యేక ఏఐ యూనివర్సిటీ ఏర్పాటు చేయాలని ఆయన సూచించారు.
స్టార్టప్లకు మద్దతు ఇవ్వడానికి పెద్ద ఎత్తున పెట్టుబడులు పెట్టాలని, భారత యువత ప్రపంచ స్థాయి యూనికార్న్ సంస్థలుగా ఎదగడానికి అవకాశాలు కల్పించాలని అన్నారు. ఏఐ వల్ల ఉద్యోగాలు కోల్పోకుండా, మరిన్ని అవకాశాలు సృష్టించేలా సమగ్ర రీ-స్కిల్లింగ్ వ్యూహాలు అమలు చేయాల్సిన అవసరాన్ని ఆయన వివరించారు. గత యంత్రాలు మానవ శారీరక శక్తిపై ఆధారపడి పనిచేశాయని, అయితే ఆధునిక జీపీయూ చిప్లతో నడిచే ఏఐ వ్యవస్థలు విశ్లేషణ, నిర్ణయాలు, సృజనాత్మకత, స్వతంత్ర చర్యల సామర్థ్యాలను కలిగి ఉన్నాయని పేర్కొన్నారు. రోబోటిక్స్ ఉదాహరణగా ఇది ఒక కీలక మార్పు అని అన్నారు.
భారత్ కేవలం సేవకుడిగా ఉండకూడదు
గూగుల్, మెటా (ఫేస్బుక్, ఇన్స్టాగ్రామ్), ఎక్స్, యూట్యూబ్ వంటి ప్రపంచస్థాయి ప్లాట్ఫామ్లు భారతదేశంలో సృష్టించబడలేదని ముఖ్యమంత్రి ఆవేదన వ్యక్తం చేశారు. భారతదేశం కేవలం సేవలు అందించే దేశంగానే మిగిలిపోయిందని, ఇకపై ప్రపంచ స్థాయి ప్లాట్ఫామ్ల సృష్టికర్తగా ఎదగాలని ఆయన ఆకాంక్షించారు. భారత్ ఏఐ విప్లవాన్ని కోల్పోవద్దని పునరుద్ఘాటించిన ఆయన, దృఢమైన విధానాలు, బలమైన సంస్థలు, వ్యూహాత్మక పెట్టుబడులతో దేశం కృత్రిమ మేధస్సు రంగంలో ప్రపంచ నాయకుడిగా అవతరించగలదని విశ్వాసం వ్యక్తం చేశారు.