ఏఎఫ్సీ మహిళల ఆసియా కప్ నుంచి భారత్ నిష్క్రమణ
ఏఎఫ్సీ మహిళల ఆసియా కప్ ఫుట్బాల్ టోర్నీలో భారత జట్టు ప్రస్థానం నిరాశాజనకంగా ముగిసింది. మంగళవారం ఆస్ట్రేలియాలోని వెస్టర్న్ సిడ్నీ స్టేడియంలో జరిగిన గ్రూప్-సి ఆఖరి మ్యాచ్లో భారత్ 1-3 గోల్స్ తేడాతో చైనీస్ తైపీ చేతిలో ఓటమి పాలైంది. వరుసగా మూడు మ్యాచ్ల్లోనూ పరాజయం చెందడంతో ఒక్క పాయింట్ కూడా సాధించకుండానే భారత్ టోర్నీ నుంచి నిష్క్రమించింది. భారత తరఫున మనీషా కల్యాణ్ (39వ నిమిషం) ఏకైక గోల్ సాధించగా.. చైనీస్ తైపీ జట్టులో సు యు-హువాన్ (12’), చెన్ యు-చిన్ (77’) గోల్స్ చేశారు. భారత గోల్ కీపర్ పాంతోయ్ చాను (45+8’) చేసిన సెల్ఫ్ గోల్ ప్రత్యర్థి స్కోరును మరింత పెంచింది.
ఆరంభం నుంచే ఉత్కంఠ.. చేజారిన అవకాశం
తప్పక గెలవాల్సిన మ్యాచ్లో ప్రపంచ 67వ ర్యాంకర్ భారత్.. 40వ ర్యాంకర్ చైనీస్ తైపీపై దూకుడుగా ఆటను ఆరంభించింది. అయితే మ్యాచ్ మొదలైన 12వ నిమిషంలోనే డిఫెన్స్ వైఫల్యం వల్ల తైపీకి తొలి గోల్ లభించింది. వెనుకబడినప్పటికీ భారత క్రీడాకారిణులు పట్టువదలకుండా పోరాడారు. ఈ క్రమంలో మనీషా కల్యాణ్ కొట్టిన ఒక అద్భుతమైన షాట్ తృటిలో గోల్ మిస్ అయ్యి క్రాస్ బార్కు తగిలింది. ఆ తర్వాత 39వ నిమిషంలో మనీషా వేసిన ఫ్రీ-కిక్ నేరుగా నెట్లోకి దూసుకెళ్లడంతో భారత్ 1-1తో స్కోరును సమం చేసింది.
సెల్ఫ్ గోల్తో దెబ్బ
తొలి సగం ముగిసేలోపు స్కోరు సమంగా ఉంటుందని భావించిన తరుణంలో భారత్కు దురదృష్టం ఎదురైంది. అదనపు సమయంలో ప్యారీ క్సాక్సా చేతికి బంతి తగలడంతో తైపీకి పెనాల్టీ లభించింది. హ్సు యీ-యున్ కొట్టిన పెనాల్టీ షాట్ పోస్ట్కు తగిలి వెనక్కి వచ్చి, గోల్ కీపర్ చాను వీపునకు తగిలి గోల్ లైన్ దాటింది. దీంతో తొలి సగం ముగిసేసరికి తైపీ 2-1 ఆధిక్యంలోకి వెళ్లింది. రెండో సగంలోనూ భారత్ గోల్ కోసం తీవ్రంగా శ్రమించినప్పటికీ, 77వ నిమిషంలో తైపీ క్రీడాకారిణి చెన్ యు-చిన్ మరో గోల్ చేయడంతో భారత్ ఓటమి ఖాయమైంది.
23 ఏళ్ల తర్వాత అడుగు పెట్టినా..
2003 తర్వాత భారత్ తొలిసారిగా ఈ ప్రతిష్టాత్మక టోర్నీకి అర్హత సాధించింది. గ్రూప్ దశలో వియత్నాంతో జరిగిన తొలి మ్యాచ్లో 1-2తో వీరోచితంగా పోరాడిన భారత జట్టు, రెండో మ్యాచ్లో పటిష్టమైన జపాన్ చేతిలో 0-11తో చిత్తయింది. గ్రూప్-సిలో జపాన్ అగ్రస్థానంలో నిలిచింది. ఈ టోర్నీలో సెమీఫైనల్కు చేరిన జట్లు నేరుగా బ్రెజిల్లో జరిగే 2027 ఫిఫా మహిళల ప్రపంచకప్నకు అర్హత సాధిస్తాయి. భారత్ లీగ్ దశలోనే నిష్క్రమించడంతో ప్రపంచకప్ కల కూడా చెదిరిపోయింది.