ఎన్ఐఏ స్పెషల్ పబ్లిక్ ప్రాసిక్యూటర్గా శ్రీమన్నారాయణ నియామకం
తెలుగు రాష్ట్రాల్లో జాతీయ దర్యాప్తు సంస్థ (ఎన్ఐఏ) విచారిస్తున్న కీలక కేసులను సమర్థంగా నిర్వహించేందుకు కేంద్ర హోం వ్యవహారాల మంత్రిత్వ శాఖ కీలక నిర్ణయం తీసుకుంది. ఎన్ఐఏ స్పెషల్ పబ్లిక్ ప్రాసిక్యూటర్ (ఎస్పిపి)గా కె. శ్రీమన్నారాయణను నియమిస్తూ సోమవారం అధికారిక ఉత్తర్వులు జారీ చేసింది. నేషనల్ ఇన్వెస్టిగేషన్ ఏజెన్సీ చట్టం-2008 తో పాటు భారతీయ నాగరిక సురక్ష సంహిత-2023 నిబంధనల ప్రకారం ఈ నియామకం చేపట్టినట్లు కేంద్రం స్పష్టం చేసింది. ఈ బాధ్యతల్లో ఆయన మూడేళ్ల పాటు కొనసాగనున్నారు.
తెలంగాణ, ఆంధ్రప్రదేశ్ రాష్ట్రాల్లోని ఎన్ఐఏ ప్రత్యేక కోర్టులు, సంబంధిత హైకోర్టుల్లో విచారణకు వచ్చే కేసుల్లో ఇకపై శ్రీమన్నారాయణ దర్యాప్తు సంస్థ తరఫున వాదనలు వినిపించనున్నారు. ఉగ్రవాదం, దేశ భద్రతకు ముప్పు కలిగించే చర్యలు, విదేశీ కుట్రల వంటి అత్యంత సున్నితమైన కేసుల్లో న్యాయపరమైన అంశాలను సమన్వయం చేస్తూ ఆయన కీలక పాత్ర పోషించనున్నారు. ముఖ్యంగా అన్లాఫుల్ యాక్టివిటీస్ ప్రివెన్షన్ యాక్ట్ (యూఏపీఏ) వంటి కఠిన చట్టాల కింద నమోదయ్యే కేసుల్లో సాక్ష్యాధారాల సమర్పణ సాక్షుల విచారణలో అనుభవజ్ఞుడైన ప్రాసిక్యూటర్ అవసరం ఉందని భావించి కేంద్రం ఈ నిర్ణయం తీసుకున్నట్లు సమాచారం.
మరోవైపు కేంద్ర హోం శాఖలోని కౌంటర్ టెర్రరిజం అండ్ కౌంటర్ ర్యాడికలైజేషన్ (సీటీసీఆర్) విభాగం ఈ నియామకంపై స్పందిస్తూ ఎన్ఐఏ విచారణ చేసే కేసుల్లో న్యాయపరమైన వ్యవస్థను మరింత బలోపేతం చేయడమే ప్రభుత్వ లక్ష్యమని పేర్కొంది. కాగా ఇటీవల కాలంలో దేశవ్యాప్తంగా ఉగ్ర నిధుల సమీకరణ (టెర్రర్ ఫండింగ్), ర్యాడికలైజేషన్ నెట్వర్క్లు, సరిహద్దు దాటి జరిగే కుట్రలపై ఎన్ఐఏ దృష్టి సారించింది. ఈ నేపథ్యంలో ప్రాసిక్యూషన్ విభాగం బలంగా ఉంటేనే నిందితులకు త్వరితగతిన శిక్షలు పడే అవకాశం ఉంటుందని అధికారులు వెల్లడించారు.
ఇక శ్రీమన్నారాయణ నియామకం ద్వారా దక్షిణ భారత ప్రాంతంలో, ముఖ్యంగా తెలుగు రాష్ట్రాల్లో ఎన్ఐఏ కేసుల విచారణకు మరింత వేగం చేకూరనుందని భద్రతా వర్గాలు భావిస్తున్నాయి. దర్యాప్తు సంస్థలు సేకరించిన శాస్త్రీయ సాక్ష్యాలను కోర్టుల ముందు పకడ్బందీగా ఉంచడం ద్వారా విచారణలో జాప్యాన్ని నివారించవచ్చు. ఈ నిర్ణయంతో అటు దర్యాప్తు సంస్థలకు, ఇటు న్యాయవ్యవస్థకు మధ్య సమన్వయం మెరుగుపడి, దేశ వ్యతిరేక శక్తులపై సాగుతున్న పోరులో కీలక పురోగతి లభిస్తుందని విశ్లేషకులు అభిప్రాయపడుతున్నారు.