ఎంఐఎంను చూసి భయపడొద్దు

సెప్టెంబర్ 17, ఈ తేదీ తెలంగాణ చరిత్రలో ఒక మైలురాయి. 1948లో హైదరాబాద్ రాజ్యాన్ని భారత యూనియన్లో విలీనం చేసిన ఈ ప్రాంతాన్ని విలీనం చేసిన రోజు. దీనిని కొందరు 'విమోచన దినోత్సవం' అంటారు, మరికొందరు 'సమైక్యతా దినం' లేదా 'ప్రజా పాలన దినం' అని పిలుస్తారు. మహారాష్ట్ర, కర్ణాటక ప్రభుత్వాలు దీనిని అధికారికంగా నిర్వహిస్తున్నాయి. కానీ తెలంగాణలో ఈ దినోత్సవం రాజకీయ వివాదాలకు కేంద్రబిందువుగా మారింది. తాజాగా ఈ అంశంపై కేంద్ర మంత్రి జీ కిషన్ రెడ్డి కిషన్ రెడ్డి మాట్లాడుతూ.. ‘ఇప్పటికైనా మించిపోయింది ఏమీ లేదు.. సెప్టెంబర్ 17న విమోచన దినోత్సవాన్ని అధికారికంగా నిర్వహించాలి’ అని డిమాండ్ చేశారు.

గత బీఆర్ఎస్ ప్రభుత్వం ఎంఐఎంకు భయపడి విమోచన దినోత్సవాన్ని నిర్వహించలేదని విమర్శించారు. ఇదే విషయంపై తాజాగా బీజేపీ రాష్ట్ర అధ్యక్షుడు ఎన్. రామచందర్ రావు కూడా అధికారంలోకి వచ్చిన తర్వాత విమోచన దినోత్సవాన్ని ఘనంగా జరుపుతామని ప్రకటించారు. మరి, అధికారంలో ఉన్న కాంగ్రెస్ ప్రభుత్వం ఈ విషయంలో ఎలా వ్యవహరిస్తుంది? దాని వ్యూహం ఏమిటి? అన్నది తేలాల్సి ఉంది.

సెప్టెంబర్ 17, 1948న ఆపరేషన్ పోలో ద్వారా నిజాం పాలన ముగిసి, హైదరాబాద్ రాజ్యం భారత్లో విలీనమైంది. ఈ సంఘటనను బీజేపీ 'విమోచన దినోత్సవం'గా చూస్తూ, నిజాం నిరంకుశ పాలన నుంచి విముక్తి అని వర్ణిస్తుంది. కానీ కాంగ్రెస్, బీఆర్ఎస్ వంటి పార్టీలు దీనిని 'సమైక్యతా దినం' పిలుస్తూ, హిందూ-ముస్లిం సమైక్యతను ప్రోత్సహించాలని వాదిస్తాయి. గతంలో బీఆర్ఎస్ ప్రభుత్వం 'నేషనల్ ఇంటిగ్రేషన్ డే'గా జరిపేది. ప్రస్తుత కాంగ్రెస్ ప్రభుత్వం మాత్రం 'ప్రజా పాలన దినం'గా మార్చి, పబ్లిక్ గార్డెన్స్లో నిర్వహిస్తోంది. బీజేపీ మాత్రం కాంగ్రెస్ ప్రభుత్వంపై విమర్శలు గుప్పిస్తోంది. ప్రజలకు చరిత్ర తెలియకుండా కుట్ర చేస్తున్నారని మండిపడుతోంది.

ఎమ్ఐఎమ్ భయమా? ఓటు బ్యాంక్ రాజకీయాలా?

కేంద్ర ప్రభుత్వం సికింద్రాబాద్ పరేడ్ గ్రౌండ్స్లో విమోచన దినోత్సవాన్ని ఘనంగా నిర్వహిస్తోంది. రక్షణ మంత్రి రాజ్నాథ్ సింగ్ ముఖ్య అతిథి. కేంద్ర మంత్రులు కిషన్ రెడ్డి, గజేంద్ర సింగ్ షెకావత్, బండి సంజయ్, మహారాష్ట్ర మంత్రులు హాజరవుతున్నారు. అటల్ బిహారీ వాజ్పేయి విగ్రహావిష్కరణ, స్వాతంత్ర్య సమర యోధుల సన్మానం, ఫొటో ఎగ్జిబిషన్ లాంటి కార్యక్రమాలు ఉన్నాయి.

బీజేపీ నేతలు కిషన్ రెడ్డి, రామచందర్ రావు మాట్లాడుతూ.. "గత బీఆర్ఎస్ ప్రభుత్వం ఎమ్ఐఎమ్కు భయపడి నిర్వహించలేదు. కాంగ్రెస్ అధికారంలోకి వచ్చి రెండేళ్లు అయినా అదే బాట" అని విమర్శిస్తున్నారు. ఎమ్ఐఎమ్ భయంతో కాంగ్రెస్, బీఆర్ఎస్ చరిత్రను మరుగున పరేస్తున్నాయని వారు విమర్శించారు. బీజేపీ సోషల్ మీడియాలో #HyderabadLiberationDay హ్యాష్ట్యాగ్తో ప్రచారం చేస్తూ, అమరవీరుల త్యాగాలను గుర్తుచేస్తోంది.

హిందూ-ముస్లిం ఘర్షణల నివారణా?

ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం సెప్టెంబర్ 17ను 'ప్రజా పాలన దినం'గా జరుపుతోంది. రేవంత్ రెడ్డి "ఈ రోజును పార్టీ లేదా వ్యక్తిగత ఆకాంక్షల కోసం కాకుండా ప్రజల సంక్షేమం కోసం జరుపుతున్నాం" అని వివరించారు. కాంగ్రెస్ వాదన ప్రకారం, 'విమోచన దినం' అనే పేరు హిందూ-ముస్లిం మధ్య ఘర్షణలను రెచ్చగొట్టవచ్చు. ఈ వ్యూహం వెనుక ఎమ్ఐఎమ్ మద్దతు, ముస్లిం ఓటు బ్యాంక్ ను కాపాడుకోవడం వంటి అంశాలు ఉన్నాయని బీజేపీ ఆరోపిస్తోంది. అయితే, కాంగ్రెస్ దీనిని సమైక్యతా సందేశంగా చూస్తోంది. రేవంత్ రెడ్డి మాత్రం బీజేపీ తెలంగాణ రాష్ట్రంలో మతపరమైన విభజన తీసుకొచ్చి ఓ వర్గాన్ని రెచ్చగొట్టేందుకు ప్రయత్నిస్తున్నారని విమర్శించారు.

ఓటు బ్యాంక్ వర్సెస్ చరిత్ర

సెప్టెంబర్ 17ను అన్ని పార్టీలు తమ రాజకీయం కోసం వాడుకుంటున్నట్టు కనిపిస్తోంది. బీజేపీ హిందుత్వ ఎజెండాతో 'విమోచనం'ను ప్రమోట్ చేస్తూ, హిందూ ఓట్లను ఆకర్షిస్తోంది. కాంగ్రెస్ మాత్రం మైనార్టీ అప్పీజ్మెంట్తో సమైక్యతా సందేశం ఇస్తోంది. ఇది తెలంగాణలో ముస్లిం ఓటు బ్యాంక్ (సుమారు 12%)ను కాపాడుకోవడానికి ఉపయోగపడుతుందని విశ్లేషకులు భావిస్తున్నారు. అయితే, ఇది చరిత్రను రాజకీయీకరణ చేస్తుందనే విమర్శలు ఉన్నాయి.

బీజేపీ ఈ విషయాన్ని ఉపయోగించి కాంగ్రెస్ను 'సెక్యులర్ అప్పీజ్మెంట్'గా ముద్ర వేస్తోంది. మరోవైపు, కాంగ్రెస్ బీజేపీని 'కమ్యూనల్ పాలిటిక్స్'గా విమర్శిస్తోంది. లోక్సభ ఎన్నికల తర్వాత, ఇది రాష్ట్ర రాజకీయాల్లో మార్పులు తీసుకురావచ్చు. కాంగ్రెస్ ప్రభుత్వం 'విమోచన దినోత్సవం'గా అధికారికంగా నిర్వహించే అవకాశం లేదు. బదులుగా 'ప్రజా పాలన దినం'తో సరిపెట్టుకుని, సమైక్యతా సందేశం ఇవ్వడమే వ్యూహం. ఇది ఎంఐఎం మద్దతును తీసుకొని.. హిందూ-ముస్లిం ఘర్షణలను నివారించాలనే లక్ష్యంతో ఉంది.

అయితే, బీజేపీ దీనిని రాజకీయ ఆయుధంగా మార్చి, తెలంగాణ స్వాభిమానాన్ని రెచ్చగొట్టవచ్చు. చివరికి, ఈ దినోత్సవం చరిత్రకు సంబంధించినది కాకుండా, రాజకీయ లాభాలకు ముడిపడి ఉంది. భవిష్యత్తులో ఎన్నికలు దగ్గర పడుతున్నకొద్దీ ఈ వివాదం మరింత ఉధృతమవుతుందేమో!