ఉపేంద్ర ‘నెక్స్ట్ లెవల్’.. ముహూర్తంతో మొదలైన కొత్త ప్రయాణం
కన్నడ స్టార్ హీరో ఉపేంద్ర తదుపరి చిత్రం ‘నెక్స్ట్ లెవల్’ అధికారికంగా ప్రారంభమైంది. కన్నడ, తెలుగు భాషల్లో ద్విభాషా చిత్రంగా తెరకెక్కనున్న ఈ సినిమాకు బెంగళూరులో బుధవారం సంప్రదాయబద్ధంగా ముహూర్త కార్యక్రమం నిర్వహించారు. అర్వింద్ కౌశిక్ దర్శకత్వం వహిస్తున్న ఈ చిత్రాన్ని తరుణ్ శివప్ప.. తరుణ్ స్టూడియోస్ బ్యానర్పై భారీ స్థాయిలో నిర్మిస్తున్నారు.
ఈ సినిమాలో ఉపేంద్ర సరసన ఆరాధన రామ్ కథానాయికగా నటించనున్నారు. అలాగే నటుడు నిరంజన్ సుధీంద్ర కీలక పాత్రలో కనిపించనున్నారు. ఉపేంద్ర కుమారుడు ఆయుష్ ఉపేంద్ర ముహూర్త కార్యక్రమంలో పాల్గొని తొలి షాట్కు క్లాప్ కొట్టారు. ఈ కార్యక్రమానికి ప్రియాంక ఉపేంద్ర, సీనియర్ నటి మాళాశ్రీతో పాటు కన్నడ చిత్ర పరిశ్రమకు చెందిన పలువురు ప్రముఖులు హాజరయ్యారు.
‘కాటేరా’ చిత్రంతో కథానాయికగా పరిచయమైన ఆరాధన రామ్కు ఇది రెండో సినిమా. ‘కాటేరా’లో గ్రామీణ యువతిగా కనిపించిన ఆమె.. ‘నెక్స్ట్ లెవల్’లో పూర్తి భిన్నమైన పాత్రలో కనిపించనున్నారు. ముఖ్యమంత్రి కుమార్తెగా ఆమె పాత్ర సాగనుందని చిత్రబృందం వెల్లడించింది. గ్లామర్తో పాటు బోల్డ్గా ఉండే ఈ పాత్ర ఆరాధన కెరీర్లో కొత్త కోణాన్ని ఆవిష్కరించనుందని పేర్కొంది.
మరోవైపు ఉపేంద్ర, ఆయన మేనల్లుడు నిరంజన్ సుధీంద్ర తొలిసారి కలిసి తెరపై కనిపించనున్నారు. దీంతో ఈ కాంబినేషన్పై ప్రేక్షకుల్లో ఆసక్తి నెలకొంది. గతంలో ‘విక్టరీ 2’, ‘చూ మంతర్’ వంటి కమర్షియల్ చిత్రాలను నిర్మించిన తరుణ్ శివప్ప ‘నెక్స్ట్ లెవల్’ను కూడా భారీ నిర్మాణ విలువలతో రూపొందిస్తున్నారు. ఉపేంద్రను మరోసారి ఆయనకు ప్రత్యేకమైన అన్కన్వెన్షనల్ శైలిలో చూపించనున్నట్లు వెల్లడించారు. మిగిలిన నటీనటులు, సాంకేతిక బృందం వివరాలను త్వరలో ప్రకటించనున్నారు.
ఇదిలా ఉండగా, ఉపేంద్ర ఇప్పటికే నాగన్న దర్శకత్వంలో తెరకెక్కిన ‘భార్గవ’ చిత్రీకరణను పూర్తి చేశారు. సూరప్ప బాబు నిర్మించిన ఈ సినిమాలో అంకిత అమర్ కథానాయికగా నటించారు. ఇంకా ఓ ఫైట్ సీన్, రెండు పాటల చిత్రీకరణ మాత్రమే మిగిలి ఉన్నట్లు సమాచారం.