ఉద్యోగాల పేరుతో మోసం.. మయన్మార్ చెర నుంచి బయటపడ్డ 27 మంది భారతీయులు
విదేశాల్లో భారీ జీతాలతో ఉద్యోగాలంటూ ఆశపడి మయన్మార్ వెళ్లి, అక్కడ సైబర్ నేరగాళ్ల చెరలో చిక్కుకున్న 27 మంది భారతీయులు ఎట్టకేలకు క్షేమంగా స్వదేశానికి చేరుకున్నారు. శనివారం వీరంతా ఢిల్లీ విమానాశ్రయానికి చేరుకోగా, కేంద్ర ప్రభుత్వ అధికారులు వారికి స్వాగతం పలికారు. విమానాశ్రయంలో ఫార్మాలిటీస్ పూర్తి చేసుకున్న అనంతరం, వీరు తమ కుటుంబ సభ్యులను కలిసేందుకు స్వస్థలాలకు పయనమయ్యారు.
ఉద్యోగాల పేరిట ఉచ్చు..
బాధితుల కథనం ప్రకారం.. విదేశాల్లో ఆకర్షణీయమైన సాఫ్ట్వేర్ ఉద్యోగాలు, భారీ జీతాలంటూ ఆశచూపిన ఏజెంట్లు.. అమాయక భారతీయ యువతను మాయమాటలతో మయన్మార్ సరిహద్దులకు తరలించారు. తీరా అక్కడికి వెళ్లాక అసలు స్వరూపం బయటపడింది. సాఫ్ట్వేర్ కొలువులకు బదులుగా, అక్కడ అక్రమంగా నిర్వహిస్తున్న 'సైబర్ స్కామ్ సెంటర్లలో' ఆన్లైన్ మోసాలకు పాల్పడాలని బాధితులపై ఒత్తిడి తెచ్చారు. పక్కా పథకం ప్రకారం మానవ అక్రమ రవాణా (ట్రాఫికింగ్) ద్వారా వీరిని సరిహద్దులు దాటించి, బయటి ప్రపంచంతో సంబంధం లేకుండా అక్రమ ముఠాల గుప్పిట్లో ఉంచారు.
ఈ కేంద్రాలలో బాధితులు అనుభవించిన నరకం వర్ణనాతీతం. రోజుకు 15 నుంచి 18 గంటల పాటు విరామం లేకుండా సైబర్ నేరాలు చేయాలని వేధించేవారు. వారి ఆదేశాలను ధిక్కరించినా లేదా పని సరిగ్గా చేయలేకపోయినా తీవ్రమైన శారీరక వేధింపులకు గురిచేసేవారు. తిండి పెట్టకుండా గదుల్లో బంధించడం, దారుణంగా కొట్టడం వంటి అమానుష చర్యలతో వారిని భయభ్రాంతులకు గురిచేశారు. ఇన్ని చిత్రహింసల మధ్య ప్రాణాలను అరచేతిలో పెట్టుకుని గడిపిన వీరికి ఎట్టకేలకు స్వదేశీ దౌత్య కార్యాలయాల చొరవతో విముక్తి లభించింది.
విముక్తి లభించిందిలా..
మయన్మార్లో చిక్కుకున్న బాధితులను కాపాడటంలో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు కీలక పాత్ర పోషించారు. బాధితుల కుటుంబాల నుంచి అభ్యర్థనలు రావడంతో ఆయన వెంటనే స్పందించి, విదేశాంగ మంత్రి ఎస్. జైశంకర్కు లేఖ రాశారు. దౌత్యపరమైన చర్యలు చేపట్టి వారిని త్వరగా స్వదేశానికి తీసుకురావాలని కోరారు. రామ్మోహన్ నాయుడు చొరవతో అప్రమత్తమైన విదేశాంగ శాఖ, యాంగూన్లోని భారత రాయబార కార్యాలయం ద్వారా స్థానిక అధికారులతో నిరంతరం సంప్రదింపులు జరిపి, 27 మంది భారతీయులు సురక్షితంగా విడుదలయ్యేలా కృషి చేసింది.
బాధితుల వివరాలు
మయన్మార్ నుంచి రక్షించబడిన వారిలో రాము గున్నుగుకెల్లి, సాయి కుమార్ కనకవల, అజయ్ డుబ్బా, జగదీష్ సాహు, బ్రహ్మాజీ అలుగోలు, భువనేష్ గండబోయిన, దినేష్ గండబోయిన, ధనుంజయ రావు గువ్వాల, చిను దీపక్ మొరడబుడి, శ్రీహర్ష అల్లు, జయకృష్ణ చటాల, జి. రామకృష్ణ, ఎస్.ఏ. నజ్మా బేగం, అరుణేంద్ర మాథి, మస్తాన్ గగ్గుతురి, జెస్వంత్ కుమార్ రెడ్డి, చైతన్య కుమార్ రెడ్డి బండి, జాయ్ విగ్నన్ సలగాల, విజయ్ కుమార్ ఇసుకపాటి, సాయి నికేష్ దేవర, రమేష్ పల్లెబోన, రాకేష్ మాంటి, తేజస్వసి తుంగా, శ్రీ మురళి, బి. చిన్న మల్లయ్య, ఎం. సుమ లక్ష్మి, జె. శేఖర్ బాబు ఉన్నారు. బాధితుల్లో అత్యధికులు ఆంధ్రప్రదేశ్, తెలంగాణ రాష్ట్రాలకు చెందిన వారే కావడం గమనార్హం.
ప్రజలకు హెచ్చరిక
విదేశాల్లో ఉద్యోగాల పేరుతో వస్తున్న ఆకర్షణీయ ఆఫర్ల పట్ల అప్రమత్తంగా ఉండాలని అధికారులు హెచ్చరించారు. అధికారిక మార్గాలు, ధృవీకరించిన నియామక సంస్థల ద్వారానే విదేశీ ఉద్యోగాలను ఆశ్రయించాలని సూచించారు. తప్పుడు హామీలను నమ్మి మోసపోవద్దని ప్రజలకు విజ్ఞప్తి చేశారు.