ఉగ్ర జాబితాలోకి ఇరాన్ రివల్యూషనరీ గార్డ్.. ఈయూ సంచలన నిర్ణయం
ఇరాన్ దేశపు అత్యంత శక్తివంతమైన సైనిక దళం 'ఇస్లామిక్ రివల్యూషనరీ గార్డ్ కార్ప్స్' (ఐఆర్జీసీ)కు యూరోపియన్ యూనియన్ గట్టి షాక్ ఇచ్చింది. ఈ దళాన్ని ఉగ్రవాద సంస్థల జాబితాలో చేరుస్తూ 27 ఐరోపా దేశాల కూటమి ఏకగ్రీవంగా నిర్ణయం తీసుకుంది. ఇకపై ఐసిస్, అల్ ఖైదా వంటి సంస్థలతో పాటే ఐఆర్జీసీ కూడా ఉగ్రవాద సంస్థగా పరిగణించబడుతుంది.
ఎందుకు ఈ నిర్ణయం?
ఇటీవల ఇరాన్లో ప్రభుత్వానికి వ్యతిరేకంగా సాగిన ప్రజా నిరసనలను ఐఆర్జీసీ దారుణంగా అణిచివేసింది. ఈ క్రమంలో దాదాపు 6,300 మందికి పైగా సామాన్య ప్రజలు ప్రాణాలు కోల్పోయారని నివేదికలు చెబుతున్నాయి. దీనిపై ఈయూ విదేశాంగ విధాన చీఫ్ కజ కల్లాస్ స్పందిస్తూ.. "సొంత ప్రజలనే వేల సంఖ్యలో చంపుకునే ఏ ప్రభుత్వమైనా తన అంతానికి తానే పునాది వేసుకుంటున్నట్లు లెక్క. ఈ దారుణమైన అణిచివేతను ఊరికే వదిలిపెట్టలేం" అని తీవ్రంగా వ్యాఖ్యానించారు.
ఐఆర్జీసీ ఆస్తుల జప్తు, నిధులపై కఠిన ఆంక్షలు!
ఐఆర్జీసీని ఉగ్రవాద సంస్థగా ప్రకటించడం వల్ల ఆ సంస్థ సభ్యులపై చట్టపరమైన చర్యలు తీసుకోవడం ఇకపై మరింత సులభం కానుంది. దీనివల్ల ఐరోపా దేశాల్లో ఉన్న ఆ సంస్థ ఆస్తులను జప్తు చేయడమే కాకుండా, కేవలం అందులో సభ్యుడిగా ఉన్నారనే కారణంతోనే వ్యక్తులపై క్రిమినల్ కేసులు నమోదు చేసే అవకాశం ఉంటుంది. అలాగే ఆ సంస్థకు ఎలాంటి నిధులు అందకుండా కఠినమైన ఆంక్షలు అమలులోకి వస్తాయి. గతంలో ఫ్రాన్స్, ఇటలీ వంటి దేశాలు ఈ నిర్ణయంపై వెనకడుగు వేసినప్పటికీ, ఇరాన్ ప్రభుత్వ తాజా అణిచివేత చర్యల నేపథ్యంలో జర్మనీ నేతృత్వంలో ఐరోపా దేశాలన్నీ ఇప్పుడు ఏకమయ్యాయి.
ఇదొక చారిత్రక తప్పిదం: ఇరాన్
ఐరోపా దేశాల నిర్ణయంపై ఇరాన్ నిప్పులు చెరిగింది. ఇరాన్ విదేశాంగ మంత్రి అబ్బాస్ అరాగ్చి స్పందిస్తూ.. "ఐరోపా దేశాలు పెద్ద వ్యూహాత్మక తప్పు చేశాయి. ఈ నిర్ణయం ప్రాంతీయ ఉద్రిక్తతలను మరింత పెంచుతుంది" అని హెచ్చరించారు. భారత దేశంలోని ఇరాన్ రాయబారి మహమ్మద్ ఫత్హాలీ కూడా స్పందిస్తూ.. ఐఆర్జీసీ అనేది ఇరాన్ అధికారిక సైనిక దళమని, దానిని ఉగ్రవాద సంస్థగా పిలవడం అంతర్జాతీయ చట్టాలకు విరుద్ధమని మండిపడ్డారు. ఐసిస్ను అంతం చేయడంలో ఐఆర్జీసీ పోషించిన పాత్రను ఐరోపా మర్చిపోయిందని ఆయన గుర్తు చేశారు.
ఇజ్రాయెల్ హర్షం
మరోవైపు, ఇజ్రాయెల్ ఈ నిర్ణయాన్ని స్వాగతించింది. "ఇది చారిత్రాత్మకమైన విజయం" అని ఇజ్రాయెల్ విదేశాంగ మంత్రి గిడియాన్ సార్ అభివర్ణించారు. ప్రాంతీయ అస్థిరతకు కారణమవుతున్న ఐఆర్జీసీని కట్టడి చేయడానికి ఇది సరైన మార్గమని ఆయన పేర్కొన్నారు.