ఈజిప్టులో గ్రాండ్ ఈజిప్షియన్ మ్యూజియం ప్రారంభం

ఈజిప్టు రాజధాని కైరో సమీపంలో, గిజా పిరమిడ్‌ల ఛాయలో సుమారు రెండు దశాబ్దాల సుదీర్ఘ నిరీక్షణ తరువాత గ్రాండ్ ఈజిప్షియన్ మ్యూజియం అట్టహాసంగా ప్రారంభమైంది. 1 బిలియన్ డాలర్ల (దాదాపు రూ.8,320 కోట్లు) వ్యయంతో నిర్మించిన ఈ అద్భుత కట్టడం, ప్రపంచంలో ఒకే నాగరికతకు అంకితం చేయబడిన అతిపెద్ద మ్యూజియంగా రికార్డు సృష్టించింది. శనివారం ఈ మ్యూజియం ప్రారంభమైనా, మంగళవారం నుంచి ప్రజల సందర్శనార్థం అందుబాటులోకి తెచ్చారు. ఇది ప్రాచీన ఈజిప్టు సంస్కృతి, చరిత్రకు ఏడు వేల సంవత్సరాల నిలువెత్తు సాక్ష్యంగా నిలవనుంది.

మ్యూజియం చరిత్ర

ఈ భారీ ప్రాజెక్ట్ ఆలోచన 2002లో మొదలైంది. దీని నిర్మాణానికి జపాన్ నుండి ఆర్థిక సహాయంతో సహా సుమారు 1 బిలియన్ డాలర్ల ఖర్చయింది. 1902లో స్థాపించబడిన పాత కైరో మ్యూజియం (తహ్రీర్ స్క్వేర్‌లోనిది) స్థానంలో, ఆధునిక సాంకేతికతతో కూడిన, మరింత ఎక్కువ కళాఖండాలను ప్రదర్శించగలిగే ఒక అంతర్జాతీయ స్థాయి మ్యూజియాన్ని నిర్మించడం దీని ప్రధాన లక్ష్యం. హెనెఘన్ పెంగ్ ఆర్కిటెక్ట్స్ దీనిని రూపొందించారు. ఇది సమీపంలోని పిరమిడ్‌ల ఆకారాన్ని పోలిన త్రిభుజాకార నిర్మాణాన్ని కలిగి ఉంది.

ప్రధాన ఆకర్షణలు

ఈ మ్యూజియం ప్రాచీన ఈజిప్టు రాజుల కాలం నుండి గ్రీకో-రోమన్ యుగం వరకు ఉన్న 1,00,000కు పైగా పురావస్తు కళాఖండాలకు నిలయం. మ్యూజియం ప్రధాన ఆకర్షణ ఫారో టుటాంఖమున్ సమాధి నుండి వెలికితీసిన 5,000కు పైగా వస్తువుల సేకరణ. ఇందులో ప్రసిద్ధ బంగారు ముసుగులు, రత్నాభరణాలు, రథాలు, ఆయుధాలు ఉన్నాయి. అలాగే 3,200 సంవత్సరాల పురాతనమైన, 82 టన్నుల బరువు గల ఫరో రామెసెస్ II విగ్రహం మ్యూజియం ప్రధాన ద్వారం వద్ద సందర్శకులకు స్వాగతం పలుకుతోంది. గ్రేట్ పిరమిడ్‌ను నిర్మించిన ఫారో ఖుఫుకు చెందిన 4,500 ఏళ్ల పురాతన పడవ కూడా ఇక్కడ ప్రధాన ఆకర్షణ. ఇది ప్రపంచంలోనే పురాతనమైన, చెక్కుచెదరని ఓడలలో ఒకటి.

గ్యాలరీలు

ఈ మ్యూజియంలో మొత్తం 12 ప్రధాన ప్రదర్శన గ్యాలరీలు ఉన్నాయి. ఇవి చరిత్ర, సమాజం, మతం, అంత్యక్రియల ఆచారాలు వంటి ప్రాచీన ఈజిప్టు జీవితంలోని వివిధ అంశాలను క్రమబద్ధంగా వివరిస్తాయి. ఆరు అంతస్తుల ఈ మెట్ల మార్గం ఇరువైపులా దేవతల విగ్రహాలు, శవపేటికలు, చారిత్రక శిలాశాసనాలు సహా దాదాపు 60 కళాఖండాలతో అలంకరించబడింది. ప్రదర్శనలో ఆధునిక 3డీ సాంకేతికత, డిజిటల్ ఇంటరాక్టివ్ డిస్ ప్లేలు, లైటింగ్ ఎఫెక్ట్‌లను ఉపయోగించారు. తద్వారా సందర్శకులు చరిత్రను అనుభవించే అవకాశం కలుగుతుంది.

పిరమిడ్లు

గ్రాండ్ ఈజిప్షియన్ మ్యూజియం గిజా పిరమిడ్లకు అత్యంత సమీపంలో ఉంది. ఈ ప్రాంతం ప్రాచీన ప్రపంచ అద్భుతాలలో ఒకటిగా, యునెస్కో ప్రపంచ వారసత్వ ప్రదేశంగా గుర్తింపు పొందింది. పిరమిడ్లను ప్రత్యేకంగా ప్రదర్శించకపోయినా, ఈ మ్యూజియం వాటి చరిత్రను, ఈజిప్టులోని ఫారోల వారసత్వాన్ని మరింత అర్థం చేసుకోవడానికి ఒక గొప్ప వేదికగా ఉపయోగపడుతుంది. ఈ మ్యూజియం ప్రారంభం ద్వారా ఈజిప్టులో పర్యాటక రంగం భారీగా పుంజుకుంటుందని, ఏటా కోటి మందికి పైగా సందర్శకులను ఆకర్షిస్తుందని అంచనా వేస్తున్నారు.

టికెట్ రేట్లు

అరబ్ దేశాల వారికి, ఈజిప్షియన్లకు: పెద్దలకు 350 ఈజిప్షియన్ పౌండ్లు, విద్యార్థులు/ పిల్లలకు 175 ఈజిప్షియన్ పౌండ్లు

అంతర్జాతీయ సందర్శకులకు: పెద్దలకు 1700 ఈజిప్షియన్ పౌండ్లు, విద్యార్థులు/పిల్లలకు 850 ఈజిప్షియన్ పౌండ్లు.