ఇస్రో బాహుబలి రాకెట్ ప్రయోగం విజయవంతం

భారత అంతరిక్ష పరిశోధనా సంస్థ ఇస్రో బుధవారం మరో ఘనత సాధించింది. ఆంధ్రప్రదేశ్‌లోని శ్రీహరికోటలో ఉన్న సతీష్ ధవన్ అంతరిక్ష కేంద్రం నుంచి బుధవారం ఉదయం ఇస్రో అత్యంత శక్తివంతమైన ఎల్‌వీఎం3-ఎం6 (బాహుబలి) రాకెట్‌ను విజయవంతంగా ప్రయోగించింది. ఈ రాకెట్ ద్వారా అమెరికాకు చెందిన ‘బ్లూబర్డ్ బ్లాక్-2’ అనే భారీ కమ్యూనికేషన్ ఉపగ్రహాన్ని అంతరిక్షంలోకి పంపింది. ఈ ఉపగ్రహం బరువు సుమారు 6,100 కిలోలు. భారత గడ్డపై నుంచి ఇప్పటివరకు ప్రయోగించిన అత్యంత భారీ ఉపగ్రహం ఇదే.

ప్రయోగం ఎలా జరిగింది?

మొదట ఈ రాకెట్‌ను ఉదయం 8:54 గంటలకు ప్రయోగించాలని నిర్ణయించారు. అయితే, అంతరిక్షంలో తిరుగుతున్న ఇతర ఉపగ్రహాలు, శకలాలు రాకెట్‌కు అడ్డు తగిలే అవకాశం ఉందని శాస్త్రవేత్తలు గమనించారు. అందుకే ముందు జాగ్రత్తగా ఒక నిమిషంన్నర (90 సెకన్లు) ఆలస్యం చేసి, ఉదయం 8:55:30 గంటలకు రాకెట్‌ను నింగిలోకి పంపారు. 43.5 మీటర్ల ఎత్తున్న ఈ భారీ రాకెట్ నిప్పులు చిమ్ముతూ, గర్జిస్తూ ఆకాశంలోకి దూసుకెళ్లింది. కేవలం 15 నిమిషాల్లోనే ఉపగ్రహం రాకెట్ నుంచి విడిపోయి, భూమికి 520 కిలోమీటర్ల ఎత్తులో ఉన్న కక్ష్యలోకి విజయవంతంగా చేరుకుంది.

ఈ ఉపగ్రహం ఎందుకు ముఖ్యమైనది?

‘బ్లూబర్డ్ బ్లాక్-2’ ఉపగ్రహం మన మొబైల్ వాడకంలో ఒక విప్లవం తీసుకురాబోతోంది. సాధారణంగా మొబైల్ సిగ్నల్స్ కోసం మనకు టవర్లు అవసరం. కానీ ఈ ఉపగ్రహం వల్ల భవిష్యత్తులో మొబైల్ టవర్లు లేని చోట కూడా నేరుగా ఉపగ్రహం (శాటిలైట్) నుండే ఫోన్ సిగ్నల్స్ అందుతాయి. దీనికోసం మనం ఎలాంటి కొత్త పరికరాలు కొనాల్సిన పనిలేదు. మనం ఇప్పుడు వాడుతున్న సాధారణ స్మార్ట్‌ఫోన్‌లకే నేరుగా 4జీ, 5జీ సేవలు అందుతాయి. అడవులు, కొండ ప్రాంతాలు, సముద్రం మధ్యలో లేదా మారుమూల గ్రామాల్లో ఉన్నా సరే.. ఎక్కడి నుండైనా ఫోన్ కాల్స్ మాట్లాడుకోవచ్చు, ఇంటర్నెట్ వాడుకోవచ్చు. అందరికీ, అన్ని చోట్లా, ఎల్లప్పుడూ నెట్‌వర్క్ అందించడమే ఈ ఉపగ్రహ ప్రధాన లక్ష్యం.

భారత్‌కు కలిగే లాభాలు ఏంటి?

ఈ ప్రయోగం కేవలం ఒక పరిశోధన మాత్రమే కాదు, ఇది ఒక పెద్ద వ్యాపార ఒప్పందం కూడా. ఇస్రోకు చెందిన వ్యాపార విభాగం 'న్యూస్పేస్ ఇండియా' ద్వారా అమెరికా కంపెనీ కోసం మన శాస్త్రవేత్తలు ఈ ఉపగ్రహాన్ని ప్రయోగించారు. దీనివల్ల మన దేశానికి భారీగా విదేశీ ఆదాయం లభించింది. అంతేకాకుండా, ప్రపంచ దేశాలన్నీ తమ భారీ ఉపగ్రహాలను పంపాలంటే భారత్ ఒక సురక్షితమైన, నమ్మదగ్గ వేదిక అని మరోసారి నిరూపితమైంది. ఇది మన అంతరిక్ష రంగానికి ప్రపంచస్థాయిలో మరింత గుర్తింపును తెచ్చిపెట్టింది. ఇస్రో తన ప్రయాణంలో ఇప్పటివరకు 34 దేశాలకు చెందిన 434 ఉపగ్రహాలను అంతరిక్షంలోకి పంపి రికార్డు సృష్టించింది.

ఎల్‌వీఎం3 రాకెట్ మూడు దశలతో రూపొందించబడింది. మొదటి దశలో ఘన ఇంధన బూస్టర్లు, రెండో దశలో ద్రవ ఇంజిన్, మూడో దశలో క్రయోజెనిక్ ఇంజిన్ పనిచేస్తాయి. చంద్రయాన్-2, చంద్రయాన్-3 వంటి ప్రతిష్టాత్మక మిషన్లను విజయవంతంగా మోసుకెళ్లిన ఈ రాకెట్, ఇప్పుడు వాణిజ్య రంగంలోనూ తన సత్తా చాటింది.

ఇస్రో చైర్మన్ ఏమన్నారంటే* *?

ప్రయోగం విజయవంతం అయిన తర్వాత ఇస్రో చైర్మన్ డాక్టర్ వి. నారాయణన్ సంతోషం వ్యక్తం చేస్తూ దేశ ప్రజలందరికీ శుభాకాంక్షలు తెలిపారు. "మన బాహుబలి రాకెట్ మరోసారి తన సత్తా చాటింది. అమెరికా ఉపగ్రహాన్ని అత్యంత కచ్చితత్వంతో అనుకున్న చోటికి చేర్చింది. ఈ విజయం భారతదేశానికి ఒక అద్భుతమైన క్రిస్మస్, కొత్త సంవత్సర కానుక. మనం 520 కిలోమీటర్ల ఎత్తులో ఉపగ్రహాన్ని ఉంచాలని లక్ష్యంగా పెట్టుకుంటే, ఈ రాకెట్ దానిని 518.5 కిలోమీటర్ల వద్దే (కేవలం 1.5 కిలోమీటర్ల తేడాతో) ఉంచింది. ఇది ప్రపంచంలోనే అత్యుత్తమ ప్రయోగాల్లో ఒకటి. ఈ విజయం భవిష్యత్తులో భారతీయులను అంతరిక్షంలోకి పంపే 'గగన్‌యాన్' వంటి పెద్ద మిషన్లపై మాకు మరింత నమ్మకాన్ని, ఆత్మవిశ్వాసాన్ని ఇస్తోంది" అని ఆయన గర్వంగా చెప్పారు.

ప్రధాని మోడీ అభినందనలు

ఈ ఘన విజయంపై ప్రధాని నరేంద్ర మోడీ హర్షం వ్యక్తం చేశారు. ఇస్రో శాస్త్రవేత్తలకు శుభాకాంక్షలు తెలియజేస్తూ, భారత అంతరిక్ష రంగంలో ఇది మరో చారిత్రాత్మక మైలురాయి అని పేర్కొన్నారు. “బాహుబలి రాకెట్ ద్వారా అత్యంత భారీ కమ్యూనికేషన్ ఉపగ్రహాన్ని విజయవంతంగా కక్ష్యలోకి చేర్చడం భారత్ సామర్థ్యానికి నిదర్శనం. ఇది ‘ఆత్మనిర్భర్ భారత్’ లక్ష్యాల వైపు మనం వేసిన మరో బలమైన అడుగు” అని ప్రధాని తన సందేశంలో తెలిపారు. ప్రపంచ వాణిజ్య ఉపగ్రహ ప్రయోగాల్లో భారత్ మరింత విశ్వసనీయ భాగస్వామిగా ఎదుగుతోందని ప్రధాని ప్రశంసించారు.

ఆంధ్రప్రదేశ్ గవర్నర్ ఎస్. అబ్దుల్ నజీర్, ముఖ్యమంత్రి నారా చంద్రబాబు నాయుడు ఇస్రో సాధించిన ఈ అద్భుత విజయంపై హర్షం వ్యక్తం చేశారు. గవర్నర్ స్పందిస్తూ.. భారత గడ్డపై నుండి ఇంతటి భారీ ఉపగ్రహాన్ని ప్రయోగించడం దేశ కీర్తిని ప్రపంచానికి చాటిచెప్పిన ఒక గొప్ప మైలురాయి అని కొనియాడారు. ముఖ్యమంత్రి చంద్రబాబు నాయుడు ఇస్రో బృందానికి అభినందనలు తెలుపుతూ.. 'బాహుబలి' రాకెట్ ద్వారా ఈ విజయం సాధించడం వల్ల ప్రపంచ దేశాల దృష్టిలో భారత్ అత్యంత నమ్మదగ్గ భాగస్వామిగా మారిందని, ఇది దేశ యువతకు ఎంతో స్ఫూర్తినిస్తుందని పేర్కొన్నారు.