ఇసుక ఆదాయంపై కాంగ్రెస్ గణాంకాలు పచ్చి అబద్ధం: బీఆర్ఎస్ నేత క్రిషాంక్
రాష్ట్రంలో ఇసుక తవ్వకాల ద్వారా వస్తున్న ఆదాయంపై కాంగ్రెస్ ప్రభుత్వం విడుదల చేస్తున్న గణాంకాలు పూర్తిగా తప్పుదోవ పట్టించే విధంగా ఉన్నాయని బీఆర్ఎస్ అధికార ప్రతినిధి క్రిషాంక్ తీవ్రంగా ఖండించారు. గత బీఆర్ఎస్ ప్రభుత్వ విజయాలను వక్రీకరిస్తూ ప్రజలను మోసం చేయడం సరికాదని ఆయన హితవు పలికారు.
తెలంగాణ రాష్ట్రం ఏర్పడకముందు, అంటే 2014కు ముందు కాంగ్రెస్ ప్రభుత్వ హయాంలో ఇసుక తవ్వకాల ద్వారా వచ్చిన ఆదాయం కేవలం రూ. 39 కోట్లకు పరిమితమైందని ఆయన గుర్తుచేశారు. అయితే, అనంతరం కేసీఆర్ నాయకత్వంలో బీఆర్ఎస్ ప్రభుత్వం చేపట్టిన సంస్కరణల వల్ల ఇసుక ఆదాయం గణనీయంగా పెరిగి, ఒక్క సంవత్సరంలోనే రూ. 886 కోట్లకు చేరుకుందని పేర్కొన్నారు. బీఆర్ఎస్ ప్రభుత్వ కాలంలో ఇసుక ధర టన్నుకు రూ. 645 మాత్రమే ఉండేదని, ప్రస్తుతం కాంగ్రెస్ ప్రభుత్వం సాండ్ బజార్ పేరుతో అదే ధరను టన్నుకు రూ. 1600కు పెంచిందని విమర్శించారు. అంతేకాకుండా, రవాణా ఖర్చులను కూడా ప్రజలపై మోపుతున్నారని అన్నారు. సర్వీస్ ఛార్జీలు కూడా టన్నుకు రూ. 3 నుంచి రూ. 100కు పెంచినప్పటికీ, ఆదాయం మాత్రం పెరగకపోవడం అనుమానాలకు తావిస్తోందని ఆయన తెలిపారు.
ఇంకా, బీఆర్ఎస్ ప్రభుత్వంలో ఉదయం 6 గంటల నుంచి సాయంత్రం 6 గంటల వరకు మాత్రమే ఇసుక తవ్వకాలు అనుమతించగా, ప్రస్తుతం పర్యావరణ నిబంధనలు ఉల్లంఘిస్తూ ఉదయం 6 నుంచి రాత్రి 9 వరకు తవ్వకాలు, 24 గంటల రవాణా జరుగుతున్నప్పటికీ ఆదాయం పెరగకపోవడం సందేహాస్పదమని అన్నారు. ఈ పరిస్థితులు చూస్తే ఇసుక ఆదాయం సాండ్ మాఫియా చేతుల్లోకి వెళ్లిపోతుందనే అనుమానాలు వ్యక్తమవుతున్నాయని ఆయన వ్యాఖ్యానించారు. ప్రస్తుత ముఖ్యమంత్రి కార్యాలయ సీపీఆర్వో గుర్రం మల్సూర్ గతంలో టీఎస్ఎంఢీసీ మేనేజింగ్ డైరెక్టర్గా పనిచేశారని, ఆయనకు వాస్తవ గణాంకాలు బాగా తెలుసని క్రిషాంక్ గుర్తు చేశారు. గత ప్రభుత్వ విజయాలను వక్రీకరించడంపై మల్సూర్ వెంటనే స్పష్టత ఇవ్వాలని డిమాండ్ చేశారు. ఇసుక తవ్వకాలపై పారదర్శకత కోసం పూర్తి వివరాలను ప్రజల ముందు ఉంచాలని, వాస్తవాలను దాచిపెట్టి ప్రభుత్వాన్ని నడపడం సరికాదని బీఆర్ఎస్ తరఫున ఆయన డిమాండ్ చేశారు.