ఇరాన్ పౌరులకు యూఏఈ ‘నో ఎంట్రీ’

పశ్చిమాసియాలో యుద్ధ మేఘాలు కమ్ముకుంటున్న నేపథ్యంలో యునైటెడ్ అరబ్ ఎమిరేట్స్ (యూఏఈ) కీలక నిర్ణయం తీసుకుంది. ఇరాన్ పౌరులు తమ దేశంలోకి ప్రవేశించడంపై, తమ విమానాశ్రయాల ద్వారా ఇతర దేశాలకు వెళ్లడంపై నిషేధం విధించింది. ఎమిరేట్స్, ఫ్లైదుబాయ్ వంటి ప్రముఖ విమానయాన సంస్థలు బుధవారం తమ వెబ్‌సైట్లలో ఈ విషయాన్ని అధికారికంగా ప్రకటించాయి. అయితే యూఏఈ 'గోల్డెన్ వీసా' కలిగిన ఇరానియన్లకు మాత్రం ఈ ఆంక్షల నుంచి మినహాయింపునిచ్చినట్లు ఫ్లైదుబాయ్ స్పష్టం చేసింది.

క్షిపణులు, డ్రోన్లతో విరుచుకుపడ్డ ఇరాన్

యూఏఈ రక్షణ మంత్రిత్వ శాఖ వెల్లడించిన వివరాల ప్రకారం.. ఇరాన్ నుంచి భారీ ఎత్తున దాడులు జరుగుతున్నాయి. గత ఆదివారం ఒక్కరోజే 16 బాలిస్టిక్ క్షిపణులు, 42 డ్రోన్లను యూఏఈ వైమానిక రక్షణ వ్యవస్థలు సమర్థవంతంగా అడ్డుకున్నాయి. ఇరాన్ దురాక్రమణ మొదలైనప్పటి నుండి ఇప్పటివరకు మొత్తం 414 బాలిస్టిక్ క్షిపణులు, 15 క్రూయిజ్ క్షిపణులు, 1,914 డ్రోన్లను కూల్చివేసినట్లు అధికారులు తెలిపారు. ఈ దాడుల్లో ఇద్దరు సైనికులు వీరమరణం పొందగా, ఒక సివిల్ కాంట్రాక్టర్ సహా ఎనిమిది మంది మరణించారు. మరో 178 మంది గాయపడ్డారు. దేశ సార్వభౌమాధికారాన్ని కాపాడుకునేందుకు ఎలాంటి ముప్పునైనా ఎదుర్కొంటామని రక్షణ శాఖ స్పష్టం చేసింది.

పారిశ్రామిక కేంద్రాలే లక్ష్యంగా..

మరోవైపు యూఏఈ, బహ్రెయిన్‌లలోని కీలక పారిశ్రామిక కేంద్రాలపై దాడులు చేసింది తామేనని ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ ప్రకటించింది. యూఏఈలోని 'ఎమిరేట్స్ గ్లోబల్ అల్యూమినియం', బహ్రెయిన్‌లోని 'అల్బా' కర్మాగారాలను క్షిపణులు, డ్రోన్లతో లక్ష్యంగా చేసుకున్నట్లు వెల్లడించింది. ఈ పరిశ్రమలు అమెరికా రక్షణ రంగానికి సహకరిస్తున్నాయని, తమ పారిశ్రామిక మౌలిక సదుపాయాలపై అమెరికా-జియోనిస్ట్ శక్తులు చేసిన దాడులకు నిరసనగానే ఈ చర్యలు చేపట్టినట్లు ఇరాన్ పేర్కొంది.

ఉద్రిక్తతల మధ్య భారతీయుల్లో ఆందోళన

పశ్చిమాసియాలోని రెండు ప్రధాన దేశాల మధ్య యుద్ధం ముదురుతుండటంతో అక్కడ నివసిస్తున్న లక్షలాది మంది వలసదారులు, ముఖ్యంగా భారతీయులు ఆందోళన చెందుతున్నారు. పారిశ్రామిక ప్రాంతాలపై దాడులు జరగడం ఆర్థిక వ్యవస్థలపై కూడా ప్రతికూల ప్రభావం చూపే అవకాశం ఉందని నిపుణులు విశ్లేషిస్తున్నారు. యూఏఈ ప్రభుత్వం దేశ భద్రతను పటిష్టం చేస్తూనే, పరిస్థితిని ఎప్పటికప్పుడు సమీక్షిస్తోంది. ఇరాన్ పౌరులపై నిషేధం విధించడం ఈ ఉద్రిక్తతల్లో తదుపరి పరిణామాలకు సంకేతంగా కనిపిస్తోంది.