ఇరాన్ అణు కార్యక్రమాన్ని పునఃప్రారంభిస్తే మళ్లీ దాడి చేస్తాం.. ట్రంప్ హెచ్చరిక
ఇరాన్ తన అణు కార్యక్రమాన్ని మళ్లీ పునరుద్ధరించే ప్రయత్నాలు చేస్తే సహించబోమని అమెరికా అధ్యక్షుడు డొనాల్డ్ ట్రంప్ హెచ్చరించారు. ఫ్లోరిడాలోని తన నివాసం మార్-ఎ-లాగోలో ఇజ్రాయెల్ ప్రధాని బెంజమిన్ నెతన్యాహును ఆహ్వానించిన సందర్భంగా ట్రంప్ ఈ వ్యాఖ్యలు చేశారు. ఈ భేటీలో ప్రధానంగా ఇరాన్ అణు ఆయుధాల తయారీని అడ్డుకోవడం, గాజాలో యుద్ధాన్ని ఆపి శాంతిని తీసుకురావడం, ఇజ్రాయెల్లో జరుగుతున్న పరిణామాలపై వీరిద్దరూ సుదీర్ఘంగా చర్చలు జరిపారు. ప్రపంచ దేశాల్లో నెలకొన్న ఉద్రిక్తతలను తగ్గించి, శాంతిని ఎలా నెలకొల్పాలనే అంశాలపై ఈ కీలక సమావేశం సాగింది.
ఇరాన్కు ఘాటు హెచ్చరిక
జూన్లో అమెరికా దాడుల్లో ఇరాన్ అణు కేంద్రాలు పూర్తిగా నాశనమైన సంగతి తెలిసిందే. అయితే ఇరాన్ మళ్లీ రహస్యంగా తన అణు సామర్థ్యాన్ని, ఇజ్రాయెల్ను తాకగల భారీ క్షిపణులను తయారు చేసుకుంటోందని ఇజ్రాయెల్ అధికారులు ఆందోళన వ్యక్తం చేస్తున్నారు. దీనిపై ట్రంప్ స్పందిస్తూ, "ఇరాన్ తన అణు కేంద్రాన్ని మళ్లీ నిర్మిస్తోందని వార్తలు వస్తున్నాయి. ఒకవేళ అది నిజమైతే, మేము మరోసారి దాడి చేసి వాటిని పూర్తిగా నాశనం చేస్తాం" అని తీవ్రంగా హెచ్చరించారు. ఇరాన్ ముందే అణు కార్యక్రమాన్ని వదిలేసి ఒప్పందం చేసుకుంటే ఈ పరిస్థితి వచ్చేది కాదని ఆయన వ్యాఖ్యానించారు. ఇరాన్ మాత్రం తాము ప్రస్తుతం అణు బాంబుల తయారీకి అవసరమైన యురేనియంను సిద్ధం చేయడం లేదని చెబుతోంది. అంతేకాకుండా, సమస్యలను చర్చల ద్వారా పరిష్కరించుకోవడానికి సిద్ధంగా ఉన్నామని పశ్చిమ దేశాలకు సంకేతాలు ఇస్తోంది.
గాజాలో రెండో దశ శాంతి ప్రణాళిక
గాజాలో కొనసాగుతున్న కాల్పుల విరమణను తదుపరి దశకు (ఫేజ్-2) తీసుకెళ్లడంపైనా కూడా ఈ భేటీలో చర్చలు జరిగాయి. ఈ దశలో భాగంగా హమాస్ ఆయుధాలను పూర్తిగా వదిలిపెట్టాలని ట్రంప్ స్పష్టం చేశారు. హమాస్ ఆయుధాలు వీడితేనే గాజా పునర్నిర్మాణం సాధ్యమవుతుందని చెప్పారు. అలాగే, ఇప్పటికీ హమాస్ చెరలో ఉన్న 'రాన్ గ్విలీ' అనే ఇజ్రాయెల్ అధికారి మృతదేహాన్ని తిరిగి అప్పగించాలని నెతన్యాహు, రాన్ తల్లిదండ్రులు ట్రంప్ను కోరారు. ఆ మృతదేహం అప్పగించే వరకు తదుపరి శాంతి చర్చలు జరపకూడదని రాన్ కుటుంబం డిమాండ్ చేస్తోంది.
నెతన్యాహుకు క్షమాభిక్ష కోరిన ట్రంప్
ఇజ్రాయెల్ ప్రధాని నెతన్యాహు ప్రస్తుతం ఎదుర్కొంటున్న అవినీతి కేసుల గురించి కూడా ట్రంప్ మాట్లాడారు. నెతన్యాహును ఒక యుద్ధ వీరుడిగా అభివర్ణించిన ట్రంప్, ఆయనకు ఇజ్రాయెల్ అధ్యక్షుడు ఐజాక్ హెర్జోగ్ క్షమాభిక్ష ప్రసాదించాలని కోరారు. నెతన్యాహు వంటి గొప్ప నాయకుడిపై ఇటువంటి కేసులు ఉండకూడదని ట్రంప్ అభిప్రాయపడ్డారు. మొత్తంగా ఈ భేటీ మధ్యప్రాచ్య రాజకీయాల్లో కీలక మలుపుగా మారే అవకాశముందని అంతర్జాతీయ విశ్లేషకులు భావిస్తున్నారు.