ఇరాన్పై మరిన్ని లక్ష్యాలు ఉండొచ్చు: ట్రంప్ హెచ్చరిక
అమెరికా అధ్యక్షుడు డొనాల్డ్ ట్రంప్ ఇరాన్పై జరుగుతున్న యుద్ధ పరిస్థితుల నేపథ్యంలో మరింతమంది ఇరాన్ అధికారులు లక్ష్యాలుగా మారే అవకాశం ఉందని హెచ్చరించారు. శనివారం ఆయన సోషల్ మీడియా వేదిక ట్రూత్ సోషల్లో చేసిన పోస్టులో “ఈ రోజు ఇరాన్పై తీవ్ర దాడులు జరగనున్నాయి” అని పేర్కొన్నారు. ఇరాన్ ప్రవర్తనకు గట్టి ప్రతిస్పందనగా అమెరికా మరింత కఠిన చర్యలు తీసుకునే అవకాశాన్ని ఆయన సూచించారు.
ఇరాన్ అధ్యక్షుడు మసూద్ పెజెష్కియన్ శనివారం పొరుగు దేశాలపై టెహ్రాన్ చేపట్టిన దాడులపై క్షమాపణ చెప్పిన నేపథ్యంలో ట్రంప్ ఈ వ్యాఖ్యలు చేశారు. ప్రాంతీయ ఉద్రిక్తతలు పెరుగుతున్న సమయంలో ఇరాన్ చర్యలు పరిస్థితిని మరింత సంక్లిష్టంగా మారుస్తున్నాయని అమెరికా వర్గాలు భావిస్తున్నాయి. ఈ నేపథ్యంలో అమెరికా తన భద్రతా వ్యూహాలను మరింత కఠినతరం చేసే సూచనలు కనిపిస్తున్నాయి అని అన్నారు.
ఇరాన్ “చెడు ప్రవర్తన” కారణంగా ఇప్పటివరకు దాడుల లక్ష్యంగా పరిగణించని కొన్ని ప్రాంతాలు, వ్యక్తులు కూడా ఇప్పుడు అమెరికా లక్ష్యాల్లోకి రావచ్చని ట్రంప్ తన పోస్టులో హెచ్చరించారు. “ఇరాన్ ప్రవర్తన కారణంగా పూర్తిగా నాశనం అయ్యే పరిస్థితిని ఎదుర్కొనే ప్రాంతాలు, సమూహాలు పరిశీలనలో ఉన్నాయి” అని ఆయన పేర్కొన్నారు. అయితే ఆ ప్రాంతాలు లేదా వ్యక్తుల గురించి ఆయన స్పష్టమైన వివరాలు వెల్లడించలేదు.
ఇదిలా ఉండగా, మధ్యప్రాచ్యంలో పెరుగుతున్న ఉద్రిక్తతల నేపథ్యంలో అమెరికా–ఇరాన్ సంబంధాలు మరింత క్షీణిస్తున్నాయి. ఇరాన్ ఇటీవల చేపట్టిన సైనిక చర్యలు దానికి ప్రతిగా అమెరికా తీసుకుంటున్న చర్యలు ప్రాంతీయ భద్రతపై ప్రభావం చూపుతున్నాయని విశ్లేషకులు చెబుతున్నారు. పరిస్థితులు ఎలా మారుతాయో అనే అంశంపై ప్రపంచవ్యాప్తంగా ఆందోళన వ్యక్తమవుతోంది.