ఇరాన్తో దౌత్య సంబంధాలు కట్.. ఎంబసీని మూసేసిన యూఏఈ
పశ్చిమ ఆసియాలో భద్రతా పరిస్థితులు కనీవినీ ఎరుగని రీతిలో క్షీణిస్తున్నాయి. ఇరాన్ జరిపిన క్షిపణి దాడులను తీవ్రంగా పరిగణించిన యునైటెడ్ అరబ్ ఎమిరేట్స్ (యూఏఈ), ఆ దేశంతో దౌత్య సంబంధాలను తెంచుకుంటూ సంచలన నిర్ణయం తీసుకుంది. టెహ్రాన్లోని తన రాయబార కార్యాలయాన్ని తక్షణమే మూసివేస్తున్నట్లు ప్రకటించడమే కాకుండా, తన రాయబారిని, మొత్తం దౌత్య సిబ్బందిని వెనక్కి పిలిపించింది. ఈ మేరకు యూఏఈ విదేశీ వ్యవహారాల మంత్రిత్వ శాఖ సోమవారం ఒక అధికారిక ప్రకటనను విడుదల చేస్తూ, ఇరాన్ చర్యలు ప్రాంతీయ స్థిరత్వాన్ని దెబ్బతీస్తున్నాయని మండిపడింది.
సార్వభౌమాధికారానికి ‘ప్రత్యక్ష’ ముప్పు
యూఏఈ భూభాగంతో పాటు సోదర దేశమైన ఒమన్ సుల్తానేట్ను లక్ష్యంగా చేసుకుని ఇరాన్ జరిపిన క్షిపణి దాడులను యూఏఈ ‘ఉగ్రవాద చర్యలు’గా అభివర్ణించింది. ఈ దాడులు అంతర్జాతీయ చట్టాలను, ఐక్యరాజ్యసమితి చార్టర్ను బాహాటంగా ఉల్లంఘించడమే కాకుండా, దేశ సార్వభౌమాధికారానికి నేరుగా ముప్పు కలిగిస్తున్నాయని ఆవేదన వ్యక్తం చేసింది. నివాస ప్రాంతాలు, విమానాశ్రయాలు, ఓడరేవులు, ఇతర ప్రజా సదుపాయాల వంటి పౌర స్థావరాలను లక్ష్యంగా చేసుకోవడం ఇరాన్ బాధ్యతారాహిత్యానికి నిదర్శనమని దుయ్యబట్టింది. అమాయక పౌరుల ప్రాణాలను పణంగా పెడుతూ చేస్తున్న ఈ ప్రతీకార చర్యలు తీవ్ర పరిణామాలకు దారితీస్తాయని హెచ్చరించింది.
ఇరాన్ రాయబారికి గట్టి హెచ్చరిక
ప్రస్తుత పరిణామాల నేపథ్యంలో అబుదాబీలోని ఇరాన్ రాయబారి రెజా అమెరికి యూఏఈ ప్రభుత్వం సమన్లు జారీ చేసింది. విదేశీ వ్యవహారాల మంత్రిత్వ శాఖ ఆయనను పిలిపించి, గట్టి హెచ్చరికలతో కూడిన నిరసన పత్రాన్ని అందజేసింది. దాడులకు సంబంధించి ఇరాన్ ప్రభుత్వం ఇచ్చే వివరణలను తాము ఏమాత్రం పరిగణనలోకి తీసుకోబోమని యూఏఈ సహాయ మంత్రి ఖలీఫా షాహీన్ అల్ మరార్ తేల్చిచెప్పారు. పొరుగు దేశాల మధ్య ఉండాల్సిన కనీస ధర్మాలను ఇరాన్ విస్మరించిందని, ఇది రెండు దేశాల మధ్య రాజకీయ, ఆర్థిక, వాణిజ్య సంబంధాలపై తీవ్ర ప్రభావం చూపుతుందని ఆయన హెచ్చరించారు.
శాంతి ప్రయత్నాలకు తూట్లు
తమ భూభాగాన్ని ఇరాన్కు వ్యతిరేక సైనిక చర్యల కోసం ఉపయోగించుకోవడానికి ఎట్టిపరిస్థితుల్లోనూ అనుమతించబోమని యూఏఈ ఇప్పటికే స్పష్టమైన ప్రకటన చేసింది. ఈ నిబద్ధతను విస్మరించి ఇరాన్ దాడులకు దిగడం దారుణమని మంత్రి మరార్ పేర్కొన్నారు. శాంతియుత పరిష్కారాల కోసం యూఏఈ నిరంతరం ప్రయత్నిస్తున్నప్పటికీ, ఇరాన్ తన దూకుడు వైఖరితో ఆ మార్గాలను మూసివేస్తోందని మండిపడ్డారు. అంతర్జాతీయ చట్టాల ప్రకారం తమ రక్షణ కోసం తగిన రీతిలో స్పందించే హక్కు తమకు ఉందని, దాడులను తక్షణమే నిలిపివేయాలని డిమాండ్ చేశారు.
ఖమేనీ మృతితో ముదిరిన సంక్షోభం
పశ్చిమ ఆసియాలో ఈ స్థాయి ఉద్రిక్తతలకు ఫిబ్రవరి 28న జరిగిన ‘ఆపరేషన్ రోరింగ్ లయన్/ఎపిక్ ఫ్యూరీ’ మూలకారణంగా నిలిచింది. ఇజ్రాయెల్, అమెరికా సంయుక్తంగా చేపట్టిన ఈ క్షిపణి దాడిలో ఇరాన్ సుప్రీం లీడర్ అయతుల్లా అలీ ఖమేనీతో పాటు ఆయన కుటుంబ సభ్యులు మరణించినట్లు అమెరికా అధ్యక్షుడు డొనాల్డ్ ట్రంప్, ఇరాన్ మీడియా ధ్రువీకరించాయి. ఈ దాడికి ప్రతీకారంగానే ఇరాన్ ఇప్పుడు అమెరికా మిత్రదేశాలపై దాడులకు తెగబడుతోంది. ఈ పరిణామాలతో పశ్చిమ ఆసియా ప్రస్తుతం అగ్నిగుండంగా మారింది.