ఇరాక్లో కిడ్నాప్నకు గురైన అమెరికా జర్నలిస్టు విడుదల
ఇరాక్లో ఉగ్రవాదుల చెరలో చిక్కుకున్న అమెరికా ఫ్రీలాన్స్ జర్నలిస్ట్ షెల్లీ కిటిల్సన్ ఎట్టకేలకు క్షేమంగా విడుదలయ్యారు. ఈ విషయాన్ని అమెరికా విదేశాంగ మంత్రి (సెక్రటరీ ఆఫ్ స్టేట్) మార్కో రూబియో అధికారికంగా ప్రకటించారు. బాగ్దాద్ సమీపంలో 'కతైబ్ హిజ్బుల్లా' అనే విదేశీ ఉగ్రవాద సంస్థ ఆమెను కిడ్నాప్ చేయగా, అమెరికా ప్రభుత్వం చేపట్టిన దౌత్య, రక్షణ చర్యల వల్ల ఆమెకు విముక్తి లభించింది. ప్రస్తుతం ఆమె ఇరాక్ నుంచి సురక్షితంగా అమెరికా చేరుకోవడానికి అవసరమైన ఏర్పాట్లు చేస్తున్నట్లు రూబియో వెల్లడించారు.
సమిష్టి కృషితోనే విముక్తి
షెల్లీ కిటిల్సన్ విడుదలలో అమెరికా నిఘా సంస్థలు, ఇరాక్ ప్రభుత్వం సమన్వయంతో పనిచేశాయి. ఈ ఆపరేషన్లో ఎఫ్బీఐ, డిపార్ట్మెంట్ ఆఫ్ వార్, ఇరాక్ సుప్రీం జుడీషియల్ కౌన్సిల్తో పాటు పలు ఇతర ఏజెన్సీలు కీలక పాత్ర పోషించాయని రూబియో ప్రశంసించారు. తమ పౌరుల భద్రత కోసం సహకరించిన ఇరాక్ భాగస్వామ్య పక్షాలకు ఆయన ధన్యవాదాలు తెలిపారు. అమెరికన్ల ప్రాణాలకు ముప్పు కలిగిస్తే సహించేది లేదని ఈ సందర్భంగా ఆయన హెచ్చరించారు.
ట్రంప్ ప్రభుత్వ హెచ్చరిక
అమెరికా పౌరులను బందీలుగా పట్టుకోవడం, అక్రమంగా నిర్బంధించడాన్ని అధ్యక్షుడు డొనాల్డ్ ట్రంప్ యంత్రాంగం ఏమాత్రం సహించదని మార్కో రూబియో స్పష్టం చేశారు. ప్రపంచంలో తమ పౌరులు ఎక్కడ ఉన్నా వారి భద్రతకు అత్యున్నత ప్రాధాన్యత ఇస్తామని, బాధ్యులైన వారిని వదిలిపెట్టబోమని తేల్చి చెప్పారు. అమెరికన్లను క్షేమంగా స్వదేశానికి తీసుకురావడానికి అందుబాటులో ఉన్న అన్ని మార్గాలను ఉపయోగిస్తామని ఆయన పునరుద్ఘాటించారు.
హెచ్చరికలను ఖాతరు చేయకుండా..
అల్-మోానిటర్ పత్రికకు కంట్రిబ్యూటర్గా పనిచేస్తున్న షెల్లీ కిటిల్సన్, ఇరాక్లో భద్రతా పరమైన ముప్పులు ఉన్నాయని ముందే తెలిసినా అక్కడ రిపోర్టింగ్ చేస్తున్నట్లు సమాచారం. ఆమె కిడ్నాప్పై దర్యాప్తు జరిపిన స్టేట్ డిపార్ట్మెంట్, గతంలోనే ఆమెకు భద్రతా హెచ్చరికలు జారీ చేసినట్లు గుర్తుచేసింది. ఇరాక్లో ఉద్రిక్త పరిస్థితుల దృష్ట్యా అమెరికా పౌరులెవరూ అక్కడికి వెళ్లవద్దని, ఇప్పటికే అక్కడ ఉన్నవారు వెంటనే ఆ దేశం విడిచి రావాలని 'లెవల్-4' ట్రావెల్ అడ్వైజరీని అమెరికా ప్రభుత్వం మరోసారి జారీ చేసింది.