ఇమ్రాన్ ఖాన్ ఆరోగ్యంగానే ఉన్నారు: అడియాలా జైలు అధికారులు

జైలులో ఉన్న పాకిస్తాన్ తెహ్రీక్-ఇ-ఇన్సాఫ్ (పీటీఐ) పార్టీ వ్యవస్థాపకుడు ఇమ్రాన్ ఖాన్ ఆరోగ్యంపై సోషల్ మీడియాలో వ్యాపించిన వదంతులు తీవ్ర ఆందోళన కలిగించాయి. ఇమ్రాన్ ఖాన్ మరణించారని, ఆయన ఆరోగ్యం విషమంగా ఉందని పాత ఫోటోలు, విదేశీ నివేదికల ద్వారా వదంతులు వ్యాపించాయి. ఈ నేపథ్యంలో 2023 ఆగస్టు నుండి ఆయనను ఉంచిన రావల్పిండిలోని అడియాలా జైలు వద్ద నిరసనలు కూడా జరిగాయి.

ఇమ్రాన్ ఖాన్ ఆరోగ్యం గురించి వదంతులు పెరగడంతో, పీటీఐ పార్టీ వాటిని నిరాధారం అని కొట్టివేసింది. ఈ వదంతులపై ప్రభుత్వం వెంటనే అధికారిక ప్రకటన విడుదల చేయాలని, అలాగే ఇమ్రాన్ ఖాన్‌ను ఆయన కుటుంబ సభ్యులు కలిసేందుకు అనుమతించాలని పీటీఐ డిమాండ్ చేసింది. గత కొద్ది వారాలుగా ఇమ్రాన్ సోదరీమణులు ఆయనను కలిసేందుకు పదేపదే ప్రయత్నించినప్పటికీ, జైలు అధికారులు అనుమతి నిరాకరించారు. దీని కారణంగానే పార్టీ, ఆయన కుటుంబంలో ఆందోళన మరింత పెరిగింది.

జైలు అధికారుల స్పష్టత

ఈ ఆందోళనల నేపథ్యంలో అడియాలా జైలు అధికారులు అధికారికంగా స్పందించారు. ఇమ్రాన్ ఖాన్ ఆరోగ్యంగానే ఉన్నారని, ఆయన తమ అదుపులోనే ఉన్నారని స్పష్టం చేశారు. అంతేకాకుండా ఆయనకు పూర్తిస్థాయిలో వైద్య సంరక్షణ అందుతోందని జైలు అధికారులు ధ్రువీకరించారు. అయితే జైలు అధికారులు స్పష్టత ఇచ్చినప్పటికీ పీటీఐ నాయకులు మాత్రం ప్రత్యక్షంగా కలుసుకుని ఆయన ఆరోగ్యాన్ని నిర్ధారించుకుంటేనే తమ ఆందోళన తగ్గుతుందని పట్టుబడుతున్నారు. ఇమ్రాన్ ఖాన్‌ను ఏకాంతంగా ఉంచడంపై పీటీఐ, అధికారుల మధ్య నెలకొన్న ఉద్రిక్తతను ఈ పరిస్థితి మరింత హైలైట్ చేస్తోంది.

అధికారం నుండి జైలు శిక్ష వరకూ

పాకిస్తాన్ తెహ్రీక్-ఇ-ఇన్సాఫ్ (పీటీఐ) పార్టీ వ్యవస్థాపకుడు ఇమ్రాన్ ఖాన్ ప్రధానమంత్రిగా ఉన్న సమయంలో 2022 ఏప్రిల్ నెలలో ఆయన ప్రభుత్వంపై అవిశ్వాస తీర్మానం ప్రవేశపెట్టారు. ఈ తీర్మానం పాకిస్తాన్ జాతీయ అసెంబ్లీలో నెగ్గడంతో ఇమ్రాన్ ఖాన్ అధికారాన్ని కోల్పోయారు. పాకిస్తాన్ చరిత్రలో అవిశ్వాస తీర్మానం ద్వారా అధికారం కోల్పోయిన మొదటి ప్రధానమంత్రిగా ఆయన నిలిచారు. ఈ రాజకీయ పరిణామం తరువాత ప్రతిపక్ష పార్టీలు కలిసి షెహబాజ్ షరీఫ్ నేతృత్వంలో ఒక సంకీర్ణ ప్రభుత్వాన్ని ఏర్పాటు చేశాయి.

అధికారం కోల్పోయిన వెంటనే ఇమ్రాన్ ఖాన్‌పై కొత్త ప్రభుత్వం అనేక రాజకీయ, చట్టపరమైన కేసులను నమోదు చేసింది. ఈ కేసులలో అవినీతికి సంబంధించిన తోషాఖానా కేసు (విదేశీ ప్రముఖుల నుండి అందుకున్న బహుమతులను అక్రమంగా విక్రయించడం), దేశ భద్రతకు సంబంధించిన సైఫర్ కేసు, 2023 మే 9న ఆయన అరెస్ట్ తర్వాత జరిగిన సైనిక స్థావరాలపై దాడులకు సంబంధించిన ఉగ్రవాద నిరోధక చట్టం కింద నమోదైన కేసులు ముఖ్యమైనవి. ఈ కేసులలో భాగంగా ఇమ్రాన్ ఖాన్ న్యాయపరమైన పోరాటం చేస్తూ వచ్చారు. చివరికి పలు కేసుల్లో దోషిగా తేలడంతో ఆయన 2023 ఆగస్టు నెల నుండి జైలు శిక్ష అనుభవిస్తున్నారు. ప్రస్తుతం ఆయన రావల్పిండిలోని అడియాలా జైలులో ఉన్నారు. ఆయనపై ఇప్పటికీ పలు కేసులు విచారణలో ఉన్నాయి.