ఇమ్రాన్ ఖాన్కు 17 ఏళ్ల జైలు శిక్ష: పాకిస్థాన్ వ్యాప్తంగా నిరసనలకు పిలుపు
పాకిస్థాన్ రాజకీయాల్లో మరోసారి తీవ్ర ఉద్రిక్తత నెలకొంది. అవినీతికి సంబంధించిన ‘తోషాఖానా-2’ కేసులో పాకిస్థాన్ మాజీ ప్రధాని ఇమ్రాన్ ఖాన్కు, ఆయన సతీమణి బుష్రా బీబీకి కోర్టు 17 ఏళ్ల జైలు శిక్ష విధించింది. ఈ తీర్పును తీవ్రంగా వ్యతిరేకించిన ఇమ్రాన్ ఖాన్, తన మద్దతుదారులు దేశవ్యాప్తంగా నిరసనలకు సిద్ధం కావాలని పిలుపునిచ్చారు.
ప్రస్తుతం జైలులో ఉన్న ఇమ్రాన్ ఖాన్కు సోషల్ మీడియా ఖాతాలు అందుబాటులో లేకపోవడంతో, తన సందేశాన్ని న్యాయవాదుల ద్వారా ప్రజలకు చేరవేశారు. తన న్యాయవాదితో జరిగిన సంభాషణలో, ఖైబర్ పఖ్తూన్ఖ్వా ముఖ్యమంత్రి సోహైల్ ఆఫ్రిదీకి పెద్ద ఎత్తున ప్రజా ఉద్యమానికి ఏర్పాట్లు చేయాలని ఆదేశించినట్లు తెలిపారు. “ప్రజలు తమ హక్కుల కోసం రోడ్లపైకి రావాల్సిన సమయం వచ్చింది” అని ఇమ్రాన్ ఖాన్ పేర్కొన్నారు.
ఈ తీర్పు తనకు ఆశ్చర్యం కలిగించలేదని ఇమ్రాన్ ఖాన్ స్పందించారు. గత మూడేళ్లుగా తనపై ఇలాంటి నిరాధారమైన కేసులు, శిక్షలు వస్తున్నాయని ఆరోపించారు. “ఎలాంటి బలమైన సాక్ష్యాలు లేకుండా, మా వాదనలు సరిగా వినకుండానే కోర్టు ఈ శిక్ష విధించింది” అని ఆయన విమర్శించారు. ఈ తీర్పును సవాల్ చేస్తూ ఇస్లామాబాద్ హైకోర్టును ఆశ్రయించనున్నట్లు తెలిపారు.
అసలు కేసు ఏంటి?
ఈ కేసు సౌదీ అరేబియా క్రౌన్ ప్రిన్స్ నుంచి బహుమతిగా వచ్చిన ఖరీదైన ‘బుల్గారీ’ ఆభరణాల సెట్కు సంబంధించినది. దాని విలువ సుమారు 71 మిలియన్ పాకిస్థాన్ రూపాయలుగా అధికారులు చెబుతున్నారు. ఈ ఆభరణాల విలువను తక్కువగా చూపించి ప్రభుత్వ ఖజానాకు నష్టం చేకూర్చారన్న ఆరోపణలపై ఇమ్రాన్ ఖాన్ దంపతులపై కేసు నమోదు అయింది.
అయితే, ఈ కేసులో బలమైన ఆధారాలు లేవని, ఇది పూర్తిగా రాజకీయ ప్రతీకారమేనని ఇమ్రాన్ ఖాన్ పార్టీ పాకిస్థాన్ తెహ్రీక్–ఇ–ఇన్సాఫ్ (పీటీఐ) ఆరోపిస్తోంది. “నేను ఎవరికీ క్షమాపణ చెప్పను, ఎలాంటి ఒత్తిడికి తలవంచను” అని ఇమ్రాన్ ఖాన్ స్పష్టం చేసినట్లు పార్టీ నేతలు తెలిపారు.
పీటీఐ పార్టీ ఆగ్రహం
ఈ తీర్పును పీటీఐ పార్టీ తీవ్రంగా ఖండించింది. ఇది రాజ్యాంగ విరుద్ధమని, చట్టానికి వ్యతిరేకమని పార్టీ నేతలు ఆరోపించారు. ఇమ్రాన్ ఖాన్ను జైలులోనే కొనసాగించడమే లక్ష్యంగా ఈ తీర్పు ఇచ్చారని విమర్శించారు. పార్టీ ప్రధాన కార్యదర్శి సల్మాన్ అక్రమ్ రాజా మాట్లాడుతూ, “ఈ కేసులో సాక్ష్యాలు లేవు, కేవలం పత్రాల ఆధారంగానే శిక్ష విధించారు” అని అన్నారు.
ఈ తీర్పుతో పాకిస్థాన్లో న్యాయవ్యవస్థపై ప్రజల నమ్మకం తగ్గుతోందని పలువురు అభిప్రాయపడుతున్నారు. లాహోర్, పెషావర్ వంటి నగరాల్లో ప్రజలు ఈ తీర్పును రాజకీయ ప్రేరేపిత నిర్ణయంగా విమర్శిస్తున్నారు. “న్యాయస్థానాల తీర్పులపై ప్రజలకు విశ్వాసం కోల్పోతోంది” అని కొందరు స్థానికులు ఆవేదన వ్యక్తం చేశారు. నిరసనల పిలుపు నేపథ్యంలో దేశంలోని ప్రధాన నగరాల్లో భద్రతను కట్టుదిట్టం చేశారు.
ఇమ్రాన్ ఖాన్కు విధించిన 17 ఏళ్ల జైలు శిక్ష పాకిస్థాన్ రాజకీయాల్లో కొత్త ఉద్రిక్తతలకు దారితీయనుందని విశ్లేషకులు అంటున్నారు. ఈ తీర్పు దేశ ప్రజాస్వామ్య వ్యవస్థపై ప్రభావం చూపే అవకాశం ఉందని వారు అభిప్రాయపడుతున్నారు. ఈ కేసును హైకోర్టులో సవాల్ చేయడం, అలాగే దేశవ్యాప్తంగా ఆందోళనలు జరగడం వల్ల పరిస్థితి మరింత ఉద్రిక్తంగా మారే అవకాశముందని రాజకీయ వర్గాలు భావిస్తున్నాయి.