ఇజ్రాయెల్ ప్రధాని నెతన్యాహు భారత పర్యటన వాయిదా!
ఇజ్రాయెల్ ప్రధాన మంత్రి బెంజమిన్ నెతన్యాహు డిసెంబర్లో భారత్లో పర్యటించాల్సి ఉంది. అయితే ఈ పర్యటన వాయిదా పడినట్లు ఇజ్రాయెల్కు చెందిన ఐ24న్యూస్ సంస్థ తెలిపింది. రెండు వారాల క్రితం ఢిల్లీలో జరిగిన పేలుడు ఘటన కారణంగా తలెత్తిన భద్రతాపరమైన ఆందోళనల వల్లే ఈ పర్యటన వాయిదా పడినట్లు ఆ నివేదిక పేర్కొంది.
ఢిల్లీలో పేలుడు జరిగిన వెంటనే, నెతన్యాహు ఉగ్రవాదంపై స్పందించారు. "ఉగ్రవాదం నగరాలను లక్ష్యంగా చేసుకోవచ్చు, కానీ ధైర్యంగా నిలబడే దేశాల స్ఫూర్తిని అది ఎన్నటికీ విచ్ఛిన్నం చేయలేదు" అని ఆయన ప్రకటించారు. ఈ సందర్భంగా ఆయన భారత ప్రజలకు, ప్రధాని నరేంద్ర మోదీకి సంతాపం తెలుపుతూ, "ఇజ్రాయెల్ దేశం మీ దుఃఖంలో, ఈ క్లిష్ట సమయంలో మీకు అండగా నిలబడుతుంది" అని ఒక ప్రకటన విడుదల చేశారు.
నెతన్యాహు గతంలో చివరిసారిగా 2018లో జనవరి 14 నుంచి 19 వరకు ఆరు రోజుల పర్యటన నిమిత్తం భారత్కు వచ్చారు. అంతకు ఆరు నెలల ముందు, 2017లో ప్రధాని నరేంద్ర మోడీ చారిత్రక ఇజ్రాయెల్ పర్యటనకు వెళ్లిన తర్వాత ఈ పర్యటన జరిగింది.
నెతన్యాహు పర్యటన వాయిదా పడినప్పటికీ, ఇరు దేశాల మధ్య ఉన్న సంబంధాలు మాత్రం బలంగా ముందుకు సాగుతున్నాయి. ఇటీవల భారత వాణిజ్య, పరిశ్రమల శాఖ మంత్రి పీయూష్ గోయల్ ఇజ్రాయెల్లో మూడు రోజుల పాటు విజయవంతంగా పర్యటించారు. ఈ పర్యటనలో ఆయన నెతన్యాహుతో సహా ఇతర ముఖ్య నేతలను కలిశారు. గోయల్, ప్రధాని మోడీ శుభాకాంక్షలను నెతన్యాహుకు అందించారు. అలాగే ఇజ్రాయెల్ మంత్రి నిర్ బర్కట్ తో జరిగిన చర్చలు, వ్యాపారవేత్తలు సమావేశాల వివరాలను వివరించారు.
స్వేచ్ఛా వాణిజ్య ఒప్పందం
భారత్-ఇజ్రాయెల్ మధ్య స్వేచ్ఛా వాణిజ్య ఒప్పందం కోసం చర్చలు మొదలుపెట్టడానికి సంబంధించిన నియమాలను ఖరారు చేసినట్లు కేంద్ర మంత్రి పీయూష్ గోయల్ సోషల్ మీడియా ప్లాట్ఫామ్ 'ఎక్స్' ద్వారా తెలిపారు. ఈ ఒప్పందం వల్ల వాణిజ్యం, పెట్టుబడులు, సాంకేతిక సహకారం పెరుగుతాయని ఆశాభావం వ్యక్తం చేశారు. వ్యవసాయం, రక్షణ, నీటి నిర్వహణ, సైన్స్, టెక్నాలజీ వంటి రంగాలలో ఇజ్రాయెల్ అధునాతన సాంకేతికతను భారతీయ నైపుణ్యంతో కలిపి పని చేయడంపై నెతన్యాహు సలహాలు కూడా కోరారు.
భారత్-ఇజ్రాయెల్ సంబంధాలు రక్షణ, భద్రత, వ్యవసాయం, నీటి నిర్వహణ, సాంకేతికత, వాణిజ్యం వంటి అనేక రంగాల్లో పరస్పర ప్రయోజనాల ఆధారంగా వేగంగా బలపడిన వ్యూహాత్మక భాగస్వామ్యం. ఉగ్రవాదం, భద్రతా సవాళ్లను ఎదుర్కొనడంలో ఇరుదేశాల అనుభవం ఒకేలా ఉండటం, ఇజ్రాయెల్ రక్షణ–హైటెక్ నైపుణ్యం భారత అవసరాలకు సరిపోవడం, అలాగే వ్యవసాయ నీటి టెక్నాలజీలో ఇజ్రాయెల్ ముందంజలో ఉండటం దోహదపడ్డాయి. 2017 నుండి రెండు దేశాల రాజకీయ నాయకత్వం మధ్య ఏర్పడిన బలమైన అనుబంధం, స్టార్టప్లు, ఇన్నోవేషన్, పెట్టుబడులు, ఎఫ్టీఏ చర్చలు వంటి రంగాల్లో సహకారాన్ని మరింత వేగవంతం చేసింది. ఈ విధంగా ఆర్థిక, భద్రతా, సాంకేతిక రంగాల్లో పరస్పర ఆధారపడే, భవిష్యత్తులో ఇంకా విస్తరించే గట్టి భాగస్వామ్యంగా భారత్–ఇజ్రాయెల్ సంబంధాలు మారాయి.