‘ఇజ్రాయెల్ ఒత్తిడితోనే యుద్ధం’.. అమెరికా కీలక అధికారి రాజీనామా

పశ్చిమాసియాలో కొనసాగుతున్న యుద్ధం అమెరికా ప్రభుత్వంలో తీవ్ర ప్రకంపనలు సృష్టిస్తోంది. ఇరాన్‌తో జరుగుతున్న పోరాటం అన్యాయమని, దేశ భద్రతకు ఇరాన్ వల్ల ఎలాంటి ముప్పూ లేదని పేర్కొంటూ అమెరికా నేషనల్ కౌంటర్ టెర్రరిజం సెంటర్ (ఎన్‌సీటీసీ) డైరెక్టర్ జోసెఫ్ కెంట్ మంగళవారం తన పదవికి రాజీనామా చేశారు. ఈ మేరకు అధ్యక్షుడు డొనాల్డ్ ట్రంప్‌నకు పంపిన రాజీనామా లేఖలో ఆయన సంచలన ఆరోపణలు చేశారు. ఇజ్రాయెల్, దాని అనుకూల లాబీ ఒత్తిడి వల్లే వాషింగ్టన్ ఈ యుద్ధంలోకి దిగిందని, అమెరికా జాతీయ ప్రయోజనాల కంటే పరాయి దేశ ప్రయోజనాలకే పెద్దపీట వేస్తున్నారని ఆయన మండిపడ్డారు.

అమెరికా ప్రయోజనాలకు విరుద్ధం

తమది 'అమెరికా ఫస్ట్' విధానమని చెప్పుకునే ట్రంప్, ఇప్పుడు దానికి విరుద్ధంగా వ్యవహరిస్తున్నారని కెంట్ విమర్శించారు. మధ్యప్రాచ్య యుద్ధాలు అమెరికా దేశభక్తుల ప్రాణాలను బలితీసుకోవడమే కాకుండా, దేశ సంపదను, శ్రేయస్సును హరించివేస్తాయని గతంలో ట్రంప్ నమ్మేవారని ఆయన గుర్తు చేశారు. 2025 జూన్ వరకు కూడా ఇవి ఒక మాయావలయమని భావించిన అధ్యక్షుడు, ఇప్పుడు అదే వలలో చిక్కుకున్నారని ఆవేదన వ్యక్తం చేశారు. కేవలం ఇజ్రాయెల్ అధికారుల తప్పుడు ప్రచారానికి లొంగిపోయి, ఇరాన్ వల్ల ముప్పు పొంచి ఉందనే అబద్ధాన్ని నమ్మారని కెంట్ తన లేఖలో పేర్కొన్నారు.

ఇరాక్ యుద్ధం లాంటి తప్పే మళ్లీ..

గతంలో ఇరాక్ యుద్ధంలోకి అమెరికాను నెట్టడానికి ఇజ్రాయెల్ ఎలాంటి ఎత్తుగడలు వేసిందో, ఇప్పుడు ఇరాన్ విషయంలోనూ అవే పునరావృతమవుతున్నాయని కెంట్ హెచ్చరించారు. తప్పుడు సమాచారంతో అధ్యక్షుడిని తప్పుదోవ పట్టించి, యుద్ధం చేస్తే సులభంగా విజయం సాధించవచ్చనే భ్రమను కలిగించారని విమర్శించారు. అప్పట్లో ఇరాక్ యుద్ధం వల్ల వేలాది మంది ఉత్తమ సైనికులను కోల్పోయామని, మళ్లీ అదే తప్పును చేసి వచ్చే తరాన్ని బలి ఇవ్వలేమని ఆయన స్పష్టం చేశారు. ఈ యుద్ధం వల్ల అమెరికా ప్రజలకు ఎలాంటి ప్రయోజనం లేదని ఆయన తేల్చిచెప్పారు.

సుప్రీం లీడర్ మృతితో మొదలైన ముప్పు

ఫిబ్రవరి 28న అమెరికా, ఇజ్రాయెల్ జరిపిన సంయుక్త దాడుల్లో ఇరాన్ సుప్రీం లీడర్ అయతొల్లా అలీ ఖమేనీ మరణించినప్పటి నుండి ఈ ఉద్రిక్తతలు పతాక స్థాయికి చేరాయి. దీనికి ప్రతీకారంగా ఇరాన్ గల్ఫ్ దేశాల్లోని అమెరికా, ఇజ్రాయెల్ ఆస్తులపై దాడులు చేస్తోంది. ఫలితంగా ప్రపంచ చమురు మార్కెట్లు అస్తవ్యస్తమయ్యాయి. ఖమేనీ మరణం తర్వాత ఆయన కుమారుడు మొజ్తబా ఖమేనీ కొత్త సుప్రీం లీడర్‌గా బాధ్యతలు చేపట్టగా, ఇరాన్ హోర్ముజ్ జలసంధిని మూసివేసి అంతర్జాతీయ ఆర్థిక వ్యవస్థను సంక్షోభంలోకి నెట్టింది.

వ్యక్తిగత వేదన.. దేశ భద్రతే ముఖ్యం

11 సార్లు యుద్ధ రంగంలో పనిచేసిన అనుభవం ఉన్న జోసెఫ్ కెంట్, ఈ రాజీనామా నిర్ణయం వెనుక తన వ్యక్తిగత బాధను కూడా పంచుకున్నారు. ఇజ్రాయెల్ ప్రేరేపిత యుద్ధంలోనే తాను తన సతీమణి షానన్‌ను కోల్పోయానని (గోల్డ్ స్టార్ హస్బెండ్), ఇప్పుడు మరో తరం సైనికులు ఇలాంటి అనవసర యుద్ధాల్లో చనిపోవడాన్ని తాను చూడలేనని అన్నారు. తన మనస్సాక్షికి విరుద్ధంగా ఇరాన్ యుద్ధానికి మద్దతు ఇవ్వలేనని, అందుకే పదవి నుండి తప్పుకుంటున్నట్లు ఆయన ప్రకటించారు. అమెరికా గూఢచారి వ్యవస్థలో ఇంతటి కీలక వ్యక్తి రాజీనామా చేయడం ఇప్పుడు అంతర్జాతీయంగా చర్చనీయాంశమైంది.