ఇజ్రాయెల్లో ప్రధాని మోడీకి ఘనస్వాగతం
భారత ప్రధాని నరేంద్ర మోడీ తన రెండు రోజుల అధికారిక పర్యటనలో భాగంగా బుధవారం ఇజ్రాయెల్లో అడుగుపెట్టారు. బెన్ గురియన్ విమానాశ్రయంలో ప్రధాని మోడీకి ఇజ్రాయెల్ ప్రధాని బెంజమిన్ నెతన్యాహు, ఆయన సతీమణి సారా నెతన్యాహు ఘనస్వాగతం పలికారు. ప్రధాని మోడీకి రెడ్ కార్పెట్ పరిచి, లాంఛనప్రాయంగా ఆహ్వానం పలికారు. ఇద్దరు నేతలు ఒకరినొకరు ఆత్మీయంగా ఆలింగనం చేసుకున్నారు. ప్రధాని మోడీకి అక్కడ సైనిక వందనం (గార్డ్ ఆఫ్ హానర్) సమర్పించారు. ప్రధాని హోదాలో మోడీకి ఇది రెండో ఇజ్రాయెల్ పర్యటన కాగా, ఈ పర్యటన ఇరు దేశాల మధ్య ఉన్న దృఢమైన వ్యూహాత్మక భాగస్వామ్యాన్ని మరింత బలోపేతం చేస్తుందని ఇరు దేశాల ప్రతినిధులు ఆశాభావం వ్యక్తం చేశారు.
వ్యక్తిగత స్నేహం.. పెరిగిన సంబంధాలు
మోడీ, నెతన్యాహు మధ్య ఉన్న బలమైన వ్యక్తిగత సాన్నిహిత్యం ఇరు దేశాల సంబంధాలపై సానుకూల ప్రభావం చూపుతోందని ఇజ్రాయెల్ ప్రధాన మంత్రి కార్యాలయం పేర్కొంది. 2017లో మోడీ చారిత్రక పర్యటన, ఆ తర్వాత నెతన్యాహు భారత్ పర్యటన ఇరు దేశాల సంబంధాలకు కొత్త ఊపిరి పోశాయి. ఈ సందర్భంగా ఎక్స్ (ట్విట్టర్) వేదికగా స్పందించిన మోడీ, "ఇజ్రాయెల్ గడ్డపై అడుగుపెట్టాను. నాకు స్వాగతం పలికిన ప్రధాని నెతన్యాహు దంపతులకు ధన్యవాదాలు. ఈ పర్యటన ద్వారా ఇరు దేశాల మధ్య స్నేహం మరింత బలపడుతుందని నమ్ముతున్నాను" అని పేర్కొన్నారు. రక్షణ, సాంకేతికత, వ్యవసాయం, ఆవిష్కరణ రంగాల్లో ఇరు దేశాలు పరస్పర విశ్వాసంతో ముందుకు సాగుతున్నాయని విదేశాంగ శాఖ అధికార ప్రతినిధి రణధీర్ జైస్వాల్ తెలిపారు.
2006 నుంచి నేటి వరకు.. వ్యవసాయమే మూలస్తంభం
ప్రధాని మోడీకి ఇజ్రాయెల్తో ఉన్న సంబంధం నేటిది కాదు. 2006లో గుజరాత్ ముఖ్యమంత్రిగా ఉన్న సమయంలోనే ఆయన మొదటిసారి ఇజ్రాయెల్ను సందర్శించి, 'అగ్రిటెక్-2006'లో పాల్గొన్నారు. అప్పట్లో ఆయన ప్రతిపాదించిన 'పర్ డ్రాప్ - మోర్ క్రాప్' నినాదమే, నేడు కేంద్ర ప్రభుత్వ 'ప్రధాన్ మంత్రి కృషి సించాయీ యోజన'కు మూలమైంది. 2017లో ప్రధానిగా తన తొలి పర్యటనలో ఇజ్రాయెల్ వ్యవసాయ సాంకేతికతతో కూడిన మూడు సంవత్సరాల పని ప్రణాళికను కుదుర్చుకున్నారు. తాజాగా ఈ పర్యటనలో భాగంగా, ఆహార భద్రత, నీటి యాజమాన్యం, ఆధునిక సేద్యంపై మళ్ళీ చర్చలు జరగనున్నాయి.
నేడు కీలక భేటీలు
ఈ పర్యటనలో భాగంగా ప్రధాని మోడీ ఇజ్రాయెల్ పార్లమెంటు అయిన 'నెసెట్'ను ఉద్దేశించి బుధవారం ప్రసంగించారు. ఏ భారత ప్రధానికి దక్కని ఈ అరుదైన గౌరవం మోడీకి దక్కడం విశేషం. నేడు నెతన్యాహుతో మోడీ విస్తృత స్థాయి చర్చలు జరుపుతారు. శాస్త్రసాంకేతికత, రక్షణ, భద్రత, వాణిజ్యం వంటి రంగాల్లో సహకారాన్ని మరింత బలోపేతం చేయడంపై ఈ పర్యటనలో ప్రధానంగా దృష్టి సారించనున్నారు.
రక్షణ, వాణిజ్య రంగాల్లో పురోగతి
రక్షణ రంగంలో సహకారం ఇరు దేశాల బంధానికి ప్రధాన స్తంభంగా నిలుస్తోంది. భారత్ ప్రతిష్టాత్మకంగా చేపడుతున్న స్వదేశీ వైమానిక రక్షణ వ్యవస్థ 'సుదర్శన్ చక్ర' తయారీలో, ఇజ్రాయెల్ అత్యాధునిక 'ఐరన్ డోమ్' సాంకేతికతను పొందే అవకాశాలను భారత్ పరిశీలిస్తోంది. మరోవైపు, వాణిజ్య పరంగా కూడా స్వేచ్ఛా వాణిజ్య ఒప్పందం, ద్వైపాక్షిక పెట్టుబడుల ఒప్పందం దిశగా ఇరు దేశాలు వేగంగా అడుగులు వేస్తున్నాయి. మధ్యప్రాచ్యంలో ప్రస్తుత ఉద్రిక్త పరిస్థితుల నేపథ్యంలో ప్రధాని మోడీ పర్యటనకు అంతర్జాతీయంగా ప్రాధాన్యత ఏర్పడింది.