ఇండోనేషియాలో విమానం గల్లంతు.. పర్వత ప్రాంతంలో శకలాల గుర్తింపు

ఇండోనేషియాలో శనివారం మధ్యాహ్నం గల్లంతైన మత్స్యశాఖ నిఘా విమానం ప్రమాదానికి గురైనట్లు అధికారికంగా నిర్ధారణ అయ్యింది. సులవేసి ద్వీపంలోని మారోస్ జిల్లాలో ఉన్న మౌంట్ బులుసారుంగ్ పర్వత ప్రాంతంలో ఈ విమానం కుప్పకూలినట్లు సహాయక బృందాలు ఆదివారం గుర్తించాయి. విమానంలో ఉన్న ఎనిమిది మంది సిబ్బంది, ముగ్గురు మత్స్యశాఖ అధికారుల పరిస్థితిపై ఇంకా స్పష్టత రాలేదు.

ఏం జరిగిందంటే?

ఇండోనేషియా ఎయిర్ ట్రాన్స్‌పోర్ట్ సంస్థకు చెందిన 'ఏటీఆర్ 42-500' రకానికి చెందిన టర్బోప్రాప్ విమానం యోగ్యకర్త నుంచి బయలుదేరి దక్షిణ సులవేసి రాజధాని మకస్సర్‌కు వెళ్తుండగా మధ్యాహ్నం 1:17 గంటల సమయంలో రాడార్‌తో సంబంధాలు తెగిపోయాయి. లీంగ్-లీంగ్ ప్రాంతంలోని పర్వతాల గుండా ప్రయాణిస్తున్న సమయంలో విమానం వెళ్లే దారిని మార్చుకోవాలని ఎయిర్ ట్రాఫిక్ కంట్రోల్ సూచించిన కొద్దిసేపటికే ఈ ఘటన జరిగింది.

హెలికాప్టర్ ద్వారా శకలాల గుర్తింపు

శనివారం నుంచి కొనసాగుతున్న గాలింపు చర్యల్లో భాగంగా, ఆదివారం ఉదయం వాయుసేన హెలికాప్టర్ ద్వారా పర్వత వాలుపై విమాన విండో వంటి భాగాన్ని గుర్తించారు. అనంతరం భూమార్గం ద్వారా సహాయక బృందాలు కాలినడకన అక్కడికి చేరుకోగా, పర్వతం ఉత్తర దిశలో విమాన తోక భాగం, ప్రధాన భాగం చెల్లాచెదురుగా పడి ఉన్నట్లు గుర్తించారు.

"విమాన శకలాలు లభించడంతో గాలింపు పరిధిని కుదించడానికి వీలైంది. ప్రస్తుతం మా ప్రధాన లక్ష్యం బాధితులను గుర్తించడం. ఎవరైనా ప్రాణాలతో ఉండే అవకాశం ఉందేమోనని ఆశతో వెతుకుతున్నాం” అని మకస్సర్ సెర్చ్ అండ్ రెస్క్యూ ఆఫీస్ హెడ్ ముహమ్మద్ ఆరిఫ్ అన్వర్ తెలిపారు.

ప్రతికూల వాతావరణం.. అడ్డంకిగా మారిన మంచు

దాదాపు 400 మంది సైనిక, పోలీసు, సహాయక సిబ్బంది ఈ గాలింపు చర్యల్లో పాల్గొంటున్నారు. అయితే ఆ ప్రాంతంలో దట్టంగా అలుముకున్న మంచు, భారీ గాలులు, నిటారుగా ఉన్న కొండ ప్రాంతం సహాయక చర్యలకు తీవ్ర ఆటంకం కలిగిస్తున్నాయి. మౌంట్ బులుసారుంగ్ శిఖరం వద్ద వాతావరణం సరిగా లేకపోవడం వల్ల సహాయక బృందాలు ఘటనా స్థలికి చేరుకోవడానికి చాలా శ్రమించాల్సి వస్తోంది.

నిఘా విధుల్లో మత్స్యశాఖ అధికారులు

మత్స్య, సముద్ర వ్యవహారాల మంత్రిత్వ శాఖ ఈ విమానాన్ని చార్టర్ ప్రాతిపదికన తీసుకుంది. సముద్ర ప్రాంతంలో అక్రమ చేపల వేటను అరికట్టడానికి గగనతలం నుంచి నిఘా వేసేందుకు ముగ్గురు అధికారులు ఇందులో ప్రయాణిస్తున్నారు.

17 వేలకు పైగా ద్వీపాలు ఉన్న ఇండోనేషియాలో విమానయానమే ప్రధాన రవాణా మార్గమైనప్పటికీ, ఇటీవల కాలంలో అక్కడ రవాణా ప్రమాదాలు ఆందోళన కలిగిస్తున్నాయి. ప్రస్తుత ప్రమాదానికి కారణాలను విశ్లేషించేందుకు ఫ్రాన్స్‌కు చెందిన ఏటీఆర్ విమాన తయారీ సంస్థ నిపుణులు కూడా రంగంలోకి దిగారు.