ఆస్తి పన్ను బకాయిలపై భారీ ఊరట: జీహెచ్ఎంసీ మరో ఛాన్స్
నగరంలోని ఆస్తి యజమానులకు తమ పాత పన్ను బకాయిలను వడ్డీ భారం లేకుండా చెల్లించుకునేందుకు గ్రేటర్ హైదరాబాద్ మున్సిపల్ కార్పొరేషన్ సువర్ణావకాశాన్ని కల్పించింది. 'వన్ టైమ్ సెటిల్మెంట్' పథకం 2025-26 ద్వారా పెండింగ్లో ఉన్న ఆస్తి పన్నుపై పేరుకుపోయిన వడ్డీలో భారీ రాయితీని ప్రకటించింది.
ఈ ఓటీఎస్ పథకం కింద, బకాయిదారులు తమ అసలు 100 శాతం ఆస్తి పన్నును చెల్లిస్తే, బకాయి వడ్డీలో కేవలం 10 శాతం మాత్రమే చెల్లించాల్సి ఉంటుంది. మిగిలిన 90 శాతం వడ్డీని జీహెచ్ఎంసీ మాఫీ చేస్తుంది. దీంతో పన్ను చెల్లింపుదారులు తక్కువ మొత్తంతో తమ బకాయిలను క్లియర్ చేసుకునే అవకాశం పొందుతున్నారు. ఈ పథకం 31 మార్చి 2026 వరకు మాత్రమే అమల్లో ఉంటుంది. కావున అర్హులైన ఆస్తి యజమానులు గడువు ముగిసేలోపు ఈ అవకాశాన్ని వినియోగించుకోవాలని జీహెచ్ఎంసీ అధికారులు సూచిస్తున్నారు.
పన్ను చెల్లింపులు మైజీహెచ్ఎంసీ యాప్ ద్వారా, ఆన్లైన్ చెల్లింపు విధానాల ద్వారా, మీ సేవా కేంద్రాల్లో లేదా సమీపంలోని జీహెచ్ఎంసీ సిటిజన్ సర్వీస్ సెంటర్ (సీఎస్సీ)లను సందర్శించి చేయవచ్చు. సమయానికి పన్నులు చెల్లించడం ద్వారా నగరంలోని పౌర సేవల మెరుగుదలకు సహకరించినట్లవుతుందని అధికారులు తెలిపారు.
గ్రేటర్ హైదరాబాద్ పరిధిలో మొత్తం సుమారు 19 లక్షల నుంచి 19.5 లక్షల వరకు ఆస్తులు నమోదై ఉన్నాయి. వీటిలో ఎక్కువగా నివాస గృహాలు ఉండగా, మిగతావి వాణిజ్య, మిక్స్డ్ యూజ్ ఆస్తులు. ఇందులో సుమారు 14 నుంచి 15 లక్షల వరకు ఆస్తి యజమానులు రెగ్యులర్గా ఆస్తి పన్ను చెల్లిస్తున్నారని అంచనా. కాగా 4 నుంచి 5 లక్షల వరకు ఆస్తులు పన్ను బకాయిలతో ఉన్నట్లు జీహెచ్ఎంసీ గత అంచనాలు సూచిస్తున్నాయి. పన్ను బకాయిల వసూళ్లను పెంచేందుకు జీహెచ్ఎంసీ వన్ టైమ్ సెటిల్మెంట్ వంటి పథకాలను అమలు చేస్తోంది.