ఆసియా బ్యాడ్మింటన్: ఆయుష్ శెట్టికి రజతం

భారత యువ షట్లర్, మంగళూరు సంచలనం ఆయుష్ శెట్టి ఆసియా బ్యాడ్మింటన్ ఛాంపియన్‌షిప్‌లో రజత పతకంతో మెరిశాడు. ఆదివారం జరిగిన పురుషుల సింగిల్స్ ఫైనల్లో ప్రపంచ 25వ ర్యాంకర్ ఆయుష్ 8-21, 10-21తో ప్రపంచ నంబర్ 2, చైనా దిగ్గజం షీ యూ కీ చేతిలో ఓటమి పాలయ్యాడు. టైటిల్ చేజారినా, అన్ సీడెడ్ ఆటగాడిగా బరిలోకి దిగి దిగ్గజాలను మట్టికరిపిస్తూ ఫైనల్ చేరిన ఆయుష్ ప్రదర్శన భారత బ్యాడ్మింటన్ చరిత్రలో చిరస్థాయిగా నిలిచిపోనుంది.

చరిత్రకు అడుగు దూరంలో..

ఈ టోర్నీలో ఆయుష్ ప్రస్థానం అద్భుతమనే చెప్పాలి. ప్రపంచ నంబర్ 1 కున్లావుత్ విటిద్‌సర్న్, నంబర్ 4 జోనాథన్ క్రిస్టీ, నంబర్ 7 లీ షీ ఫెంగ్ వంటి అగ్రశ్రేణి ఆటగాళ్లను ఓడించి ఫైనల్లో అడుగుపెట్టాడు. 1965లో దినేష్ ఖన్నా తర్వాత ఈ ప్రతిష్ఠాత్మక టోర్నీలో పురుషుల సింగిల్స్ ఫైనల్ చేరిన రెండో భారతీయుడిగా ఆయుష్ రికార్డు సృష్టించాడు. 61 ఏళ్లుగా ఊరిస్తున్న పసిడి పతకాన్ని ఈసారి ఆయుష్ అందిస్తాడని ఆశించినా, ఫైనల్లో ప్రత్యర్థి అనుభవం ముందు తలవంచక తప్పలేదు.

ఏకపక్షంగా సాగిన సమరం

తొలి గేమ్ నుంచి షీ యూ కీ తనదైన శైలిలో ఆధిపత్యం ప్రదర్శించాడు. నెట్ వద్ద అద్భుతమైన డ్రిబుల్స్‌తో 4-0తో ఆధిక్యంలోకి వెళ్లాడు. ఆయుష్ స్మాష్‌లు గురి తప్పడం, వరుస తప్పిదాలు చేయడంతో తొలి గేమ్‌ను చైనా ఆటగాడు 21-8తో సులువుగా కైవసం చేసుకున్నాడు. బెంగళూరులోని పదుకొనె-ద్రావిడ్ సెంటర్ ఆఫ్ స్పోర్ట్స్ ఎక్సలెన్స్ శిక్షణ పొందిన ఆయుష్, ప్రత్యర్థి వ్యూహాలను అడ్డుకోవడంలో తడబడ్డాడు.

రెండో గేమ్‌లో పోరాడినా..

రెండో గేమ్‌లో ఆయుష్ గట్టి పోటీ ఇచ్చే ప్రయత్నం చేశాడు. ఒకానొక దశలో 7-2తో ఆధిక్యంలో నిలిచి రేసులోకి వచ్చాడు. హాక్-ఐ ద్వారా పాయింట్లు సాధిస్తూ ఆధిక్యాన్ని నిలబెట్టుకునేలా కనిపించాడు. అయితే విరామం తర్వాత షీ యూ కీ పుంజుకున్నాడు. వరుసగా పాయింట్లు సాధిస్తూ స్కోరును 7-7తో సమం చేశాడు. అక్కడి నుంచి తన అనుభవాన్నంతా రంగరించి కచ్చితమైన స్మాష్‌లు, డ్రాప్ షాట్లతో విరుచుకుపడ్డాడు. ఆఖరికి 21-10తో గేమ్ గెలిచి స్వర్ణాన్ని ముద్దాడాడు.

ఆసియా బ్యాడ్మింటన్ పోటీల్లో భారత్ రికార్డులు

ఆసియా బ్యాడ్మింటన్ ఛాంపియన్‌షిప్ చరిత్రలో భారత్ సాధించిన విజయాలు చాలా అరుదు. 1965లో దినేష్ ఖన్నా పురుషుల సింగిల్స్‌లో మొట్టమొదటి స్వర్ణ పతకాన్ని సాధించగా, ఆ తర్వాత సుదీర్ఘ కాలం వేచి చూడాల్సి వచ్చింది. మళ్లీ 2023లో సాత్విక్ సాయిరాజ్ - చిరాగ్ శెట్టి జోడీ పురుషుల డబుల్స్‌లో దేశానికి రెండో స్వర్ణాన్ని అందించింది. ఇప్పుడు 2026లో యువ సంచలనం ఆయుష్ శెట్టి పురుషుల సింగిల్స్‌లో రజత పతకాన్ని కైవసం చేసుకున్నాడు. ఫైనల్లో విజేతగా నిలవకపోయినా, ఈ టోర్నీలో ప్రపంచ అగ్రశ్రేణి ఆటగాళ్లను ఓడిస్తూ ఆయుష్ చూపిన అద్భుత పోరాటం భారత బ్యాడ్మింటన్ భవిష్యత్తుపై కొత్త ఆశలు చిగురింపజేసింది.