ఆసియా కప్ ఆర్చరీ: భారత్కు రెండు కాంస్యాలు
థాయ్లాండ్ వేదికగా జరుగుతున్న ఆసియా కప్ వరల్డ్ ర్యాంకింగ్ టోర్నమెంట్ (స్టేజ్ 1)లో భారత ఆర్చర్లు అదరగొడుతున్నారు. బుధవారం జరిగిన రెండో రోజు పోటీల్లో భారత్ రెండు కాంస్య పతకాలను తన ఖాతాలో వేసుకోవడమే కాకుండా, మరో రెండు టీమ్ ఈవెంట్లలో ఫైనల్స్కు దూసుకెళ్లింది. వ్యక్తిగత విభాగంలోనూ మూడు పతకాలను ఖాయం చేసుకున్నప్పటికీ, రికర్వ్ పురుషుల వ్యక్తిగత విభాగంలో భారత ఆర్చర్లు ఘోరంగా విఫలమవడం క్రీడాభిమానులను కొంత నిరాశకు గురిచేసింది.
ఫైనల్కు కాంపౌండ్ మహిళల జట్టు
మహిళల కాంపౌండ్ టీమ్ విభాగంలో చికిత తనిపర్తి, రాజ్ కౌర్, తేజల్ సాళ్వేలతో కూడిన భారత త్రయం అద్భుత ప్రదర్శన కనబరిచింది. హోరాహోరీగా సాగిన సెమీఫైనల్లో స్థానిక థాయ్లాండ్ జట్టును 229-226 పాయింట్ల తేడాతో ఓడించి ఫైనల్కు చేరింది. తద్వారా గత ఎడిషన్లో వచ్చిన కాంస్యం కంటే మెరుగైన ఫలితాన్ని ఈసారి ఖాయం చేసుకుంది. స్వర్ణ పతకం కోసం భారత్.. కజకిస్థాన్తో తలపడనుంది. అలాగే రికర్వ్ పురుషుల జట్టు (దేవాంగ్ గుప్తా, సుఖ్చైన్ సింగ్, జుయెల్ సర్కార్) కూడా 5-1తో మలేషియాపై విజయం సాధించి ఫైనల్కు దూసుకెళ్లింది.
పురుషుల కాంపౌండ్ జట్టుకు కాంస్యం
పురుషుల కాంపౌండ్ విభాగంలో రజత్ చౌహాన్, రిషబ్ యాదవ్, ఉదయ్ కాంబోజ్లతో కూడిన అనుభవజ్ఞులైన జట్టు సెమీఫైనల్లో వియత్నాం చేతిలో 233-234 పాయింట్ల తేడాతో అనూహ్యంగా ఓడిపోయింది. ఐదు పాయింట్ల ఆధిక్యంలో ఉండి కూడా చివరి నిమిషంలో తడబడటంతో టైటిల్ను కాపాడుకోలేకపోయింది. అయితే కాంస్య పతక పోరులో భూటాన్పై 234-232తో గెలిచి పతకాన్ని దక్కించుకుంది. మరోవైపు రికర్వ్ మహిళల జట్టు (రుమా బిస్వాస్, కీర్తి, రిధి ఫోర్) 5-1తో మలేషియాను చిత్తు చేసి కాంస్యం గెలుచుకుంది.
వ్యక్తిగత విభాగాల్లో మిశ్రమ ఫలితాలు
వ్యక్తిగత విభాగంలో కాంపౌండ్ పురుషుల ఆర్చర్లు పట్టుదల కనబరిచారు. జౌకర్, కాంబోజ్ ఫైనల్కు చేరగా.. రజత్ చౌహాన్ కాంస్యం కోసం పోటీపడనున్నారు. మహిళల రికర్వ్ విభాగంలో హర్యానా ఆర్చర్ రిధి ఫోర్ తన జోరు కొనసాగిస్తూ ఫైనల్కు దూసుకెళ్లింది. ఆమె మలేషియా ఆర్చర్ను వరుస సెట్లలో ఓడించి స్వర్ణంపై కన్నేసింది. అయితే రికర్వ్ పురుషుల వ్యక్తిగత విభాగంలో భారత ఆర్చర్లు ఎవరూ కనీసం సెమీస్కు కూడా చేరలేకపోవడం ఆశ్చర్యపరిచింది. సుఖ్చైన్ సింగ్, దేవాంగ్ గుప్తా తమ పోరాటాన్ని మధ్యలోనే ముగించారు. మహిళల కాంపౌండ్లో తేజల్ సాళ్వే ఒక్కరే కాంస్య పతక పోరులో నిలిచారు.