ఆర్బీఐ వడ్డీ రేట్లు యథాతథం

అంతర్జాతీయంగా ముదురుతున్న భౌగోళిక రాజకీయ ఉద్రిక్తతలు, ముఖ్యంగా పశ్చిమాసియా సంక్షోభం భారత ఆర్థిక వ్యవస్థపై ప్రభావం చూపుతున్నాయి. ఈ నేపథ్యంలో బుధవారం ముగిసిన ద్రవ్య పరపతి కమిటీ సమావేశంలో కీలక నిర్ణయాలు తీసుకున్నట్లు ఆర్బీఐ గవర్నర్ సంజయ్ మల్హోత్రా ప్రకటించారు. దేశీయంగా ద్రవ్యోల్బణాన్ని అదుపులో ఉంచుతూనే, అంతర్జాతీయ ఒత్తిళ్లను తట్టుకునేందుకు వీలుగా రెపో రేటును ఎటువంటి మార్పు లేకుండా 5.25 శాతం వద్దే స్థిరంగా కొనసాగించాలని కమిటీ ఏకగ్రీవంగా నిర్ణయించింది.

దేశ ఆర్థిక వృద్ధి అంచనా తగ్గుదల

గత ఆర్థిక ఏడాది (2025-26)లో భారత ఆర్థిక వ్యవస్థ 7.6 శాతం వృద్ధిని నమోదు చేసినట్లు అంచనా వేయగా, ప్రస్తుత ఏడాది (2026-27)లో అది 6.9 శాతానికి పరిమితం కావచ్చని ఆర్బీఐ విశ్లేషించింది. పశ్చిమాసియాలో జరుగుతున్న యుద్ధం కారణంగా పెట్రోల్, డీజిల్ ధరలు పెరగడం, విదేశాల నుండి సరుకుల రవాణాలో ఆటంకాలు కలగడమే దీనికి ప్రధాన కారణం. ప్రస్తుత ఆర్థిక ఏడాదిలో మొదటి ఆరు నెలలు వృద్ధి కొంచెం తక్కువగా (6.7 శాతం -6.8 శాతం) ఉన్నా, ఆ తర్వాత ఆరు నెలల్లో (7.0 శాతం-7.2 శాతం) పుంజుకుంటుందని ఆర్‌బీఐ ఆశాభావం వ్యక్తం చేసింది.

ద్రవ్యోల్బణంపై యుద్ధ సెగ

జనవరి, ఫిబ్రవరి నెలల్లో ద్రవ్యోల్బణం 2.7 శాతం, 3.7 శాతంగా నమోదై లక్ష్యంలోపే ఉన్నప్పటికీ, మున్ముందు ధరల సెగ తప్పదని ఆర్బీఐ హెచ్చరించింది. ఇంధన ధరల పెంపుతో పాటు దిగుమతి చేసుకునే ముడి చమురు భారంతో ఈ ఏడాది సగటు ద్రవ్యోల్బణం 4.6 శాతానికి చేరవచ్చని అంచనా వేసింది. ముఖ్యంగా మూడో త్రైమాసికంలో ఇది గరిష్టంగా 5.2 శాతానికి పెరిగే అవకాశం ఉందని గవర్నర్ పేర్కొన్నారు. అయితే సామాన్యులకు ఊరటనిచ్చేలా సమీప కాలంలో ఆహార ధరల పరిస్థితి ఆశాజనకంగానే ఉంటుందని కమిటీ అభిప్రాయపడింది.

ఈఎంఐలపై పెరగని భారం

ఆర్బీఐ వడ్డీ రేట్లను (రెపో రేటు) మార్చకుండా స్థిరంగా ఉంచడం వల్ల సామాన్యులకు పెద్ద ఊరట లభించింది. దీనివల్ల తీసుకున్న గృహ, కారు రుణాలపై నెలనెలా కట్టే ఈఎంఐ భారం పెరగదు. అదేవిధంగా బ్యాంకులు ఇచ్చే ఇతర కీలక వడ్డీ రేట్లు (ఎస్డీఎఫ్ 5 శాతం, ఎంఎస్ఎఫ్ 5.50 శాతం) కూడా మునుపటి లాగే కొనసాగుతాయి.

భారత ఆర్థిక పునాదులు పటిష్టం

అంతర్జాతీయ ప్రతికూలతలు ఉన్నప్పటికీ, భారత్ తట్టుకోగలదని గవర్నర్ ధీమా వ్యక్తం చేశారు. గతంలో ఎదురైన సంక్షోభాల సమయం కంటే ప్రస్తుతం దేశం మెరుగైన స్థితిలో ఉందని, ఆర్థిక స్థితిస్థాపకత పటిష్టంగా ఉందని స్పష్టం చేశారు. అయితే అమెరికా డాలర్‌కు పెరుగుతున్న డిమాండ్ వల్ల ఇతర కరెన్సీల విలువ తగ్గడం, స్టాక్ మార్కెట్లలో అస్థిరత వంటి అంశాల పట్ల అప్రమత్తంగా ఉండాలని ఆయన సూచించారు.