ఆర్టీసీని ప్రైవేట్ పరం చేసే కుట్ర

తెలంగాణ ప్రభుత్వం రాష్ట్ర రోడ్డు రవాణా సంస్థ (టీజీఎస్ఆర్టీసీ) బస్సు ఛార్జీలను పెంచిన నేపథ్యంలో భారత రాష్ట్ర సమితి (బీఆర్ఎస్) నాయకులు గురువారం "చలో బస్ భవన్" నిరసన కార్యక్రమానికి పిలుపునిచ్చారు. ఈ నిరసనను అడ్డుకునేందుకు హైదరాబాద్‌లోని బస్ భవన్ వద్ద భారీగా పోలీసులను మోహరించారు. బీఆర్ఎస్ నాయకుడు తలసాని శ్రీనివాస్ యాదవ్ మాట్లాడుతూ, "బస్సు ఛార్జీల పెంపు వల్ల పేద, సామాన్య ప్రజలు తీవ్ర ఇబ్బందులు ఎదుర్కొంటున్నారు. పేదలకు ప్రజా రవాణా వ్యవస్థే ఆధారం. అయితే, ప్రభుత్వం దీనిని ప్రైవేటీకరణ చేసేందుకు ప్రయత్నిస్తోంది. దీనిని వ్యతిరేకిస్తూ మేం పోరాడుతున్నాం" అని ఏఎన్ఐతో అన్నారు.

ప్రభుత్వ అజాగ్రత్తతోనే ఈ నిర్ణయాలు: కేటీఆర్

ఇదే సందర్భంలో, బీఆర్ఎస్ వర్కింగ్ ప్రెసిడెంట్ కేటీ రామారావు (కేటీఆర్) తెలంగాణ ప్రభుత్వంపై తీవ్ర విమర్శలు గుప్పించారు. "ఈ ప్రభుత్వానికి పరిపాలన నడపడం తెలియదు. వారికి సర్కస్ నడపడమే తెలుసు. ఉదయం నన్ను గృహనిర్బంధంలో ఉంచి, తర్వాత విడుదల చేశారు. రాష్ట్రవ్యాప్తంగా మా నాయకులను అరెస్టు చేస్తున్నారు. ప్రభుత్వం ఏం చేయాలనుకుంటోందో అర్థం కావడం లేదు. ప్రభుత్వం తీసుకున్న అజాగ్రత్త నిర్ణయాల వల్ల పోలీసులు కూడా ఇబ్బంది పడుతున్నారు" అని కేటీఆర్ మీడియాతో అన్నారు.

ప్రజాస్వామ్యబద్ధంగా నిరసన తెలిపే వారిని అరెస్టు చేయడంపై కేటీఆర్ ఆగ్రహం వ్యక్తం చేశారు. "ఉచిత బస్సు సేవ వల్ల ఆర్టీసీకి నష్టాలు వచ్చాయంటే, ఆ నష్టాలను ప్రభుత్వం భరించాలి, సామాన్య ప్రజలపై భారం వేయడం సరికాదు" అని ఆయన అన్నారు.

బస్సు ఛార్జీల పెంపు సామాన్య, మధ్యతరగతి ప్రజలపై తీవ్ర ప్రభావం చూపుతుందని, ఈ నిర్ణయాన్ని వెనక్కి తీసుకోవాలని కేటీఆర్ డిమాండ్ చేశారు. "ఉచిత బస్సు సేవ వల్ల నష్టాలు వస్తాయని తెలిసినప్పుడు ఆ సేవను ఎందుకు ప్రవేశపెట్టారు? ఇప్పుడు ఆ నష్టాలకు సామాన్య ప్రజలు ఎందుకు బాధ్యత వహించాలి? ఆర్టీసీ ఎండీ ఈ నిర్ణయాన్ని వెనక్కి తీసుకోవాలని డిమాండ్ చేస్తున్నాం" అని ఆయన పేర్కొన్నారు.

ఇదిలా ఉండగా, మెహదీపట్నంలో బీఆర్ఎస్ నాయకుడు హరీష్ రావు బస్సులో ప్రయాణిస్తూ ప్రయాణీకులతో సంభాషించారు. గురువారం ఉదయం కేటీ రామారావును హైదరాబాద్‌లోని ఆయన నివాసంలో గృహనిర్బంధంలో ఉంచినట్లు తెలంగాణ పోలీసులు తెలిపారు. ఈ విషయంపై కేటీఆర్ ఎక్స్‌లో స్పందిస్తూ, "నేను కేవలం బస్సు ఎక్కి, ఆర్టీసీ ఎండీ కార్యాలయానికి వెళ్లి ఛార్జీల పెంపు నిర్ణయాన్ని ఉపసంహరించాలని లేఖ అందజేయాలనుకున్నాను. అందుకోసం నా నివాసం వద్ద ఇంతమంది పోలీసులను మోహరించారా? హైదరాబాద్‌లో పెరిగిపోతున్న నేరాలను అదుపు చేయడంలో ఇంత ఉత్సాహం చూపిస్తే బాగుండు" అని విమర్శించారు.

టీజీఎస్ఆర్టీసీ అక్టోబర్ 6 నుంచి నగర బస్సు ఛార్జీలను కనీసం రూ.10 పెంచిన విషయం తెలిసిందే. సిటీ ఆర్డినరీ, మెట్రో ఎక్స్‌ప్రెస్, ఈ-ఆర్డినరీ, ఈ-ఎక్స్‌ప్రెస్ సర్వీసుల్లో ప్రయాణించే ప్రయాణీకులు మొదటి మూడు దశలకు రూ.5, నాలుగో దశ నుంచి రూ.10 అదనంగా చెల్లించాల్సి ఉంటుంది. పెంచిన బస్ చార్జీలను వెంటనే తగ్గించాలని ఆందోళనలు సాగాయి. కొందరు బీఆర్ఎస్ పార్టీకి చెందిన మహిళా నేతలు ప్రభుత్వాన్ని దుమ్మెత్తి పోశారు. వారిని పోలీసులు అదుపులోిక తీసుకున్నారు.

ఉపఎన్నికల వేళ రాజకీయ డ్రామాలా?

జూబ్లీహిల్స్ ఉప ఎన్నికల వేళ చార్జీల పెంపు అంశం బీఆర్ఎస్ పార్టీకి అనుకూలంగా మారింది. తాము ఆర్టీసీ ప్రయోజనాలను దృష్టిలో ఉంచుకొని, ఎలక్ట్రిక్ వాహనాలను పెంపొందించాలనే ఉద్దేశ్యంతోనే స్వల్పంగా చార్జీలు పెంచినట్టు కాంగ్రెస్ చెప్పుకుంటుంది. అయితే బీఆర్ఎస్ మాత్రం ఈ అంశాన్ని రాజకీయంగా వాడుకుంటోంది.