‘ఆపరేషన్ సిందూర్’పై పాక్ ప్రచారాన్ని ఖండించిన భారత్
భారత భూభాగంపై, ముఖ్యంగా పంజాబ్ సరిహద్దుల్లోని సైనిక స్థావరాలపై దాడులు చేశామంటూ పాకిస్థాన్ చేస్తున్న ప్రకటనలను భారత ప్రభుత్వం, సైన్యం తీవ్రంగా ఖండించాయి. 'ఆపరేషన్ సిందూర్' పేరుతో భారత సైనిక స్థావరాలను ధ్వంసం చేశామని పాక్ చేస్తున్న వాదనల్లో ఎలాంటి నిజం లేదని స్పష్టం చేశాయి.
తప్పుడు శాటిలైట్ చిత్రాలతో మాయాజాలం
పాకిస్థాన్ కొన్ని తప్పుడు, ధృవీకరించని శాటిలైట్ చిత్రాలను సోషల్ మీడియాలో సర్క్యులేట్ చేస్తూ, భారత సైనిక స్థావరాలపై దాడులు జరిగినట్లు నమ్మించే ప్రయత్నం చేస్తోంది. అయితే, భారత ఆర్మీ వర్గాలు ఈ చిత్రాలను విశ్లేషించి, అవి పూర్తిగా తప్పుదోవ పట్టించేలా ఉన్నాయని తేల్చి చెప్పాయి. స్వతంత్ర సంస్థలు కూడా ఆ ప్రాంతాలను పరిశీలించగా, అక్కడ ఎలాంటి విధ్వంసం జరగలేదని స్పష్టమైంది.
.
భారత సైనిక స్థావరాలు సురక్షితం
పంజాబ్లోని సైనిక స్థావరాలపై దాడులు జరిగాయన్న పాక్ ఆరోపణల్లో ఎలాంటి వాస్తవం లేదని, భారత సైనిక స్థావరాలు సురక్షితంగా ఉన్నాయని భారత వర్గాలు తెలిపాయి. పాక్ పేర్కొన్న ప్రాంతాల్లో పేలుడు ప్రభావాలుగానీ, భవనాలకు నష్టం గానీ, భౌతిక విధ్వంసానికి సంబంధించిన ఆనవాళ్లు గానీ ఎక్కడా లేవని వెల్లడించాయి. తప్పుడు సమాచారాన్ని, వక్రీకరించిన చిత్రాలను ప్రచారం చేయడం ద్వారా పాకిస్థాన్ అంతర్జాతీయ సమాజాన్ని మభ్యపెట్టే ప్రయత్నం చేస్తోందని భారత సైన్య వర్గాలు మండిపడ్డాయి.
అసత్య ప్రచారాల పట్ల అప్రమత్తంగా ఉండాలని సూచన
ఈ తరహా అసత్య ప్రచారాల పట్ల ప్రజలు, అంతర్జాతీయ వేదికలు అప్రమత్తంగా ఉండాలని భారత వర్గాలు సూచించాయి. సమాచారాన్ని కేవలం వాస్తవాల ప్రాతిపదికన మాత్రమే నమ్మాలని, ధ్రువీకరణ లేని చిత్రాలు, కథనాలకు ప్రాధాన్యత ఇవ్వవద్దని కోరాయి. దేశ భద్రత విషయంలో భారత సైన్యం పూర్తి స్థాయిలో అప్రమత్తంగా ఉందని, అన్ని సైనిక స్థావరాలు సురక్షితంగా ఉన్నాయని స్పష్టం చేశాయి.
సరిహద్దుల్లో పాకిస్థాన్ ఎటువంటి కవ్వింపు చర్యలకు పాల్పడినా ధీటుగా సమాధానం చెప్పేందుకు తాము సిద్ధంగా ఉన్నామని భారత్ హెచ్చరించింది. సోషల్ మీడియా వేదికగా తప్పుడు సమాచారంతో అసత్య ప్రచారాలు చేస్తూ.. ఇరు దేశాల మధ్య ఉద్రిక్తతలను పెంచే ప్రయత్నాలను మానుకోవాలని పాక్కు గట్టి సందేశం పంపింది.