ఆటో డెబిట్ చలాన్లపై కాంగ్రెస్ ద్వంద్వ వైఖరి: రాంచందర్ రావు
తెలంగాణలో ట్రాఫిక్ నిబంధనలు ఉల్లంఘించిన వారిపై జరిమానాలను ఆటో–డెబిట్ విధానంలో వసూలు చేయాలన్న ముఖ్యమంత్రి ఏ. రేవంత్ రెడ్డి ప్రతిపాదనపై తెలంగాణ బీజేపీ రాష్ట్ర అధ్యక్షుడు ఎన్. రాంచందర్ రావు తీవ్ర విమర్శలు చేశారు. ఈ ప్రతిపాదన పౌరుల గోప్యతకు భంగం కలిగించడమే కాకుండా కాంగ్రెస్ పార్టీ ద్వంద్వ వైఖరిని బయటపెడుతోందని ఆయన ఆరోపించారు.
కాంగ్రెస్ ద్వంద్వ వైఖరిపై బీజేపీ విమర్శలు
మంగళవారం హైదరాబాద్లో మీడియాతో మాట్లాడిన రాంచందర్ రావు, ట్రాఫిక్ నిబంధనల ఉల్లంఘనలను బీజేపీ సమర్థించదు. నిబంధనలు అతిక్రమించిన వారికి జరిమానాలు విధించాల్సిందే. అయితే ముఖ్యమంత్రి ప్రతిపాదిస్తున్న ఆటో–డెబిట్ విధానం తీవ్రమైన ఆందోళనలకు దారి తీస్తోందని అన్నారు. ట్రాఫిక్ నిబంధనలు ఉల్లంఘించిన వారి బ్యాంక్ ఖాతాలను ప్రభుత్వ శాఖలతో అనుసంధానం చేసి, నేరుగా జరిమానా మొత్తాన్ని కట్ చేయడం గోప్యత హక్కుకు విరుద్ధమని ఆయన అభిప్రాయపడ్డారు.
కేంద్ర ప్రభుత్వం ప్రవేశపెట్టిన ‘సంచార్ సాథి’ యాప్ను కాంగ్రెస్ పార్టీ గోప్యతకు భంగం కలిగిస్తుందంటూ వ్యతిరేకించిందని గుర్తు చేసిన రాంచందర్ రావు, ఇప్పుడు అదే తరహా విధానాన్ని రాష్ట్రంలో అమలు చేయాలని ప్రయత్నించడం కాంగ్రెస్ పార్టీ కపటత్వానికి నిదర్శనమన్నారు. మన బ్యాంక్ ఖాతాలు, ఆర్థిక సమాచారం, వ్యక్తిగత గోప్యత అన్నీ ప్రమాదంలో పడే అవకాశం ఉంది. ఇది డిజిటల్ నిఘా వ్యవస్థను ప్రోత్సహించినట్లే అని వ్యాఖ్యానించారు. ఈ విధానంతో ప్రజల్లో భయాందోళనలు పెరుగుతాయని, ప్రజాస్వామ్య వ్యవస్థలో ఇలాంటి నిర్ణయాలు తీసుకునే ముందు విస్తృత చర్చ జరగాలని ఆయన సూచించారు.
ముఖ్యమంత్రి రేవంత్ రెడ్డి ప్రతిపాదన ఏమిటి?
ఇదిలా ఉండగా, ముఖ్యమంత్రి రేవంత్ రెడ్డి సోమవారం ట్రాఫిక్ భద్రతపై కఠిన వైఖరి అవలంబించాలని పోలీసు శాఖను ఆదేశించారు. మద్యం సేవించి వాహనం నడిపే కేసుల్లో జరిమానాలపై ఎలాంటి రాయితీలు ఇవ్వరాదని స్పష్టంచేశారు. సంవత్సరాంతంలో జరిమానాలపై డిస్కౌంట్లు ఇవ్వడం వల్ల ప్రజలు ట్రాఫిక్ నిబంధనలను తేలికగా తీసుకుంటున్నారని ఆయన అన్నారు.
వాహనాల నమోదు సమయంలోనే యజమానులతో అనుసంధానం చేసి, ట్రాఫిక్ నిబంధనలు ఉల్లంఘించినప్పుడు ఆటో–డెబిట్ విధానంలో జరిమానా నేరుగా ఖాతా నుంచి కట్ చేసే వ్యవస్థను తీసుకురావాలని సీఎం సూచించారు. పోలీసులు మద్యం మత్తులో డ్రైవింగ్ చేసే వారిపై కఠిన చర్యలు తీసుకోవాలి. చలాన్లు విధించిన తర్వాత వాటిని మాఫీ చేయడం వల్ల ప్రజల్లో నిర్లక్ష్యం పెరుగుతోంది. ఇకపై ఎలాంటి మినహాయింపులు ఉండకూడదు అని ముఖ్యమంత్రి స్పష్టం చేశారు.
ఈ నేపథ్యంలో ఆటో–డెబిట్ ప్రతిపాదనపై రాజకీయ వర్గాల్లో తీవ్ర చర్చ మొదలైంది. ఒకవైపు ట్రాఫిక్ నియంత్రణ, రోడ్డు భద్రత పేరుతో కఠిన చర్యలు అవసరమని ప్రభుత్వం వాదిస్తుండగా, మరోవైపు గోప్యత, వ్యక్తిగత హక్కుల పరిరక్షణ అంశాలను ప్రతిపక్షాలు లేవనెత్తుతున్నాయి.