ఆగస్టు 1న భోగాపురం అంతర్జాతీయ విమానాశ్రయాన్ని ప్రారంభించనున్న ప్రధాని మోడీ

ఆంధ్రప్రదేశ్‌లోని భోగాపురం అంతర్జాతీయ విమానాశ్రయాన్ని ప్రధాని నరేంద్ర మోడీ ఆగస్టు 1న ప్రారంభించనున్నట్లు రాష్ట్ర ప్రభుత్వం శనివారం వెల్లడించింది. ఉత్తరాంధ్ర అభివృద్ధికి కీలక మైలురాయిగా భావిస్తున్న ఈ ప్రాజెక్టు ప్రారంభోత్సవాన్ని అత్యంత వైభవంగా నిర్వహించేందుకు ప్రభుత్వం ఏర్పాట్లు చేపట్టింది.

రాష్ట్ర ప్రభుత్వ అధికారిక ప్రకటన ప్రకారం, 2014లో అప్పటి టీడీపీ ప్రభుత్వ హయాంలో ఈ ప్రాజెక్టుకు శ్రీకారం చుట్టగా, ప్రస్తుతం అధికారంలో ఉన్న ఎన్డీయే కూటమి ప్రభుత్వం పనులను వేగవంతం చేసి రెండేళ్లలో పూర్తి చేసింది. ఆగస్టు 1న ప్రధాని చేతుల మీదుగా విమానాశ్రయాన్ని ప్రజలకు అంకితం చేయనున్నట్లు వెల్లడించింది.

ఈ సందర్భంగా ముఖ్యమంత్రి నారా చంద్రబాబు నాయుడు మాట్లాడుతూ, భోగాపురం అంతర్జాతీయ విమానాశ్రయం ఉత్తరాంధ్ర ఆర్థిక ముఖచిత్రాన్ని పూర్తిగా మార్చివేసే ప్రాజెక్టుగా నిలుస్తుందని అన్నారు. ఈ విమానాశ్రయం వల్ల కొత్త పెట్టుబడులు, ఉపాధి అవకాశాలు పెరగడంతో పాటు ప్రాంత సామాజిక, ఆర్థిక పరిస్థితుల్లో గణనీయమైన మార్పు వస్తుందని ఆయన పేర్కొన్నారు.

ప్రధాని పాల్గొనే ప్రారంభోత్సవం చారిత్రాత్మకంగా నిలిచేలా అన్ని ఏర్పాట్లు చేయాలని అధికారులను ముఖ్యమంత్రి ఆదేశించారు. ఉత్తరాంధ్ర గిరిజన సంస్కృతి, సంప్రదాయ కళలు, హస్తకళలను ప్రతిబింబించేలా స్వాగత ఏర్పాట్లు ఉండాలని సూచించారు. భోగాపురం విమానాశ్రయం ప్రారంభం ఉత్తరాంధ్రలోని ప్రతి కుటుంబం, ప్రతి పౌరుడు గర్వపడే సందర్భమని ఆయన అన్నారు.

విమానాశ్రయం కేవలం మెరుగైన రవాణా సౌకర్యాలకే పరిమితం కాకుండా పర్యాటకం, పారిశ్రామిక అభివృద్ధి, ఆర్థిక వృద్ధికి ప్రధాన చోదకశక్తిగా నిలుస్తుందని చంద్రబాబు పేర్కొన్నారు. శంషాబాద్ అంతర్జాతీయ విమానాశ్రయం హైదరాబాద్, పరిసర ప్రాంతాల అభివృద్ధికి ఎంతగానో దోహదపడినట్లే, భోగాపురం విమానాశ్రయం విశాఖపట్నం ఆర్థిక ప్రాంత అభివృద్ధిలో కీలక పాత్ర పోషిస్తుందని చెప్పారు.

సాగునీటి ప్రాజెక్టులు, జాతీయ రహదారులు, నౌకాశ్రయాలు, విమానాశ్రయాలు, పర్యాటక మౌలిక సదుపాయాల అభివృద్ధితో ఉత్తరాంధ్ర అపూర్వమైన అభివృద్ధి దిశగా పయనిస్తోందని ప్రభుత్వం పేర్కొంది. విమానాశ్రయంలోని ప్రతి అంశంలోనూ ఆంధ్రప్రదేశ్ గొప్ప సంస్కృతి, కళా వారసత్వం ప్రతిబింబించేలా చర్యలు తీసుకోవాలని ముఖ్యమంత్రి అధికారులను ఆదేశించారు.