ఆంధ్ర విద్యుత్ రంగానికి గేమ్చేంజర్గా పోలవరం జలవిద్యుత్ ప్రాజెక్ట్: ఏపీ ప్రభుత్వం
ఆంధ్రప్రదేశ్ రాష్ట్ర విద్యుత్ అవసరాలను తీర్చిదిద్దడమే కాకుండా విద్యుత్ భద్రతను మరింత బలోపేతం చేసే దిశగా పోలవరం హైడ్రో ఎలక్ట్రిక్ ప్రాజెక్టు సిద్ధమవుతోంది. రాష్ట్ర ప్రయోజనాల దృష్ట్యా అత్యంత కీలకమైన ఈ ప్రాజెక్టు ద్వారా తక్కువ ధరకే నాణ్యమైన విద్యుత్తును అందించవచ్చని ప్రభుత్వం శనివారం ఒక అధికారిక ప్రకటనలో వెల్లడించింది. అత్యాధునిక సాంకేతిక పరిజ్ఞానంతో రూపుదిద్దుకుంటున్న ఈ ప్రాజెక్టు రాబోయే రోజుల్లో రాష్ట్ర ఆర్థిక వ్యవస్థకు వెన్నుముకగా నిలవనుంది.
ఈ భారీ జలవిద్యుత్ ప్రాజెక్టు మొత్తం 960 మెగావాట్ల స్థాపిత సామర్థ్యాన్ని కలిగి ఉంటుంది. ఇందులో భాగంగా ఒక్కొక్కటి 80 మెగావాట్ల సామర్థ్యం గల 12 విద్యుత్ ఉత్పత్తి యూనిట్లను ప్రభుత్వం ఏర్పాటు చేస్తోంది. కాగా దేశంలోనే అతిపెద్దవైన వర్టికల్ కాప్లాన్ టర్బైన్లను ఇక్కడ వినియోగిస్తుండటం ఈ ప్రాజెక్టు ప్రత్యేకత. నదీ ప్రవాహంలో వచ్చే హెచ్చుతగ్గులకు అనుగుణంగా అధిక సామర్థ్యంతో విద్యుత్ ఉత్పత్తి చేసేలా ఈ టర్బైన్లను రూపొందించారు. ఒక్కో యూనిట్ నుంచి నిమిషానికి 100 రౌండ్ల వేగంతో 331 క్యూబిక్ మీటర్ల నీటి ప్రవాహం ద్వారా విద్యుత్ ఉత్పత్తి జరగనుంది.
అయితే ప్రాజెక్టు పూర్తిస్థాయిలో అందుబాటులోకి వస్తే ఏడాదికి సుమారు 2,500 మిలియన్ యూనిట్ల విద్యుత్ ఉత్పత్తి అవుతుందని అంచనా. రోజుకు గరిష్టంగా 23 మిలియన్ యూనిట్ల ఉత్పత్తి లక్ష్యంగా పెట్టుకోగా ఇందుకు సుమారు 12 టీఎంసీల నీటిని వినియోగించనున్నారు. యూనిట్ విద్యుత్ సగటు ధర రూ.4.57గా ఉండటంతో ఇతర రాష్ట్రాల నుంచి అధిక ధరకు విద్యుత్ కొనుగోలు చేసే భారం రాష్ట్రంపై తప్పుతుంది. దీనివల్ల ప్రభుత్వానికి ఏడాదికి రూ.1,100 కోట్లకు పైగా ఆర్థిక లాభం చేకూరడమే కాకుండా సామాన్య వినియోగదారులపై విద్యుత్ ఛార్జీల భారం స్థిరంగా ఉండే అవకాశం ఉంది.
మరోవైపు ఈ మెగా ప్రాజెక్టు నిర్మాణంలో దిగ్గజ సంస్థలు భాగస్వాములవుతున్నాయి. విద్యుత్ ఉత్పత్తికి అవసరమైన టర్బైన్లు, జనరేటర్లను భారత ప్రభుత్వ రంగ సంస్థ 'భెల్' సరఫరా చేస్తుండగా సబ్స్టేషన్ నిర్వహణ కోసం జర్మనీకి చెందిన 'సీమెన్స్' సంస్థ గ్యాస్-ఇన్సులేటెడ్ వ్యవస్థలను అందిస్తోంది. ఇక గోదావరి డెల్టాకు సాగునీటి కోసం విడుదల చేసే నీటిని కూడా విద్యుత్ ఉత్పత్తికి వాడుకునేలా దీనిని శాస్త్రీయంగా డిజైన్ చేశారు. దీనివల్ల మాన్సూన్ సీజన్లో వృథా అయ్యే వరద నీటిని గ్రిడ్ బలోపేతానికి సమర్థవంతంగా వినియోగించుకోవచ్చు.
ప్రస్తుతం సివిల్, ఎలక్ట్రో-మెకానికల్ పనులు శరవేగంగా సాగుతున్నాయి. అధికారుల ప్రణాళిక ప్రకారం 2027 జూలై నాటికి అంటే గోదావరి పుష్కరాల కంటే ముందుగానే కనీసం మూడు యూనిట్లను ప్రారంభించాలని ప్రభుత్వం లక్ష్యంగా పెట్టుకుంది. మిగిలిన పనులన్నీ పూర్తి చేసి 2028 జనవరి నాటికి ప్రాజెక్టును పూర్తిస్థాయిలో జాతికి అంకితం చేసేందుకు ఏర్పాట్లు జరుగుతున్నాయి. గోదావరి నదిపై రామయ్యపేట సమీపంలో నిర్మిస్తున్న ఈ బహుళ ప్రయోజన ప్రాజెక్టు కేవలం విద్యుత్తుకే పరిమితం కాకుండా 4.3 లక్షల హెక్టార్లకు సాగునీరు, 611 గ్రామాలకు తాగునీరు అందించడంతో పాటు కృష్ణా నదికి 80 టీఎంసీల నీటి మళ్లింపులో కీలక పాత్ర పోషించనుంది.