ఆంధ్రప్రదేశ్ రాజ్ భవన్ పేరు 'లోక్ భవన్' గా మార్పు
ఆంధ్రప్రదేశ్లో గవర్నర్ అధికారిక నివాసం పేరును 'రాజ్భవన్' నుండి 'లోక్ భవన్'గా అధికారికంగా మార్చారు. గవర్నర్ ఎస్. అబ్దుల్ నజీర్ ఆమోదం పొందిన తరువాత, గవర్నర్ ప్రత్యేక ప్రధాన కార్యదర్శి జి.అనంత రాము ఈ మార్పును ధృవీకరిస్తూ ఒక నోటిఫికేషన్ విడుదల చేశారు. ఇకపై ఈ నివాసాన్ని 'లోక్ భవన్, ఆంధ్రప్రదేశ్' అని పిలుస్తారు.
ఈ నిర్ణయాన్ని కేంద్ర హోం మంత్రిత్వ శాఖ ఆదేశాల మేరకు దేశవ్యాప్తంగా అమలు చేస్తున్నారు. ఆంధ్రప్రదేశ్తో సహా ఇప్పటివరకు తెలంగాణ, పశ్చిమ బెంగాల్, తమిళనాడు, కేరళ, ఒడిశా, గుజరాత్, అస్సాం, ఉత్తరాఖండ్, త్రిపుర, కర్ణాటక, మహారాష్ట్ర వంటి మొత్తం తొమ్మిది రాష్ట్రాలు, లడఖ్ కేంద్ర పాలిత ప్రాంతంలో గవర్నర్ నివాసాల పేర్లను ‘లోక్ భవన్/లోక్ నివాస్’లుగా మార్చారు.
ఈ పేరు మార్పుకు ప్రధాన కారణం వలస పాలన గుర్తులను తొలగించడం, ప్రజాస్వామ్య స్ఫూర్తిని ప్రతిబింబించడం. ‘రాజ్' అనే పదం రాజుల పాలన లేదా బ్రిటిష్ రాజ్ను సూచిస్తుంది, ఇది ప్రజాస్వామ్య విలువల స్ఫూర్తికి విరుద్ధమని భావించారు. 'లోక్' అంటే ప్రజలు (జనత) కాబట్టి, 'లోక్ భవన్' అంటే ప్రజల భవనం అని అర్థం. గవర్నర్ నివాసం అనేది కేవలం పాలకుడి భవనం కాదని, అది ప్రజలకు చెందినది అనే సందేశాన్ని ఈ మార్పు ద్వారా ప్రభుత్వం ఇవ్వాలని లక్ష్యంగా పెట్టుకుంది.
ఈ పేరు మార్పు అనేది పూర్తిగా చట్టబద్ధమైనదే. భారత రాజ్యాంగంలో గవర్నర్ పదవి గురించి ప్రస్తావన ఉన్నప్పటికీ, ఆయన నివాసాన్ని 'రాజ్భవన్' అనే పిలవాలని ఎక్కడా తప్పనిసరి చేయలేదు. ఇది కేవలం భవనం పేరు కాబట్టి, ఇది రాష్ట్ర ప్రభుత్వం, గవర్నర్ పరిపాలనాపరమైన నిర్ణయం కిందకు వస్తుంది. దీనికోసం రాజ్యాంగ సవరణ చేయాల్సిన అవసరం లేదు. ఈ పరిపాలనా నిర్ణయం గవర్నర్ పదవి హోదా, అధికారాలు లేదా నిబంధనలలో ఎలాంటి మార్పునూ తీసుకురాదు.