అస్సాంలో మొదలైన ఎన్నికల వేడి: సీఎం సహా కీలక నేతల నామినేషన్లు

అస్సాం అసెంబ్లీ ఎన్నికల నేపథ్యంలో రాజకీయ వాతావరణం ఉత్కంఠభరితంగా మారింది. ముఖ్యమంత్రి హిమంత బిశ్వ శర్మతో పాటు అధికార బీజేపీ, ప్రతిపక్ష ఇండియన్ నేషనల్ కాంగ్రెస్, ఇతర ప్రాంతీయ పార్టీలకు చెందిన పలువురు కీలక అభ్యర్థులు మార్చి 20న తమ నామినేషన్ పత్రాలను దాఖలు చేశారు. రాష్ట్రవ్యాప్తంగా శుక్రవారం రాజకీయంగా అత్యంత కీలకంగా మారింది. .

జలుక్బారి నియోజకవర్గం నుంచి పోటీ చేస్తున్నసిఎం హిమంత బిశ్వ శర్మ గువాహటిలోని కమ్రూప్ (మెట్రోపాలిటన్) జిల్లా ఎన్నికల కార్యాలయంలో నామినేషన్ దాఖలు చేశారు. ఈ సందర్భంగా ఖానాపారా వెటర్నరీ ఫీల్డ్ నుంచి హెంగ్రాబారి వరకు సుమారు 5.6 కిలోమీటర్ల భారీ ర్యాలీ నిర్వహించారు. ఈ ర్యాలీలో పార్టీ శ్రేణులు, అభిమానులు పెద్ద సంఖ్యలో పాల్గొన్నారు.

సోషల్ మీడియా వేదిక ఎక్స్‌లో స్పందించిన శర్మ, తన నామినేషన్ ర్యాలీలో ప్రజలు పాల్గొనాలని ముందుగానే పిలుపునిచ్చారు. ప్రజల ఆశీర్వాదాలు తనకు శక్తినిస్తాయని, అస్సాం ప్రజలు అప్పగించిన బాధ్యతను మరింత సమర్థంగా నిర్వహించేందుకు ప్రేరణ కలిగిస్తాయని పేర్కొన్నారు. ఈ సందేశం ద్వారా ఆయన తన ప్రచారానికి శుభారంభం పలికారు.

హిమంత బిశ్వ శర్మ రాజకీయ ప్రస్థానం జలుక్బారి నియోజకవర్గంతో సుదీర్ఘంగా కొనసాగుతోంది. 1996లో తొలిసారి పోటీ చేసి భృగు కుమార్ ఫుకన్ చేతిలో ఓటమి పాలైన ఆయన, 2001లో అదే స్థానాన్ని గెలుచుకుని అప్పటి నుంచి వరుస విజయాలతో తన పట్టు నిలబెట్టుకున్నారు. ఈసారి గెలిస్తే ఆయనకు ఇది వరుసగా ఆరో విజయం అవుతుంది.

ఇదే సమయంలో ప్రతిపక్ష నాయకుడు దేబబ్రత సైకియా నాజిరా నియోజకవర్గం నుంచి నామినేషన్ దాఖలు చేయనున్నారు. 2011 నుంచి ఆయన ఈ స్థానాన్ని ప్రాతినిధ్యం వహిస్తున్నారు. ఈ నియోజకవర్గం ఆయన కుటుంబానికి రాజకీయంగా కీలకమైనది, ఎందుకంటే ఆయన తండ్రి మాజీ సీఎం హితేశ్వర్ సైకియా, తల్లి హేమోప్రవా సైకియా కూడా ఇదే ప్రాంతం నుంచి గెలిచారు.

ఇక కాంగ్రెస్ సీనియర్ నేత రిపున్ బోరా బర్చల్లా నుంచి, అస్సాం జాతీయ పరిషత్ అధ్యక్షుడు లురింజ్యోతి గోగోయ్ ఖోవాంగ్ నుంచి, రైజోర్ దల్ నేత అఖిల్ గోగోయ్ శివసాగర్ నుంచి నామినేషన్లు దాఖలు చేశారు. నామినేషన్లకు చివరి తేదీ మార్చి 23 కాగా, ఏప్రిల్ 9న పోలింగ్ జరగనుంది. మే 4న ఓట్ల లెక్కింపు జరగనుండగా, అస్సాం రాజకీయ భవిష్యత్తును నిర్ణయించే కీలక ఎన్నికలుగా ఇవి నిలవనున్నాయి.