అస్సాంలో అమిత్ షా రెండు రోజుల పర్యటన: అభివృద్ధి, భద్రత లక్ష్యంగా కీలక అడుగులు

కేంద్ర హోంమంత్రి అమిత్ షా రెండు రోజుల పర్యటన నిమిత్తం శుక్రవారం (ఫిబ్రవరి 20, 2026) అస్సాం చేరుకున్నారు. సరిహద్దు ప్రాంతాలలో మౌలిక సదుపాయాల కల్పన, స్థానికుల జీవనోపాధిని మెరుగుపరచడం రాష్ట్ర భద్రతా వ్యవస్థను బలోపేతం చేయడం ఈ పర్యటన ప్రధాన ఉద్దేశ్యం. అస్సాం ముఖ్యమంత్రి హిమంత బిస్వా శర్మ ఇతర ఉన్నతాధికారులు ఆయనకు విమానాశ్రయంలో ఘనస్వాగతం పలికారు.

పర్యటనలో భాగంగా అమిత్ షా కాచార్ జిల్లాలోని నతన్‌పూర్ గ్రామంలో 'వైబ్రెంట్ విలేజెస్ ప్రోగ్రామ్-II' ను అధికారికంగా ప్రారంభించారు. సుమారు రూ. 6,839 కోట్ల బడ్జెట్‌తో రూపొందిన ఈ కేంద్ర ప్రభుత్వ పథకం, సరిహద్దు గ్రామాలను అభివృద్ధి చేయడమే కాకుండా, అక్కడి ప్రజలను దేశ భద్రతలో భాగస్వాములను చేయడం లక్ష్యంగా పెట్టుకుంది. ఈ పథకం ద్వారా సరిహద్దు గ్రామాల నుండి వలసలను నిరోధించి, వాటిని అన్ని సౌకర్యాలతో కూడిన మోడల్ గ్రామాలుగా తీర్చిదిద్దుతారు.

పథకం ప్రారంభానికి ముందు షా భారత్-బంగ్లాదేశ్ సరిహద్దులోని నతన్‌పూర్ బోర్డర్ అవుట్‌పోస్ట్ను సందర్శించారు. అక్కడ సరిహద్దు భద్రతా దళం అధికారులతో సమావేశమై, భద్రతా పరిస్థితులు సరిహద్దు కంచె నిర్మాణ పురోగతిని సమీక్షించారు. సరిహద్దు గ్రామాల ప్రజలు దేశానికి 'కళ్ళు, చెవుల' వంటి వారని, వారు చొరబాట్లు, సరిహద్దు నేరాలను అరికట్టడంలో కీలక పాత్ర పోషించాలని ఈ సందర్భంగా ఆయన పిలుపునిచ్చారు.

బరాక్ వ్యాలీలో భారీ బహిరంగ సభ

నతన్‌పూర్‌లో ఏర్పాటు చేసిన భారీ బహిరంగ సభలో అమిత్ షా ప్రసంగించారు. అస్సాం అభివృద్ధికి కేంద్ర ప్రభుత్వం కట్టుబడి ఉందని, ముఖ్యంగా బరాక్ వ్యాలీ ప్రాంతం గతంలో ఎదుర్కొన్న వివక్షను ప్రస్తుత డబుల్ ఇంజిన్ సర్కార్ రూపుమాపిందని పేర్కొన్నారు. ఈ సభ ద్వారా అస్సాంలో రాబోయే అసెంబ్లీ ఎన్నికలకు బీజేపీ తరపున సమరశంఖం పూరించినట్లు రాజకీయ విశ్లేషకులు భావిస్తున్నారు.

అస్సాంలోని కాచార్ జిల్లా నతన్‌పూర్ వద్ద కేంద్ర హోం, సహకార శాఖ మంత్రి అమిత్ షా, ముఖ్యమంత్రి హిమంత బిస్వా శర్మతో కలిసి అస్సాం రాష్ట్ర గ్రామీణ జీవనోపాధి మిషన్ ఆధ్వర్యంలో ఏర్పాటు చేసిన 20 స్వయం సహాయక బృందాల స్టాళ్లను సందర్శించి, అక్కడ ప్రదర్శించిన స్వదేశీ ఉత్పత్తులను ఆసక్తిగా పరిశీలించారు. ఈ సందర్భంగా స్వయం సహాయక బృందాల సభ్యులతో ముచ్చటించిన ఆయన, వారిలోని కృషిని, వ్యాపార స్ఫూర్తిని మెచ్చుకోవడమే కాకుండా, స్థిరమైన జీవనోపాధిని కల్పించడంలో అస్సాం ప్రభుత్వం సాధిస్తున్న ప్రగతిని ప్రత్యేకంగా అభినందించారు.

పొరుగు రాష్ట్రం త్రిపుర సందర్శన

శుక్రవారం మధ్యాహ్నం అస్సాం కార్యక్రమాలు ముగించుకున్న హోంమంత్రి, ప్రత్యేక విమానంలో త్రిపుర రాజధాని అగర్తలాకు వెళ్లారు. అక్కడ కొన్ని కీలక సమావేశాల్లో పాల్గొన్న అనంతరం తిరిగి సాయంత్రానికి గౌహతి చేరుకున్నారు. ఒకే రోజు రెండు రాష్ట్రాలలో పర్యటించడం ద్వారా ఈశాన్య రాష్ట్రాలపై కేంద్రం చూపిస్తున్న ప్రత్యేక శ్రద్ధను ఆయన చాటిచెప్పారు.

సిఆర్పీఎఫ్ వార్షిక దినోత్సవ వేడుకలు

పర్యటనలో రెండో రోజైన శనివారం (ఫిబ్రవరి 21), గువహటిలోని అర్జున్ భోగేశ్వర్ బారువా స్పోర్ట్స్ కాంప్లెక్స్‌లో జరగనున్న 87వ సిఆర్పీఎఫ్ (సెంట్రల్ రిజర్వ్ పోలీస్ ఫోర్స్) వార్షిక దినోత్సవ పరేడ్‌లో ఆయన ముఖ్య అతిథిగా పాల్గొంటారు. ఈశాన్య భారత దేశంలో సిఆర్పీఎఫ్ వార్షిక వేడుకలు జరగడం ఇదే తొలిసారి. ఈ వేడుకల్లో భాగంగా ఆయుధ ప్రదర్శన, దేశంలోని వివిధ సమస్యాత్మక ప్రాంతాలలో సిఆర్పీఎఫ్ నిర్వహిస్తున్న ఆపరేషన్ల గురించి ప్రదర్శనలు ఉండనున్నాయి.

పోలీస్ మౌలిక సదుపాయాలకు శంకుస్థాపన

భద్రతా దళాల బలోపేతంలో భాగంగా సోనాపూర్ సమీపంలోని కసుటోలి వద్ద 10వ అస్సాం పోలీస్ బెటాలియన్ కొత్త క్యాంపస్‌కు అమిత్ షా శంకుస్థాపన చేస్తారు. గతంలో అక్రమ ఆక్రమణల నుండి విముక్తి పొందిన స్థలంలో ఈ క్యాంపస్‌ను నిర్మిస్తుండటం విశేషం. ఇది అస్సాం పోలీసుల సామర్థ్యాన్ని పెంచడమే కాకుండా, ఆ ప్రాంతంలో శాంతిభద్రతల పరిరక్షణకు దోహదపడుతుందని ప్రభుత్వం భావిస్తోంది.

ఎన్నికల ప్రచారానికి ఊపు

అస్సాంలో మార్చి-ఏప్రిల్ నెలల్లో అసెంబ్లీ ఎన్నికలు జరిగే అవకాశం ఉన్న నేపథ్యంలో, అమిత్ షా పర్యటన రాజకీయంగా అత్యంత ప్రాధాన్యత సంతరించుకుంది. గత రెండు నెలల్లో ఆయన రాష్ట్రంలో పర్యటించడం ఇది మూడవసారి. ముఖ్యమంత్రి హిమంత బిస్వా శర్మ నేతృత్వంలో రాష్ట్ర ప్రభుత్వం చేపట్టిన అభివృద్ధి పనులను ప్రశంసిస్తూనే, వరుసగా మూడవసారి అస్సాంలో అధికారాన్ని కైవసం చేసుకోవడమే లక్ష్యంగా బీజేపీ శ్రేణులకు ఆయన దిశా నిర్దేశం చేయనున్నారు.