అసెంబ్లీలో 'గాంధీ వర్సెస్ గాడ్సే'
తెలంగాణ శాసనసభ బడ్జెట్ సమావేశాలు మంగళవారం రాజకీయ సెగలతో అట్టుడికాయి. మహాత్మా గాంధీ హత్య, నాథూరాం గాడ్సే నేపథ్యంపై అధికార కాంగ్రెస్, ప్రతిపక్ష బీజేపీ సభ్యుల మధ్య తీవ్రస్థాయిలో వాగ్వాదం చోటుచేసుకుంది. ఆర్ఎస్ఎస్ సంస్థకు గాడ్సేకు ఉన్న సంబంధంపై ఇరుపక్షాలు పరస్పర ఆరోపణలు చేసుకున్నాయి.
వివాదం ఎలా మొదలైంది?
బడ్జెట్ చర్చల సందర్భంగా బీజేపీ శాసనసభా పక్ష నేత మహేశ్వర్ రెడ్డి కేంద్ర ప్రభుత్వ అభివృద్ధి పథకాలను వివరిస్తుండగా, పంచాయతీరాజ్ శాఖ మంత్రి సీతక్క అడ్డు తగిలారు. మహాత్మా గాంధీ జాతీయ గ్రామీణ ఉపాధి హామీ పథకం పేరు నుంచి 'మహాత్మా గాంధీ' పేరును ఎందుకు తొలగించారని ఆమె ప్రశ్నించారు.
ఈ సందర్భంగా సీతక్క సంచలన వ్యాఖ్యలు చేస్తూ, దేశానికి స్వాతంత్ర్యం తెచ్చిపెట్టిన బాపూజీని ఆర్ఎస్ఎస్ అనుచరులే హత్య చేశారు. గాడ్సేను వీర యోధుడిగా కీర్తిస్తూ అతనికి నివాళులు అర్పించే మీరు, గాంధీ పేరును తొలగించడం ఎంతవరకు సమంజసం? అని నిలదీశారు. ఆర్ఎస్ఎస్ను నిషేధించింది కూడా కాంగ్రెస్ నాయకుడు సర్దార్ వల్లభభాయ్ పటేలేనని ఆమె గుర్తు చేశారు. గాడ్సేను కొంతమంది గొప్ప వ్యక్తిగా కొనియాడుతున్నారని విమర్శిస్తూ, అన్నింటినీ త్యాగం చేసిన మహానేతను హత్య చేసిన వ్యక్తిని ప్రశంసించడం సరైనదా? అని సీతక్క ప్రశ్నించారు.
కేంద్రం విభజన హామీలను విస్మరించి తెలంగాణకు అన్యాయం చేస్తోందని మంత్రి సీతక్క ధ్వజమెత్తారు. రాష్ట్రం నుంచి ఎనిమిది మంది ఎంపీలు గెలిచినా నిధులు తేకుండా చోద్యం చూస్తున్నారని విమర్శించారు. పన్నెండేళ్లుగా జరుగుతున్న ఈ వివక్షపై ఆమె తీవ్ర అసహనం వ్యక్తం చేస్తూ, ఎంపీలు తమ బాధ్యతను నెరవేర్చాలని డిమాండ్ చేశారు.
బీజేపీ కౌంటర్ - రికార్డుల నుంచి తొలగించాలని డిమాండ్
సీతక్క వ్యాఖ్యలపై మహేశ్వర్ రెడ్డి తీవ్రంగా స్పందించారు. గాడ్సేకు ఆర్ఎస్ఎస్తో ఎలాంటి సంబంధం లేదని, ఈ విషయాన్ని సుప్రీంకోర్టు కూడా గతంలో స్పష్టం చేసిందని ఆయన వాదించారు. సీతక్క చేసిన వ్యాఖ్యలను సభారికార్డుల నుంచి తొలగించాలని స్పీకర్ గడ్డం ప్రసాద్ కుమార్ను ఆయన కోరారు. గాడ్సే గాంధీని చంపిన మాట వాస్తవం, ప్రపంచమంతా తెలుసు, అతనికి ఉరిశిక్ష కూడా పడింది. కానీ గాడ్సే ఎప్పుడూ ఆర్ఎస్ఎస్ సభ్యుడు కాదు అని మహేశ్వర్ రెడ్డి స్పష్టం చేశారు. అసలు చర్చ విషయాన్ని వదిలి అనవసరంగా దారి మళ్లించడం సరికాదు, అని అన్నారు.
మంత్రుల సవాల్
ఈ వివాదంలో ఇతర మంత్రులు కూడా తలదూర్చారు. మంత్రి పొన్నం ప్రభాకర్ సోమవారం అసెంబ్లీ వద్ద బీజేపీ నిర్వహించిన నిరసనను తప్పుబట్టగా, మంత్రి వాకిటి శ్రీహరి బీజేపీ సభ్యులకు ఒక సవాల్ విసిరారు. గాడ్సే చర్యలను మీరు బహిరంగంగా ఖండించగలరా? అని ప్రశ్నించారు. తాను కరడుగట్టిన హిందువునని, కానీ మతాన్ని రాజకీయాల కోసం వాడుకోనని శ్రీహరి పేర్కొన్నారు.
రాజకీయ వివాదాల మధ్యే పరిశ్రమల శాఖ మంత్రి దుద్దిళ్ల శ్రీధర్ బాబు కేంద్రంపై విమర్శలు గుప్పించారు. తెలంగాణ దేశ జీడీపీకి 5 శాతం సహకరిస్తోందని, ఏటా రూ. 60,000 కోట్ల పన్నులు చెల్లిస్తున్నా, కేంద్రం రాష్ట్రానికి ఆర్థిక అన్యాయం చేస్తోందని ఆరోపించారు. మొత్తానికి, అభివృద్ధి పనులపై జరగాల్సిన చర్చ కాస్తా గాంధీ-గాడ్సే వివాదంగా మారడంతో సభలో కొద్దిసేపు ఉద్రిక్త వాతావరణం నెలకొంది.