అరుణాచల్ ప్రదేశ్ తొలి మహిళా ఐపీఎస్ అధికారిగా టెన్జిన్ యాంగ్కి

అరుణాచల్ ప్రదేశ్ రాష్ట్ర చరిత్రలో టెన్జిన్ యాంగ్కి ఒక సరికొత్త అధ్యాయాన్ని లిఖించారు. ఈశాన్య రాష్ట్రం నుండి ఇండియన్ పోలీస్ సర్వీస్ (ఐపీఎస్) అధికారిగా మారిన మొట్టమొదటి మహిళ ఈమె. కఠినమైన యూనియన్ పబ్లిక్ సర్వీస్ కమిషన్ పరీక్షలో విజయం సాధించి, శిక్షణ పూర్తి చేసుకున్న టెన్జిన్ యాంగ్కి, ఈ ప్రతిష్టాత్మక స్థానాన్ని దక్కించుకోవడం ద్వారా రాష్ట్రంలోని మహిళా సాధికారతకు చిహ్నంగా నిలిచారు.

తవాంగ్ జిల్లాకు చెందిన టెన్జిన్ యాంగ్కి, 2022లో జరిగిన యూపీఎస్సీ సివిల్ సర్వీసెస్ పరీక్షలో 545వ ఆల్ ఇండియా ర్యాంకు సాధించి, 2022 బ్యాచ్ ఐపీఎస్ అధికారిగా ఎంపికయ్యారు. ఆమె ఇటీవల హైదరాబాద్‌లోని సర్దార్ వల్లభాయ్ పటేల్ నేషనల్ పోలీస్ అకాడమీలో తన శిక్షణను విజయవంతంగా పూర్తి చేశారు. ఆమెకు కేంద్రం ఏజీఎమ్‌యూటీ (అరుణాచల్ ప్రదేశ్-గోవా-మిజోరం-కేంద్రపాలిత ప్రాంతాలు) క్యాడర్ కేటాయించింది.

యూపీఎస్సీ విజయాన్ని సాధించడానికి ముందు, ఆమె 2017లో అరుణాచల్ ప్రదేశ్ పబ్లిక్ సర్వీస్ కమిషన్ పరీక్షలో కూడా విజయం సాధించి, సియాంగ్ జిల్లాలో సర్కిల్ ఆఫీసర్గా పనిచేశారు. సివిల్ సర్వీసెస్‌లో చేరడానికి ముందు ఆమె కొంతకాలం అసిస్టెంట్ ప్రొఫెసర్‌గా కూడా పనిచేశారు.

విద్యా నేపథ్యం

టెన్జిన్ యాంగ్కి విద్యారంగంలోనూ అత్యంత ప్రతిభ కనబరిచారు. ఆమె యూకేలోని యూనివర్సిటీ ఆఫ్ వార్విక్ నుండి ఫిలాసఫీ, పాలిటిక్స్ అండ్ ఎకనామిక్స్‌లో బీఎస్సీ (ఆనర్స్) డిగ్రీని పొందారు. న్యూఢిల్లీలోని ప్రతిష్టాత్మక జవహర్‌లాల్ నెహ్రూ విశ్వవిద్యాలయం నుండి అంతర్జాతీయ సంబంధాలలో మాస్టర్స్‌, ఎం.ఫిల్. డిగ్రీలను పూర్తి చేశారు.

ముఖ్యమంత్రి, ప్రముఖుల అభినందనలు

టెన్జిన్ యాంగ్కి సాధించిన ఈ చారిత్రక విజయానికి రాష్ట్ర ముఖ్యమంత్రి పేమా ఖండూ, పారిశ్రామికవేత్త ఆనంద్ మహీంద్రా సహా అనేక మంది ప్రశంసలు తెలిపారు. ముఖ్యమంత్రి పేమా ఖండూ ఆమెను 'నారీ శక్తి'కి నిదర్శనంగా అభివర్ణించారు. ముఖ్యమంత్రి తన అధికారిక 'ఎక్స్' ఖాతాలో "అరుణాచల్ ప్రదేశ్ నుండి తొలి మహిళా ఐపీఎస్ అధికారిగా మారిన తవాంగ్ జిల్లాకు చెందిన టెన్జిన్ యాంగ్కికి హృదయపూర్వక అభినందనలు. అరుణాచల్‌లోని ప్రశాంతమైన పర్వతాల నుండి సర్దార్ వల్లభాయ్ పటేల్ నేషనల్ పోలీస్ అకాడమీ వరకు ఆమె ప్రయాణం ధైర్యం, సంకల్పం, విధి పట్ల అచంచలమైన నిబద్ధతను ప్రతిబింబిస్తుంది" అని కొనియాడారు.

ఆమె విజయం వ్యక్తిగత మైలురాయి మాత్రమే కాదని, రాష్ట్రం మొత్తానికి ఇది గర్వకారణమని ఖండూ పేర్కొన్నారు. "ఆమె నారీ శక్తికి నిదర్శనం. పెద్ద కలలు కనడానికి, దేశానికి సగర్వంగా సేవ చేయడానికి అసంఖ్యాకమైన అరుణాచలీ యువతులను ఆమె ప్రేరేపిస్తారు" అని ముఖ్యమంత్రి ఆశాభావం వ్యక్తం చేశారు.

ఆనంద్ మహీంద్రా తన సోషల్ మీడియాలో యాంగ్కి కథనాన్ని "మండే మోటివేషన్"గా పేర్కొంటూ, "మొదటి స్థానంలో ఉండటం ఎప్పుడూ సులభం కాదు, ఎందుకంటే ఇతరులు పక్కన నడవడానికి వీలుగా ముందుగా ఒంటరిగా నడవాల్సి ఉంటుంది" అని ఆమె ధైర్యాన్ని కొనియాడారు.

టెన్జిన్ యాంగ్కి మాజీ ఐఏఎస్ అధికారి, మాజీ మంత్రి అయిన దివంగత తుప్టెన్ టెంపా,ప్రభుత్వ కార్యదర్శిగా (రిటైర్డ్) పనిచేసిన జిగ్మి చోడెన్ల కుమార్తె. ఈ ప్రతిష్టాత్మక విజయం ద్వారా, టెన్జిన్ యాంగ్కి కఠినమైన భౌగోళిక పరిస్థితులు మరియు వనరుల కొరత కారణంగా జాతీయ సేవల్లో మహిళల ప్రాతినిధ్యం తక్కువగా ఉన్న ఈశాన్య రాష్ట్రానికి ఒక ఆశాకిరణంగా నిలిచారు.