అమెరికా స్వాతంత్ర్య దినోత్సవ వేళ.. ట్రంప్ కాయిన్‌ వివాదం

అమెరికా స్వాతంత్ర్యానికి 250 సంవత్సరాల సందర్భంగా ప్రత్యేక బంగారు నాణెంపై అధ్యక్షుడు డొనాల్డ్ ట్రంప్ చిత్రాన్ని ముద్రించేందుకు సిద్ధమవుతున్న చర్య వివాదానికి దారి తీసింది. 24 క్యారెట్ల బంగారుతో తయారు చేయనున్న ఈ స్మారక నాణెంపై ట్రంప్ ‘రెజల్యూట్ డెస్క్’ వద్ద నిలబడి ఉన్న చిత్రం ఉండనుంది. అమెరికా చరిత్రలో పదవిలో ఉన్న అధ్యక్షుడి బొమ్మ నాణెంపై రావడం ఇదే రెండోసారి. 1926లో కాల్విన్ కూలిడ్జ్, జార్జ్ వాషింగ్టన్లతో కలిసి ఒక స్మారక నాణెం విడుదలైంది. అమెరికా స్వాతంత్ర్యానికి 250 ఏళ్ల వేడుకల సందర్భంగా ప్రత్యేక నాణేలు, మెడల్స్ విడుదలకు ప్రభుత్వం సిద్ధమవుతోంది. యునైటెడ్ స్టేట్స్ మింట్ కూడా 1776–2026 ద్వంద్వ తేదీలతో ప్రత్యేక నాణేలను విడుదల చేయనున్నట్లు తెలిపింది.

మార్చి 19న సమావేశమైన యుఎస్ కమిషన్ ఆన్ ఫైన్ ఆర్ట్స్ ఈ నాణెం డిజైన్‌కు ఆమోదం తెలిపింది. తుది పరిమాణం నిర్ణయించిన తర్వాత మింటింగ్ ప్రక్రియ ప్రారంభం కానుంది. అయితే అమెరికా చట్టాల ప్రకారం జీవించి ఉన్న అధ్యక్షుడి చిత్రం కరెన్సీపై ఉండకూడదు. దీనిపై స్పందించిన అమెరికా ఖజానా అధికారి బ్రాండన్ బీచ్, ఇది సాధారణ చలామణి కరెన్సీ కాదని, స్మారక నాణెంగా మాత్రమే విడుదల అవుతుందని స్పష్టం చేశారు.

ఈ నిర్ణయంపై ప్రతిపక్ష డెమోక్రాట్లు తీవ్రంగా విమర్శించారు. లోకతంత్ర దేశాల్లో నాయకులు ఇలా తమ చిత్రాలను నాణేలపై ముద్రించరు అంటూ సెనేటర్ జెఫ్ మెర్క్లీ వ్యాఖ్యానించారు. అయితే విమర్శకులు మాత్రం, ట్రంప్ తన ప్రభావాన్ని మరింతగా చూపించుకునే ప్రయత్నంలో భాగంగానే ఈ చర్య ఉందని ఆరోపిస్తున్నారు. ఇప్పటికే కెనెడీ సెంటర్ పేరును మార్పు చేయడం వంటి నిర్ణయాలు కూడా వివాదాస్పదమయ్యాయి. మొత్తంగా, అమెరికా చరిత్రాత్మక వేడుకల నేపథ్యంలో తీసుకున్న ఈ నిర్ణయం రాజకీయ చర్చలకు దారితీస్తోంది.