అమెరికా టారిఫ్‌ల ఎఫెక్ట్: భారత ఎగుమతులు 37 శాతం పతనం

2025 మధ్యకాలం నుండి ట్రంప్ ప్రభుత్వం భారత్ రష్యా చమురు దిగుమతులతో సంబంధం ఉన్న ఉత్పత్తులపై అదనంగా 25 శాతం సుంకం విధించడం వంటి చర్యల కారణంగా భారత ఎగుమతులు అమెరికాకు 37.5 శాతం తగ్గాయి. మే నెలలో 8.8 బిలియన్ డాలర్లుగా ఉన్న ఎగుమతులు సెప్టెంబర్‌లో 5.5 బిలియన్ డాలర్లకు పడిపోయాయని ఢిల్లీ ఆధారిత థింక్‌ట్యాంక్ "గ్లోబల్ ట్రేడ్ రీసెర్చ్ ఇనిషియేటివ్ (జీటీఆర్ఐ)" వెల్లడించింది. వస్త్రాలు, ఆభరణాలు, ఇంజనీరింగ్ ఉత్పత్తులు, రసాయనాలు వంటి కీలక రంగాలు తీవ్రంగా ప్రభావితమయ్యాయి.

జీటీఆర్ఐ ప్రతినిధి అజయ్ శ్రీవాస్తవ మాట్లాడుతూ, పెరిగిన సుంకాల (టారిఫ్‌ల) కారణంగా అమెరికా ఇప్పుడు భారత ఎగుమతులపై అత్యధిక ప్రతికూల ప్రభావం చూపుతున్న మార్కెట్‌గా మారిందని అన్నారు. అంటే, భారత వాణిజ్య నష్టాలు అమెరికాతోనే ఎక్కువగా ఉన్నాయని తెలిపారు.

భారత్-అమెరికా ట్రేడ్ డీల్

భారతదేశం-అమెరికా త్వరలో ఒక వాణిజ్య ఒప్పందాన్ని తుది దశకు తీసుకెళ్లే అవకాశం ఉందని, దాని ప్రకారం అమెరికా భారత ఎగుమతులపై ప్రస్తుతం ఉన్న 50 శాతం సుంకాన్ని 15–16 శాతం వరకు తగ్గించవచ్చని సమాచారం. ఇది ఉపశమనంగా కనిపించినప్పటికీ, అప్పటికే భారత ఎగుమతిదారులు భారీ నష్టాలను చవిచూశారు. భారత ప్రభుత్వం మాత్రం ఈ ఆర్థిక నష్టంపై ఇప్పటివరకు పెద్దగా స్పందించలేదు.

భారత్ క్రమంగా రష్యా ముడి చమురు కొనుగోళ్లను తగ్గిస్తోందని అమెరికా అధికారులు పదేపదే చెబుతున్నప్పటికీ, స్వతంత్ర డేటా ప్రకారం రష్యా ఇప్పటికీ భారతదేశ ముడి చమురు దిగుమతుల్లో 34-36 శాతం వాటాను సరఫరా చేస్తోంది. మార్కెట్ పరిస్థితులు, రిఫైనరీ అనుకూలత, రాయితీ ధరల కారణంగా భారత్ రష్యా నుంచి కొనుగోళ్లను కొనసాగిస్తోంది. అయితే రష్యా చమురుపై యూఎస్ టారిఫ్‌ల కంటే, ఉక్రెయిన్‌ దాడుల కారణంగా రష్యా చమురు శుద్ధి కేంద్రాలు దెబ్బతినడం వల్లే భారత్ ప్రస్తుతం ప్రత్యామ్నాయంగా మధ్యప్రాచ్యం, ఆఫ్రికా నుంచి ముడి చమురు దిగుమతిని (దాదాపు 40 శాతానికి) పెంచింది.

ఇంధనం, వ్యవసాయ రంగాలపై ప్రభావం

సుదీర్ఘంగా సాగిన చర్చల్లో ప్రధాన అడ్డంకులుగా ఉన్న అంశాలపై భారత్ అమెరికా దేశాలు పరస్పరం అంగీకారానికి వచ్చినట్లు తెలుస్తోంది. ఈ ఒప్పందం ప్రధానంగా ఇంధనం, వ్యవసాయ రంగాలపై ఆధారపడి ఉంటుంది. భారత్ అమెరికా నుంచి ముడి చమురు, సహజ వాయువు దిగుమతులను పెంచే అవకాశం ఉంది. కానీ ఆర్థిక విశ్లేషకుల హెచ్చరిక ఏమిటంటే, అమెరికా చమురు ధర రష్యా, మధ్యప్రాచ్య చమురు కంటే అధికంగా ఉంటుంది. ఫలితంగా అమెరికా నుంచి ఎక్కువ చమురు దిగుమతి చేసుకుంటే భారతదేశ చమురు దిగుమతి ఖర్చులు గణనీయంగా పెరిగి, దేశీయ ఇంధన ధరలు పెరిగే అవకాశం ఉంది. ఇది వినియోగదారులు, వ్యాపారాలపై భారం మోపవచ్చు.

వ్యవసాయ ఉత్పత్తులపై సుంకాలు 15-16 శాతానికి తగ్గవచ్చని చెబుతున్నప్పటికీ, ఇది కేవలం నామమాత్రపు తగ్గింపు అని విశ్లేషకులు అభిప్రాయపడుతున్నారు. గతంలో 50 శాతం టారిఫ్‌లు విధించడానికి కారణం భారతీయ వ్యవసాయ ఉత్పత్తుల్లో నాణ్యత, సరఫరా, మార్కెట్ అందుబాటులో ఉన్న లోపాలు అని అమెరికా పేర్కొంది. ఈ మూల సమస్యలు (ధరల తేడాలు, కోటాలు) పరిష్కారం కాకుండా కేవలం సుంకాలు తగ్గిస్తే, భారతీయ వ్యవసాయ ఉత్పత్తులు మళ్లీ పోటీని తట్టుకునే అవకాశం ఉండదని వారు అభిప్రాయపడుతున్నారు. ఈ అంతర్లీన సమస్యలను పరిష్కరించకుండా కేవలం సుంకాలు తగ్గించడం అనేది నామమాత్రపు చర్య అవుతుందే తప్ప, వాస్తవ ప్రయోజనం ఉండదని విశ్లేషకులు అంటున్నారు.

ఈ ఒప్పందంలో సుంకాలు, మార్కెట్ యాక్సెస్‌పై ఎప్పటికప్పుడు సమీక్షలు జరిపే నిబంధనలు ఉండవచ్చని, ఈ నెలలో జరిగే ఆసియాన్ శిఖరాగ్ర సమావేశం సందర్భంగా ఈ ఒప్పందాన్ని అధికారికంగా ప్రకటించే అవకాశం ఉందని సమాచారం. ఈ నివేదికపై భారత వాణిజ్య, పరిశ్రమల మంత్రిత్వ శాఖ కానీ, వైట్‌హౌస్ కానీ ఇంకా స్పందించలేదు.

సుంకాల కారణంగా నష్టాలు ఉన్నప్పటికీ, భారత ప్రభుత్వం దీని గురించి బహిరంగంగా మాట్లాడకుండా, కేవలం ఇంధన వనరుల వైవిధ్యీకరణ గురించి మాత్రమే ప్రకటనలు చేయడం విమర్శలకు దారితీస్తోంది. ఈ మౌనం వల్ల అమెరికా వాదనలు బలంగా మారాయని, వాస్తవ ఆర్థిక నష్టం ప్రజలకు తెలియకుండా పోతోందని విశ్లేషకులు హెచ్చరిస్తున్నారు. వాస్తవానికి ఈ నష్టాలు, రష్యా చమురు సరఫరా అంతరాయాల వల్ల భారతదేశం తీవ్ర ఆర్థిక భారాన్ని ఎదుర్కొంటోంది. ఈ కీలక సమయంలో ప్రభుత్వం మౌనం వహించడం, వాస్తవాలను దాచడం వలన, భారతదేశం బలహీన స్థితిలో ఉండి సంప్రదింపులు జరుపుతోందనే భావన ఏర్పడుతుంది. వాస్తవాలను, పారదర్శకతను ఉపయోగించుకోకుండా, ఈ మౌనం దేశానికి నష్టం కలిగించే ప్రమాదం ఉందని విశ్లేషకులు హెచ్చరిస్తున్నారు.