అమరావతికి లోక్‌సభ ఆమోదం

ఏప్రిల్ 1, బుధవారం భారత పార్లమెంటు దిగువ సభ (లోక్‌సభ) ఆంధ్రప్రదేశ్ పునర్విభజన (సవరణ) బిల్లును ఆమోదించింది. ఈ బిల్లు ద్వారా ఆంధ్రప్రదేశ్ రాజధానిగా 'అమరావతి' కి చట్టబద్ధమైన గుర్తింపు లభించింది. ఇది కేవలం ఒక నగరాన్ని రాజధానిగా ప్రకటించడం మాత్రమే కాదు, భవిష్యత్తులో ఏ ప్రభుత్వం వచ్చినా ఈ నిర్ణయాన్ని మార్చడానికి వీలు లేకుండా "ఏకైక, శాశ్వత రాజధాని"గా దీనిని ముద్ర వేసింది. కేంద్ర హోం శాఖ సహాయ మంత్రి నిత్యానంద రాయ్ ప్రవేశపెట్టిన ఈ బిల్లుకు అధికార ఎన్డీయేతో పాటు ప్రతిపక్ష కాంగ్రెస్ కూడా మద్దతు తెలపడం విశేషం.

జూన్ 2, 2024 నుంచి అమల్లోకి

ఈ సవరణ బిల్లు ప్రకారం, జూన్ 2, 2024 నుండి ఆంధ్రప్రదేశ్ ఏకైక రాజధానిగా అమరావతి పరిగణించబడుతుంది. 2014 విభజన చట్టం ప్రకారం పదేళ్ల పాటు హైదరాబాద్ ఉమ్మడి రాజధానిగా ఉంది. ఆ గడువు ముగిసిన తర్వాతి రోజు (జూన్ 2, 2024) నుండే అమరావతిని అధికారిక రాజధానిగా ఈ బిల్లు ధ్రువీకరించింది. దీనివల్ల గత పదేళ్లుగా నెలకొన్న అనిశ్చితికి తెరపడింది.

టీడీపీ పట్టుదల - ఎన్డీయే మద్దతు

ముఖ్యమంత్రి నారా చంద్రబాబు నాయుడు నేతృత్వంలోని తెలుగుదేశం పార్టీ, కేంద్రంలోని ఎన్డీయే ప్రభుత్వంలో కీలక భాగస్వామిగా ఉన్న సంగతి తెలిసిందే. రాష్ట్ర శాసనసభలో ఆమోదించిన తీర్మానాన్ని కేంద్రానికి పంపి, దానిని పార్లమెంటులో బిల్లు రూపంలో పెట్టించడంలో చంద్రబాబు విజయం సాధించారు. అమరావతి అనేది కేవలం ఒక నగరం కాదు, అది ఐదు కోట్ల ఆంధ్రుల ఆశయమని టీడీపీ ఎంపీలు ఈ సందర్భంగా నొక్కి చెప్పారు.

వైఎస్సార్ కాంగ్రెస్ పార్టీ నిరసన

ఈ బిల్లు చర్చ సందర్భంగా వైఎస్సార్ కాంగ్రెస్ పార్టీ తీవ్ర అభ్యంతరం వ్యక్తం చేసింది. గతంలో మాజీ ముఖ్యమంత్రి జగన్ మోహన్ రెడ్డి ప్రభుత్వం ప్రతిపాదించిన "మూడు రాజధానుల" (విశాఖపట్నం, అమరావతి, కర్నూలు) సిద్ధాంతాన్ని వారు సమర్థించారు. అయితే, చర్చ ముగిసే సమయానికి తమ అభ్యంతరాలను పరిగణనలోకి తీసుకోలేదని ఆరోపిస్తూ వైఎస్సార్‌సీపీ సభ్యులు సభ నుండి వాకౌట్ చేశారు.

రైతు ప్రయోజనాలే ముఖ్యమని మిథున్ రెడ్డి డిమాండ్

వైఎస్సార్‌సీపీ ఎంపీ పి.వి. మిథున్ రెడ్డి మాట్లాడుతూ, రాజధాని కోసం భూములిచ్చిన 34,000 మంది రైతుల ప్రయోజనాలను ఈ బిల్లులో ఎందుకు పొందుపరచలేదని ప్రశ్నించారు. అభివృద్ధి చేసిన ప్లాట్లు, ఇళ్ల స్థలాలు, ఉచిత విద్య వంటి హామీలను ఎప్పటిలోగా నెరవేరుస్తారో స్పష్టమైన కాలపరిమితిని బిల్లులో చేర్చాలని డిమాండ్ చేశారు. నిధుల సమీకరణపై స్పష్టత లేదని, కోల్‌కతా కంటే పెద్ద నగరాన్ని కడతామంటున్న ప్రభుత్వం నిధులు ఎక్కడి నుండి తెస్తుందని ఆయన విమర్శించారు.

'ఆటలు సాగవు' - సీఎం రమేష్ వ్యాఖ్యలు

బీజేపీ సభ్యుడు సీఎం రమేష్ మాట్లాడుతూ, భారత దేశ చరిత్రలోనే ఒక రాష్ట్ర రాజధానిని నిర్ణయిస్తూ పార్లమెంటులో బిల్లు రావడం ఇదే తొలిసారి అని పేర్కొన్నారు. గత ప్రభుత్వం మూడు రాజధానుల పేరుతో రాష్ట్ర భవిష్యత్తుతో ఆడుకుందని, ఇకపై రాజధాని విషయంలో ఎవరూ రాజకీయ ఆటలు ఆడలేరని ఆయన స్పష్టం చేశారు. అమరావతి శాశ్వత రాజధాని కావడం వల్ల రాష్ట్రానికి ఆదాయం పెరిగి, అభివృద్ధి పరుగులు తీస్తుందని ధీమా వ్యక్తం చేశారు.

కాంగ్రెస్ మద్దతు - ప్రత్యేక హోదా డిమాండ్

ప్రతిపక్ష కాంగ్రెస్ తరపున మాణిక్యం ఠాగూర్ మాట్లాడుతూ, అమరావతిని రాజధానిగా తాము మనస్ఫూర్తిగా సమర్థిస్తున్నామని చెప్పారు. అయితే, రాజధానితో పాటు ఆంధ్రప్రదేశ్‌కు రావాల్సిన 'ప్రత్యేక హోదా' గురించి కూడా కేంద్రం ఆలోచించాలని కోరారు. బెంగళూరు, చెన్నై, హైదరాబాద్ నగరాల తరహాలో అమరావతి ఎదగాలని, అదే సమయంలో విశాఖపట్నం, తిరుపతి వంటి నగరాలను కూడా అభివృద్ధి చేయాలని సూచించారు.

చట్టబద్ధమైన స్పష్టత

2014 పునర్విభజన చట్టంలోని సెక్షన్ 5ను సవరించడం ద్వారా ఈ కొత్త మార్పును తీసుకొచ్చారు. గతంలో అమరావతి కేవలం రాష్ట్ర ప్రభుత్వం నోటిఫై చేసిన ప్రాంతంగా మాత్రమే ఉండేది. ఇప్పుడు పార్లమెంటు ఆమోదంతో అది భారత రాజ్యాంగబద్ధమైన చట్టంలో భాగమైపోయింది. దీనివల్ల భవిష్యత్తులో కోర్టు కేసులకు లేదా రాజకీయ నిర్ణయాల మార్పులకు తావు లేకుండా పోయింది.

మార్చి 28న ఆంధ్రప్రదేశ్ అసెంబ్లీ అమరావతిని ఏకైక రాజధానిగా గుర్తిస్తూ చేసిన తీర్మానాన్ని కేంద్ర ప్రభుత్వం గౌరవించిందని మంత్రి నిత్యానంద రాయ్ పేర్కొన్నారు. రాష్ట్ర ప్రజల ఆకాంక్షలను నెరవేర్చడమే కేంద్ర లక్ష్యమని, అమరావతిలో ఇప్పటికే జరిగిన మౌలిక సదుపాయాల కల్పనను ఈ బిల్లు గుర్తిస్తుందని ఆయన వివరించారు.

లోక్‌సభలో వాయిస్ ఓట్ (మౌఖిక ఓటు) ద్వారా ఈ బిల్లు నెగ్గడం ఆంధ్రప్రదేశ్ రాజకీయాల్లో ఒక మైలురాయి. దాదాపు ఏడేళ్ల అనిశ్చితి తర్వాత, రాష్ట్రానికి ఒకే ఒక చిరునామా స్థిరపడింది. ఇకపై కేంద్రం నుండి నిధుల మంజూరు, విదేశీ పెట్టుబడుల రాక, పరిపాలనా యంత్రాంగం బలోపేతం కావడానికి ఈ చట్టం మార్గం సుగమం చేస్తుంది. అమరావతి 'ఏకైక మరియు శాశ్వత' రాజధానిగా మారడంతో ఆంధ్రప్రదేశ్ అభివృద్ధిలో కొత్త అధ్యాయం మొదలైందని విశ్లేషకులు భావిస్తున్నారు.

ఆంధ్రులకు దక్కిన గౌరవం: చంద్రబాబు

ఈ చారిత్రాత్మక నిర్ణయంపై ముఖ్య మంత్రి చంద్రబాబు స్పందిస్తూ, ఏపికి అమరావతే ఏకైక రాజధాని. ఎవరూ అంగుళం కూడా కదల్చలేరు. ప్రజా రాజధాని అమరావతి ఆంధ్రుల ఆత్మగౌరవానికి ప్రతీక. ఈరోజు లోక్‌సభలో అమరావతికి చట్టబద్ధత కల్పించే బిల్లు ఆమోదం పొందడం ఆంధ్రులకు దక్కిన గౌరవంగా భావిస్తున్నాను. గత పాలనలో ఎదురైన చీకట్లు తొలగిపోయి, అమరావతి భవిష్యత్తు పై ఉన్న సందిగ్ధతకు శాశ్వతంగా తెరపడింది. రైతుల త్యాగానికి, ప్రజల ఆకాంక్షలకు దక్కిన గౌరవం ఇది. స్వర్ణాంధ్ర నిర్మాణంలో ఇది ఓ కీలక మైలురాయి. అమరావతి ఇక అజేయం..అజరామరం. రాజధానిని విశ్వనగరంగా తీర్చిదిద్ది ప్రపంచ పటంలో నిలుపుతాం. సహకరించిన కేంద్ర ప్రభుత్వానికి, ప్రధాని నరేంద్ర మోడీకి, హోం మంత్రి అమిత్ షాకి హృదయపూర్వక ధన్యవాదాలు. లోక్ సభలో బిల్లుకు మద్దతు పలికిన అన్ని పార్టీలకు ఆంధ్రప్రదేశ్ ప్రజల తరఫున కృతజ్ఞతలు తెలియచేస్తున్నాను అంటూ భావోద్వేగంగా తన సోషల్ మీడియా ఖాతా ఎక్స్ లో పోస్ట్ చేశారు.

ఉపముఖ్యమంత్రి పవన్ కళ్యాణ్ స్పందిస్తూ, లోక్‌సభలో అమరావతి బిల్లు ఆమోదం పొందిన ఈ చారిత్రాత్మక సందర్భంలో ఆంధ్రప్రదేశ్ ఐదు కోట్ల ప్రజలకు హృదయపూర్వక శుభాకాంక్షలు తెలియజేస్తూ, ఈ రోజు రాష్ట్ర చరిత్రలో ఒక మైలురాయిగా నిలిచిందని ఎక్స్ లో పోస్ట్ చేశారు.

అమరావతిని ఏకైక, శాశ్వత రాజధానిగా ప్రకటించిన ఈ నిర్ణయం ప్రజల సంకల్పం, సహనశక్తి, ఆశయాలకు ప్రతిబింబం. 33,000 ఎకరాలకు పైగా భూమిని సమర్పించిన అమరావతి రైతుల త్యాగానికి గాఢ కృతజ్ఞతలు తెలియజేస్తూ, ముఖ్యమంత్రి నారా చంద్రబాబు నాయుడు దూరదృష్టి నాయకత్వం, ప్రధాన మంత్రి నరేంద్ర మోడీ, ఎన్డీఏ ప్రభుత్వ సహకారం వల్లే ఈ స్వప్నం సాకారమైందని పేర్కొన్నారు

గత ప్రభుత్వ నిర్ణయాల వల్ల వచ్చిన సవాళ్లను ఎదుర్కొంటూ ప్రజలు చూపిన ధైర్యం, స్థిరమైన ప్రభుత్వాన్ని ఎన్నుకోవడం ద్వారా అభివృద్ధి, స్థిరత్వం వైపు అడుగులు వేయడం విశేషం. ఈ బిల్లుతో ప్రజల్లోనే కాకుండా పెట్టుబడిదారుల్లో కూడా కొత్త నమ్మకం ఏర్పడి, అమరావతి ఆశ, ధైర్యం, సమిష్టి సంకల్పానికి ప్రతీకగా నిలుస్తుంది. స్వర్ణ ఆంధ్ర 2047 లక్ష్య సాధనలో ఇది కీలక పాత్ర పోషిస్తూ, వికసిత భారత్ 2047 దిశగా కూడా ప్రగతికి దోహదం చేస్తుందని నమ్ముతున్నానని పేర్కొన్నారు.