అఫ్ఘనిస్తాన్కు భారత్ భారీ ఔషధ సాయం
భారతదేశం అఫ్ఘనిస్తాన్ ప్రజారోగ్య మంత్రిత్వశాఖకు 16 టన్నులకుపైగా అవసరమైన ఔషధాలు, నిర్ధారణ కిట్లను అందించింది. ఇది అఫ్ఘనిస్తాన్ ప్రజలకు భారతదేశం అందిస్తున్న మానవతా సహాయ కార్యక్రమాల్లో మరో కీలక దశగా నిలిచింది. ఈ సహాయం మలేరియా, ఇతర వెక్టర్-బార్న్ వ్యాధుల (వెక్టర్-బర్న్ డిసీజ్ అంటే దోమలు, పేలు, ఈగలు వంటి జీవుల ద్వారా సంక్రమించే వ్యాధులు) నివారణ కోసం రూపొందించిన జాతీయ కార్యక్రమాన్ని బలపరచడం లక్ష్యంగా పెట్టుకుంది. ఈ సహాయంలో ముఖ్యంగా దేశంలో ప్రస్తుతం విస్తృతంగా వ్యాపిస్తున్న మలేరియా, డెంగ్యూ మరియు లీష్మానియాసిస్ చికిత్సకు అవసరమైన కీలక ఔషధాలు ఉన్నాయి.
ప్రపంచ ఆరోగ్య సంస్థ ప్రకారం 2025లో ఇప్పటివరకు అఫ్ఘనిస్తాన్లో 27,000 కంటే ఎక్కువ మలేరియా కేసులు నమోదు అయ్యాయి. గత సంవత్సరం దాదాపు 1.8 లక్షల పాజిటివ్ కేసులు నమోదయ్యాయి. డెంగ్యూ వ్యాధి ఆరు ప్రావిన్స్లకు వ్యాపించింది. ఈ సంవత్సరం 736 అనుమానాస్పద కేసులు నమోదయ్యాయి. లీష్మేనియాసిస్ వ్యాధి బారినపడే ప్రమాదం ఉన్నవారు సుమారు 2.3 కోట్ల మంది ఉన్నారని, ముఖ్యంగా గ్రామీణ ప్రభావిత ప్రాంతాల్లో ఈ ప్రమాదం ఎక్కువగా ఉందని డబ్ల్యూహెచ్ ఓ పేర్కొంది. అధికారిక గణాంకాల్లో మరణాల సంఖ్య తక్కువగానే కనిపిస్తున్నా, పరిమిత నిర్ధారణ సదుపాయాలు, తక్కువ రిపోర్టింగ్ కారణంగా వాస్తవ పరిస్థితి మరింత తీవ్రమైందని నిపుణులు చెబుతున్నారు.
భారతదేశం తాజాగా అందించిన వైద్య సామాగ్రి విలువ దాదాపు 2.5 మిలియన్ డాలర్లు (సుమారు రూ. 20 కోట్లు)గా అంచనా. ఇందులో యాంటీ-మలేరియా ఔషధాలు, టెస్టింగ్ కిట్లు, లాజిస్టిక్ సపోర్ట్ ఉన్నాయి. ఈ సంవత్సరం ప్రారంభంలో 50,000 మెట్రిక్ టన్నుల గోధుమలు, ఐదు అంబులెన్స్లు, అత్యవసర ఆహార సహాయాన్ని కూడా భారత్ అందించింది. తాలిబాన్ 2021లో అధికారంలోకి వచ్చిన తర్వాత కూడా కాబూల్లో దౌత్య కార్యకలాపాలను నిర్వహిస్తున్న అతికొద్ది దేశాలలో భారత్ ఒకటి. తమ సహాయం రాజకీయ అంశాలతో ప్రభావితం కాకుండా ఆఫ్ఘన్ ప్రజల కోసం ఉద్దేశించబడింది అని భారత ప్రభుత్వం పునరుద్ఘాటించింది.
2025లో కూడా భారత్ ప్రపంచ మానవతా భాగస్వామిగా చురుకైన పాత్ర పోషిస్తోంది. ఆసియా, ఆఫ్రికా, పసిఫిక్ దేశాలకు సహాయం అందిస్తోంది. ఇటీవల శ్రీలంక, మాల్దీవులకు 30 టన్నులకుపైగా వైద్య సామగ్రి, ఆహార సహాయం పంపింది. మయన్మార్, నేపాల్లకు భారీ వరదల తర్వాత గోధుమలు, విపత్తు సహాయ సామగ్రి పంపించింది. అలాగే కెన్యా, ఎథియోపియా, మొజాంబిక్ వంటి ఆఫ్రికా దేశాలకు మందులు, టీకాలు అందించి, “వాక్సిన్ మైత్రి 2.0” కార్యక్రమం కింద సాంకేతిక, డిజిటల్ ఆరోగ్య సహకారం కూడా అందించింది. ఈ చర్యల ద్వారా భారత్ ప్రాంతీయ సంక్షోభాల్లో నమ్మకమైన సహాయక దేశంగా తన ప్రతిష్ఠను మరింత బలోపేతం చేసుకుంది.
ఇటీవలి నెలల్లో భారత్-అఫ్ఘనిస్తాన్ సంబంధాలు నెమ్మదిగా, స్థిరంగా మెరుగుపడుతున్నాయి. అక్టోబర్లో అఫ్ఘనిస్తాన్ విదేశాంగ మంత్రి మౌలవి ఆమిర్ ఖాన్ ముత్తాకీ భారత్లో పర్యటించారు. దాదాపు మూడేళ్ల తర్వాత రెండు దేశాల మధ్య మొదటి ఉన్నత స్థాయి సమావేశం జరిగింది. ఆయన భారత విదేశాంగ మంత్రి ఎస్. జైశంకర్తో ఆరోగ్య సహకారం, వాణిజ్య సౌలభ్యం, ప్రాంతీయ భద్రత వంటి అంశాలపై చర్చించారు. భారత్ అఫ్ఘన్ విద్యార్థులకు స్కాలర్షిప్ అవకాశాలు పెంచి, ఇరాన్ చాబహార్ పోర్ట్ ద్వారా మానవతా సహాయం కొనసాగిస్తోంది. దీని ద్వారా అఫ్ఘనిస్తాన్లో దీర్ఘకాల స్థిరత్వం, ప్రజల సంక్షేమం పట్ల తన నిబద్ధతను భారత్ మరోసారి స్పష్టం చేసింది.