అఫ్గానిస్థాన్‌ అక్రమ నిర్బంధాల దేశం: అమెరికా

అఫ్గానిస్థాన్‌ను పాలిస్తున్న తాలిబన్ ప్రభుత్వంపై అమెరికా మరోసారి తీవ్రస్థాయిలో విరుచుకుపడింది. అఫ్గానిస్థాన్‌ను ‘అక్రమ నిర్బంధాలకు పాల్పడే దేశం’గా అమెరికా విదేశాంగ మంత్రి మార్కో రూబియో అధికారికంగా ప్రకటించారు. తమ దేశ పౌరులను అన్యాయంగా బందీలుగా ఉంచుకుని, వారిని రాజకీయ ప్రయోజనాల కోసం పావులుగా వాడుకుంటున్నారని ఆయన ధ్వజమెత్తారు.

అమానవీయ స్థితిలో అమెరికా పౌరులు

తాలిబన్ల చెరలో ఉన్న అమెరికన్లను తక్షణమే విడుదల చేయాలని రూబియో డిమాండ్ చేశారు. ముఖ్యంగా డెనిస్ కోయిల్, మహమూద్ హబీబీ వంటి వ్యక్తుల నిర్బంధంపై ఆయన ఆందోళన వ్యక్తం చేశారు. ముఖ్యంగా 64 ఏళ్ల విద్యా పరిశోధకుడు డెనిస్ కోయిల్ పరిస్థితి చాలా దారుణంగా ఉంది. అఫ్గాన్ భాషలపై పరిశోధన చేస్తూ అక్కడి ప్రజలకు సాయం చేస్తున్న ఆయనను, గత ఏడాది జనవరిలో తాలిబన్ నిఘా విభాగం ఎటువంటి కారణం లేకుండానే అదుపులోకి తీసుకుంది. ప్రస్తుతం ఆయనను ఒక చీకటి గదిలో ఒంటరిగా ఉంచి, కనీసం వైద్య సదుపాయాలు కూడా అందించడం లేదని సమాచారం. కనీసం బాత్‌రూమ్‌కు వెళ్లాలన్నా అక్కడి సిబ్బంది అనుమతి తీసుకోవాల్సినంత అమానవీయ స్థితిలో ఆయన ఉన్నారని కుటుంబ సభ్యులు ఆవేదన వ్యక్తం చేస్తున్నారు.

మరోవైపు, అఫ్గాన్ పౌర విమానయాన మాజీ డైరెక్టర్ మహమూద్ హబీబీ (38) పరిస్థితి ఇంకా ఆందోళనకరంగా ఉంది. 2022లో కాబూల్ నగరం నుండి తాలిబన్లు ఆయన్ని కిడ్నాప్ చేశారు. ఆయనతో పాటు అరెస్టయిన ఇతర ఉద్యోగులందరూ విడుదలైనప్పటికీ, హబీబీ ఎక్కడ ఉన్నారో, అసలు ప్రాణాలతో ఉన్నారో లేదో కూడా తెలియని పరిస్థితి నెలకొంది. ఈ ఇద్దరు వ్యక్తులతో పాటు ఇతర అమెరికన్ల ప్రాణాలకు ముప్పు ఉందని, వారిని విడిపించేందుకు అంతర్జాతీయంగా ఒత్తిడి తీసుకురావాలని రూబియో విజ్ఞప్తి చేస్తున్నారు.

ఉగ్రవాద పద్ధతులే శరణ్యం: రూబియో

"తాలిబన్లు నేటికీ ఉగ్రవాద పద్ధతులనే అనుసరిస్తున్నారు. వ్యక్తులను కిడ్నాప్ చేసి, వారిని విడిపించేందుకు భారీగా డబ్బు వసూలు చేయడం లేదా ఇతర దేశాల నుండి రాజకీయ రాయితీలు కోరడం వంటి నీచమైన పనులకు పాల్పడుతున్నారు" అని రూబియో విమర్శించారు. అఫ్గానిస్థాన్‌కు ప్రయాణం చేయడం అమెరికన్లకు ఎంతమాత్రం సురక్షితం కాదని ఆయన హెచ్చరించారు. ఈ 'బందీ దౌత్యాన్ని' శాశ్వతంగా ఆపాలని కోరారు.

అఫ్గాన్ యుద్ధం: తీరని ప్రాణ నష్టం

అమెరికా చరిత్రలోనే అత్యంత సుదీర్ఘంగా సాగిన ఈ అఫ్గాన్ యుద్ధం 2001 అక్టోబర్ 7న ప్రారంభమై, 2021 ఆగస్టు 30న అమెరికా దళాల ఉపసంహరణతో ముగిసింది. దాదాపు 20 ఏళ్ల పాటు సాగిన ఈ పోరాటం వల్ల అమెరికాకు ఆర్థికంగా, మానవీయంగా కోలుకోలేని దెబ్బ తగిలింది. బ్రౌన్ యూనివర్సిటీ లెక్కల ప్రకారం, ఈ యుద్ధం కోసం అమెరికా ప్రభుత్వం దాదాపు 2.3 ట్రిలియన్ డాలర్లు ఖర్చు చేసింది. ఇది చాలదన్నట్లు, యుద్ధంలో గాయపడిన సైనికుల వైద్యం మరియు ఇతర పెన్షన్ అవసరాల కోసం 2050 సంవత్సరం నాటికి మరో 2.5 ట్రిలియన్ డాలర్లు వెచ్చించాల్సి ఉంటుందని అంచనా.

కేవలం డబ్బే కాకుండా, ఈ యుద్ధం వేల కుటుంబాల్లో తీరని శోకాన్ని మిగిల్చింది. రెండు దశాబ్దాల కాలంలో 2,324 మంది అమెరికా సైనికులు, 3,917 మంది కాంట్రాక్టర్లు ప్రాణాలు కోల్పోయారు. వీరితో పాటు యుద్ధం మధ్యలో నలిగిపోయి సుమారు 46,319 మంది సామాన్య అఫ్గాన్ పౌరులు బలి కావడం అత్యంత విషాదకరం. ఇంత భారీ మూల్యం చెల్లించినా, చివరకు 2021లో అమెరికా వెనుతిరగగానే తాలిబన్లు మళ్లీ అఫ్గానిస్థాన్‌ను తమ వశం చేసుకున్నారు.

మారని తాలిబన్ల తీరు

అమెరికా ఇంతటి భారీ పెట్టుబడి పెట్టినప్పటికీ, ప్రస్తుతానికి అఫ్గాన్‌లో తాలిబన్ల నిరంకుశ పాలనకు ఎటువంటి రాజకీయ లేదా సాయుధ ముప్పు లేదని 'కాంగ్రెషనల్ రీసెర్చ్ సర్వీస్' నివేదిక స్పష్టం చేసింది. ముఖ్యంగా అఫ్గాన్ మహిళలు, బాలికలపై తాలిబన్ల కఠిన ఆంక్షలు కొనసాగుతూనే ఉండటంపై అంతర్జాతీయ సమాజం ఆందోళన వ్యక్తం చేస్తోంది.