అదానీ గ్రూప్‌ షేర్ల భారీ పతనం.. ఒక్కరోజే రూ.లక్ష కోట్లు ఆవిరి!

అదానీ గ్రూప్ కంపెనీలను మరోసారి అమ్మకాల ఒత్తిడి ముంచెత్తింది. అమెరికా నియంత్రణ సంస్థ ‘సెక్యూరిటీస్ అండ్ ఎక్స్ఛేంజ్ కమిషన్’ (ఎస్‌ఈసీ) తాజాగా తీసుకున్న దూకుడు చర్యలతో శుక్రవారం భారత స్టాక్ మార్కెట్‌లో అదానీ షేర్లు కుప్పకూలాయి. గ్రూప్ మార్కెట్ విలువ ఒక్కరోజే సుమారు 12.5 బిలియన్ డాలర్లు (సుమారు రూ.1.14 లక్షల కోట్లకు పైగా) ఆవిరైపోయింది. అదానీ షేర్ల సెగతో సెన్సెక్స్ 769 పాయింట్లు, నిఫ్టీ 241 పాయింట్ల మేర భారీగా నష్టపోయి ఇన్వెస్టర్ల సంపదను దెబ్బతీశాయి.

కుప్పకూలిన షేర్లు.. నిరాశాజనక ఫలితాలు

శుక్రవారం ట్రేడింగ్‌లో అదానీ గ్రూప్ కంపెనీలు భారీ నష్టాలను చవిచూశాయి. ముఖ్యంగా అదానీ గ్రీన్ ఎనర్జీ షేరు అత్యధికంగా 13.20 శాతం పతనమై రూ.785 వద్ద ముగిసింది. డిసెంబర్ త్రైమాసికంలో ఈ కంపెనీ నికర లాభం ఏకంగా 99 శాతం తగ్గి కేవలం రూ.5 కోట్లుగా నమోదు కావడం ఇన్వెస్టర్లను దిగ్భ్రాంతికి గురిచేసింది. దీనికి తోడు అదానీ ఎనర్జీ సొల్యూషన్స్ (10.57 శాతం), అదానీ ఎంటర్‌ప్రైజెస్ (9.38 శాతం), అదానీ పవర్ (8.84 శాతం), అదానీ పోర్ట్స్ (7.81 శాతం) షేర్లు కూడా భారీగా నష్టపోయాయి. అంబుజా సిమెంట్స్, ఎన్డీటీవీ వంటి ఇతర అనుబంధ సంస్థలు కూడా 5 శాతం పైగా నష్టాల్లో ముగిశాయి.

కేసు నేపథ్యం..

నవంబర్ 2024లో అదానీ గ్రూప్‌పై అమెరికాలో నమోదైన సివిల్ కేసు ఇప్పుడు కీలక మలుపు తిరిగింది. భారత్‌లో భారీ సోలార్ విద్యుత్ కాంట్రాక్టులు దక్కించుకునేందుకు సుమారు 265 మిలియన్ డాలర్ల (దాదాపు రూ. 2,400 కోట్లు) మేర అధికారులకు లంచాలు ఇచ్చినట్లు గౌతమ్ అదానీ, సాగర్ అదానీలపై అమెరికా ప్రాసిక్యూటర్లు ఆరోపణలు చేశారు. ఈ రహస్య వ్యవహారాలను దాచిపెట్టి, అమెరికా ఇన్వెస్టర్లను తప్పుదోవ పట్టించి బాండ్ల రూపంలో 750 మిలియన్ డాలర్ల నిధులను సేకరించడం ద్వారా అమెరికా సెక్యూరిటీల చట్టాలను ఉల్లంఘించారని ఎస్‌ఈసీ ఆరోపిస్తోంది.

భారత్ తిరస్కరణ.. ఎస్‌ఈసీ కొత్త ఎత్తుగడ

గౌతమ్ అదానీ, సాగర్ అదానీలకు చట్టపరమైన సమన్లు అందజేయడంలో ఎదురవుతున్న అడ్డంకులను తొలగించుకునేందుకు ఎస్‌ఈసీ న్యూయార్క్ కోర్టును ఆశ్రయించింది. అంతర్జాతీయ నిబంధనల ప్రకారం నోటీసులు పంపాలని అమెరికా గతంలో రెండుసార్లు (ఏప్రిల్, నవంబర్ 2025) ప్రయత్నించినప్పటికీ, భారత న్యాయ మంత్రిత్వ శాఖ వాటిని తిరస్కరించింది. నోటీసులపై సరైన ముద్రలు (సీల్స్) లేవని, అమెరికా అధికారుల అధికార పరిధిపై స్పష్టత లేదని సాంకేతిక కారణాలను చూపింది. భారత అధికారుల నుంచి సహకారం అందడం లేదని పేర్కొన్న ఎస్‌ఈసీ, గౌతమ్ అదానీ, సాగర్ అదానీలకు నేరుగా ఈ-మెయిల్ ద్వారా సమన్లు పంపేందుకు అనుమతించాలని తాజాగా కోర్టును కోరింది.

నిరాధారమైన ఆరోపణలు: అదానీ గ్రూప్

అమెరికా ప్రాసిక్యూటర్లు చేస్తున్న లంచం ఆరోపణలను అదానీ గ్రూప్ ప్రతినిధి తీవ్రంగా ఖండించారు. "అమెరికా జస్టిస్ డిపార్ట్‌మెంట్, ఎస్‌ఈసీ చేస్తున్నవన్నీ నిరాధారమైన ఆరోపణలు. మేము అన్ని చట్టాలకు లోబడే వ్యవహరిస్తున్నాం. గ్రూప్ ఎప్పుడూ పారదర్శకత, అత్యున్నత పాలనా ప్రమాణాలకు కట్టుబడి ఉంటుంది" అని స్పష్టం చేశారు. ఈ విషయంలో తమకున్న అన్ని చట్టపరమైన మార్గాల్లో పోరాడతామని వెల్లడించారు. అమెరికా కోర్టు ఈ-మెయిల్ సమన్లపై ఇచ్చే నిర్ణయం ఇప్పుడు అదానీ గ్రూప్ భవిష్యత్తుకు, మార్కెట్ సెంటిమెంట్‌కు అత్యంత కీలకంగా మారింది.