అణ్వాయుధ పరీక్షలు వెంటనే ప్రారంభించండి.. సైన్యానికి ట్రంప్ ఆదేశం

అమెరికా అధ్యక్షుడు డొనాల్డ్ ట్రంప్ 33 సంవత్సరాల తర్వాత తొలిసారిగా అణు ఆయుధ పరీక్షలను తక్షణమే పునఃప్రారంభించాలని అమెరికా సైన్యాన్ని గురువారం ఆదేశించారు. ఈ ప్రకటన చైనా అధ్యక్షుడు షీ జిన్‌పింగ్‌తో అత్యంత కీలకమైన వాణిజ్య చర్చలు ప్రారంభించడానికి కొద్ది నిమిషాల ముందు రావడం గమనార్హం.

ట్రంప్ తన 'ట్రూత్ సోషల్' వేదికగా ఈ ప్రకటన చేశారు. ఇతర అణు శక్తులకు “సమాన ప్రాతిపదికన” అమెరికా అణు ఆయుధాగారాన్ని పరీక్షించాలని తాను పెంటగాన్‌ను ఆదేశించినట్లు తెలిపారు. దక్షిణ కొరియాలోని బుసాన్‌లో షీ జిన్‌పింగ్‌తో వాణిజ్య చర్చల సమావేశానికి వెళ్లేందుకు మారీన్ వన్ హెలికాప్టర్‌లో ప్రయాణిస్తున్న సమయంలో ఈ పోస్ట్ చేశారు. "ఇతర దేశాల అణు పరీక్షా కార్యక్రమాల కారణంగా, అమెరికా కూడా సమాన స్థాయిలో అణు పరీక్షలు ప్రారంభించాలని నేను యుద్ధ శాఖకు ఆదేశాలు ఇచ్చాను. ఆ ప్రక్రియ వెంటనే మొదలవుతుంది” అని ట్రంప్ తన పోస్ట్‌లో రాశారు. "ప్రపంచంలో అత్యధిక అణ్వాయుధాలు అమెరికాకే ఉన్నాయి. రష్యా రెండో స్థానంలో ఉంది. చైనా మూడో స్థానంలో ఉంది, కానీ ఐదేళ్లలో మరింత పెరుగుతుంది" అని ట్రంప్ పేర్కొన్నారు.

ట్రంప్ ఈ ప్రకటనకు సంబంధించిన వివరాలను స్పష్టంగా చెప్పలేదు. ఆయన అణు పేలుడు పరీక్షల గురించా లేక అణు సామర్థ్యమున్న క్షిపణుల ప్రయోగ పరీక్షల గురించి మాట్లాడుతున్నారో స్పష్టం కాలేదు.

చైనా అణు ఆయుధాలు రెండింతలు పెరిగాయ్

ట్రంప్ ఈ నిర్ణయం తీసుకోవడానికి ప్రధానంగా రష్యా, చైనా దేశాలు తమ అణు సామర్థ్యాన్ని వేగంగా విస్తరించడం కారణమని తెలుస్తోంది. వాషింగ్టన్ ఆధారిత థింక్ ట్యాంక్ అయిన సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (సీఎస్‌ఐఎస్) ప్రకారం, చైనా తన అణు ఆయుధాగారాన్ని గత ఐదేళ్లలో రెట్టింపు చేసింది. 2020లో చైనా వద్ద సుమారు 300 అణ్వాయుధాలు ఉండగా, 2025లో అవి 600కు పెరిగాయి. అమెరికా సైనిక అధికారులు అంచనా ప్రకారం, 2030 నాటికి చైనా వద్ద 1,000కు పైగా అణ్వాయుధాలు ఉంటాయి. సెప్టెంబర్‌లో జరిగిన విజయ దినోత్సవ పరేడ్‌లో చైనా ఆవిష్కరించిన ఐదు అణు సామర్థ్యాలు అమెరికా ఖండాంతరాన్ని చేరుకోగలవని సీఎస్‌ఐఎస్ తెలిపింది.

మరోవైపు రష్యా అధ్యక్షుడు వ్లాదిమిర్ పుతిన్ అణు సామర్థ్యం గల ఆయుధాలను పరీక్షించి తన అణు బలాన్ని ప్రదర్శిస్తున్నారు. బుధవారం రష్యా “పోసైడన్” అనే అణు టార్పెడోను విజయవంతంగా పరీక్షించిందని తెలిపారు. ఈ టార్పెడో తీరప్రాంతాలను అణు కిరణాలతో కలుషితం చేసే సామర్థ్యముందని విశ్లేషకులు చెబుతున్నారు. అక్టోబర్ 21న రష్యా “బురెవెస్ట్నిక్” అణు శక్తితో నడిచే క్రూయిజ్ క్షిపణిని విజయవంతంగా పరీక్షించింది. అక్టోబర్ 22న అణు ప్రయోగ సాధనాలు నిర్వహించింది.

ఆగస్టులో ట్రంప్, పుతిన్‌తో అణు ఆయుధ నియంత్రణపై చర్చలు జరిపానని, చైనాను కూడా వాటిలో భాగం చేయాలని కోరినట్లు చెప్పారు. దీనికి చైనా “మా అణు నిల్వలు చాలా తక్కువగా ఉన్నందున, అణు నిరాయుధీకరణ చర్చల్లో పాల్గొనడం అనవసరం, అవాస్తవం” అని ప్రతిస్పందించింది.

చారిత్రక నేపథ్యం

అమెరికా చివరిసారిగా 1992లో అణు పరీక్ష నిర్వహించింది. ఇలాంటి పరీక్షలు కొత్త అణు ఆయుధాల సామర్థ్యాన్ని, పాత ఆయుధాల పనితీరును నిర్ధారించేందుకు ఉపయోగిస్తారు. ఇది కేవలం సాంకేతిక డేటాను ఇవ్వడమే కాకుండా, రష్యా, చైనాకు అమెరికా తన వ్యూహాత్మక శక్తిని ప్రదర్శించినట్టు సంకేతమవుతుంది.

అమెరికా మొట్టమొదటగా జూలై 1945లో న్యూ మెక్సికోలోని అలమోగోర్డోలో 20-కిలోటన్ అణు బాంబును పరీక్షించింది. ఆ తర్వాతే ఆగస్టు 1945లో హిరోషిమా, నాగసాకిలపై బాంబులు వేసి రెండవ ప్రపంచ యుద్ధాన్ని ముగించింది.

అణు పరీక్షలు పునఃప్రారంభిస్తే తలెత్తే పరిణామాలు

అమెరికా అణు పరీక్షలు పునఃప్రారంభిస్తే ప్రపంచ భద్రతకు తీవ్ర ముప్పు తలెత్తుతుంది. ఇతర అణు శక్తులు (చైనా, రష్యా) కూడా పరీక్షలు ప్రారంభించి కొత్త ఆయుధ పరంపర మొదలయ్యే అవకాశం ఉంది. పర్యావరణ కాలుష్యం, రేడియేషన్ ప్రమాదం, భూకంప ప్రభావాలు పెరుగుతాయి. కాంప్రహెన్సివ్ న్యూక్లియర్ టెస్ట్ బ్యాన్ ట్రీటీ (సిటీబీటీ) వంటి ఒప్పందాలు బలహీనమై, అంతర్జాతీయ దౌత్య సంబంధాలు దెబ్బతింటాయి. ప్రజల్లో భయం, అనిశ్చితి వాతావరణం ఏర్పడుతుంది. ఆర్థికంగా కూడా భారీ వ్యయం పెరుగుతుంది. ఈ చర్య భారతదేశం, పాకిస్తాన్ వంటి అణు దేశాలను కూడా ప్రభావితం చేయవచ్చు. ఈ దేశాలలో కూడా అణు సామర్థ్యాల విస్తరణకు కొత్త ప్రేరణ ఇవ్వవచ్చు. మొత్తం మీద ఈ చర్య ప్రపంచ శాంతి, స్థిరత్వానికి ప్రమాదకర పరిణామాలు కలిగిస్తుంది.

సిటీబీటీ అంటే ఏమిటి?

సిటీబీటీ అనేది 1996లో ఆమోదించబడిన ఒక బహుళజాతి అంతర్జాతీయ ఒప్పందం. సైనిక ప్రయోజనాల కోసం లేదా మరే ఇతర ప్రయోజనాల కోసం అయినా భూమి పైన, భూగర్భంలో, నీటి అడుగున లేదా అంతరిక్షంలో అణు విస్ఫోటనం లేదా పరీక్షలను పూర్తిగా నిషేధించడం దీని ప్రధాన లక్ష్యం.

అమెరికా ఆయుధ సంపత్తి

అమెరికా ప్రపంచంలో అతిపెద్ద అణు శక్తివంతమైన దేశాలలో ఒకటి. ఈ దేశం వద్ద సుమారు 3,700 అణు బాంబులు సిద్ధంగా ఉన్నాయి. ఇంకా రిజర్వ్‌, రిటైర్డ్‌ ఆయుధాలు కలిపి మొత్తం సుమారు 5,000 వరకు ఉన్నాయి. అమెరికా తన అణు శక్తిని భూమి ఆధారిత క్షిపణులు, సబ్‌మెరైన్‌ల నుండి ప్రయోగించే క్షిపణులు, వాయుమార్గ బాంబర్ల ద్వారా నిర్వహిస్తుంది. ప్రధాన ఆయుధాలు డబ్ల్యూ76, డబ్ల్యూ78, డబ్ల్యూ88, డబ్ల్యూ80 అణు బాంబులు. కొత్త తరహా సెంటినెల్ ఐసీబీఎం, బీ-21 బాంబర్, కొలంబియా-తరగతి సబ్‌మెరైన్‌లతో ఆధునికీకరణ కొనసాగుతోంది. ఈ ఆయుధాలు అమెరికా వ్యూహాత్మక భద్రతకు ముఖ్య బలం.