అణు పరీక్షలతో అంధకార యుగం వైపు అమెరికా అడుగు

అమెరికా అధ్యక్షుడు డొనాల్డ్ ట్రంప్ అణు ఆయుధ పరీక్షలను మళ్లీ ప్రారంభించాలని ప్రకటించిన వెంటనే ప్రపంచం ఒక్కసారిగా చలించిపోయింది. ముప్పై సంవత్సరాలుగా కొనసాగుతున్న అణు పరీక్షల నిషేధ పరంపరను ఇది బద్దలుకొట్టినట్టైంది. 1992లో అమెరికా చివరి అణు పరీక్ష జరిపింది. అప్పటి నుంచి ప్రపంచ దేశాలు అణు నిరోధ విధానాన్ని పాటిస్తూ వచ్చాయి. ఇప్పుడు ట్రంప్ ఆదేశం ఆ అంతర్జాతీయ నిబంధనలపై కొత్త సవాలు విసురుతోంది.

ట్రంప్ వాదన ప్రకారం, రష్యా మరియు చైనా తమ అణు సామర్థ్యాలను పరీక్షిస్తున్నందున అమెరికా కూడా “సమాన స్థాయిలో” పరీక్షలు చేయాల్సిన అవసరం ఉందట. ఆయన దీన్ని “శక్తి ద్వారా శాంతి” సాధనగా చూపించేందుకు ప్రయత్నిస్తున్నారు. కానీ నిపుణులు ఈ నిర్ణయాన్ని తీవ్రంగా విమర్శిస్తున్నారు. వారి అభిప్రాయం ప్రకారం ఇది ప్రపంచంలో కొత్త అణు ఆయుధ పోటీని ప్రారంభించే ప్రమాదకర సంకేతం.

గత మూడు దశాబ్దాలుగా అమెరికా తన అణు ఆయుధాల పాటవాన్ని కంప్యూటర్ అనుకరణలు, శాస్త్రీయ సాఫ్ట్‌వేర్ పరీక్షల ద్వారా నిర్ధారించుకుంటోంది. కాబట్టి పేలుడు పరీక్షలు సాంకేతికంగా అవసరమనే వాదన బలహీనంగా ఉంది. కానీ రాజకీయ పరంగా ట్రంప్ ఈ నిర్ణయం ద్వారా ప్రపంచానికి సవాల్ విసురుతున్నట్లు కనిపిస్తోంది.

ఈ నిర్ణయం పర్యావరణ పరంగా, ఆర్థికంగా కూడా తీవ్ర ప్రభావాలు చూపే అవకాశం ఉంది. గత శతాబ్దంలో జరిగిన అణు పరీక్షలు ప్రపంచ పర్యావరణంపై లోతైన మచ్చలు వేసాయి. నెవాడా ఎడారుల్లో, పసిఫిక్ దీవుల్లో, కజఖిస్తాన్‌లో జరిగిన పరీక్షల వల్ల భూమి, నీరు, గాలి — అన్నీ రేడియేషన్ కాలుష్యానికి గురయ్యాయి. ఆ ప్రభావం ఇంకా కొనసాగుతూనే ఉంది. ఇప్పుడు అమెరికా పరీక్షలు మళ్లీ ప్రారంభిస్తే ఆ గాయాలు మరింత లోతుగా మారే అవకాశం ఉంది.

ఆర్థికంగా చూస్తే, అమెరికా ఇప్పటికే అణు ఆయుధాల ఆధునీకరణ కోసం సుమారు ఒక ట్రిలియన్ డాలర్ల వ్యయాన్ని ప్రణాళికలో పెట్టింది. కొత్త పరీక్ష కేంద్రాలు, భద్రతా సదుపాయాలు, పర్యావరణ పునరుద్ధరణ వంటి కార్యక్రమాలు కోట్ల డాలర్ల అదనపు భారం మోపుతాయి. అంతర్జాతీయంగా ఈ నిర్ణయం ఇతర దేశాలకు కూడా ప్రేరణగా మారవచ్చు. రష్యా, చైనా, ఉత్తర కొరియా, భారతదేశం, పాకిస్తాన్లు కూడా తమ అణు సామర్థ్యాలను నిరూపించడానికి ఒత్తిడికి లోనయ్యే ప్రమాదం ఉంది.

దీని ప్రభావం దక్షిణ ఆసియాలో మరింత తీవ్రమవచ్చు. భారత్, పాకిస్తాన్ మధ్య ఉన్న సున్నితమైన అణు సమతుల్యం భంగం చెందే ప్రమాదం ఉంది. ఒకవేళ ఏ దేశమయినా అణు పరీక్షలు చేపడితే మరొక దేశం ప్రతిస్పందనగా తన ఆయుధ భాండాగారాన్ని విస్తరించవచ్చు. ఇది చిన్నపాటి సరిహద్దు ఘర్షణను కూడా పెద్ద అణు సంక్షోభంగా మార్చగలదు.

రాజనీతి పరంగా చూస్తే, ఈ నిర్ణయం అమెరికా ప్రతిష్ఠకు నష్టం కలిగిస్తుంది. ఇప్పటివరకు అమెరికా అణు పరీక్షలు నిలిపివేయడం ద్వారా ప్రపంచానికి నైతిక నాయకత్వం చూపింది. అదే విధానం సార్వత్రిక అణు-పరీక్షా నిషేధ ఒప్పందం (CTBT) కి బలం ఇచ్చింది. ఇప్పుడు అమెరికా వెనక్కి తగ్గితే, ఆ ఒప్పందానికి ప్రాణం పోసిన అంతర్జాతీయ విశ్వాసమే దెబ్బతింటుంది.

ఒక్క అణు పేలుడు కూడా వాతావరణ సమతుల్యాన్ని మార్చగలదనిపర్యావరణ శాస్త్రజ్ఞులు హెచ్చరిస్తున్నారు. పెద్ద పరిమాణంలో పొగ, దుమ్ము వాతావరణంలోకి వెళ్ళి ఉష్ణోగ్రతలు పెంచుతాయి. వర్షపాత గతులు మారుస్తాయి. అలాంటి ప్రభావాలు ప్రపంచ ఆహార ఉత్పత్తిని దెబ్బతీసి, ఆకలి సంక్షోభాలను రేపవచ్చు. గత శతాబ్దంలో పరీక్షల వల్ల జన్మ లోపాలు, కేన్సర్లు, వందల ఏళ్లపాటు నిలిచే కాలుష్యం సంభవించాయి. ఇప్పుడు మళ్లీ అదే తప్పును పునరావృతం చేయాలా అన్న ప్రశ్న ఎదురు చూస్తోంది.

ఆర్థికవేత్తల అభిప్రాయం ప్రకారం, అణు పరీక్షల పునరుద్ధరణ అనేది తాత్కాలిక రాజకీయ ప్రదర్శన తప్ప దీర్ఘకాలిక భద్రతా లాభం కాదు. రక్షణ ఖర్చులు విపరీతంగా పెరుగుతాయి. ప్రపంచ మార్కెట్లు అస్థిరంగా మారతాయి. పెట్టుబడిదారుల నమ్మకం దెబ్బతింటుంది. ఈ నిధులు పునరుత్పాదక ఇంధనాలు, వాతావరణ మార్పు నియంత్రణ లేదా ప్రజా ఆరోగ్య రంగాలకు వెళ్ళి ఉండాల్సింది.

ట్రంప్ ఈ నిర్ణయాన్ని అమెరికా బలానికి చిహ్నంగా చూపించాలనుకుంటున్నారు. కానీ ప్రపంచం దీనిని ఒక వెనుకడుగుగా చూస్తోంది. 21వ శతాబ్దంలో శక్తి యొక్క అర్థం మారిపోయింది అది అణు పేలుళ్లలో కాదు, సాంకేతికతలో, సహకారంలో, దౌత్యంలో ఉంది. అణు పరీక్షలు మనిషి చరిత్రలో అత్యంత భయంకరమైన అధ్యాయాన్ని తిరిగి తెరపైకి తెస్తాయి.

ప్రపంచ సమాజం ఇప్పుడు కీలక మలుపులో ఉంది. దేశాలు మళ్లీ అణు నియంత్రణకు కట్టుబడతాయా, లేక భయంకర పోటీ దారిలోకి జారిపోతాయా అన్నది నిర్ణయాత్మకం. ఐక్యరాజ్య సమితి మరియు అమెరికా మిత్రదేశాలు ట్రంప్‌ను చర్చల బాటలోకి తేవాలి. నాయకత్వం అంటే పెద్ద శబ్దం చేయడం కాదు, పెద్ద మనసుతో శాంతిని కాపాడటం అని గుర్తు చేయాలి.

ట్రంప్ ఈ నిర్ణయం ద్వారా ప్రపంచాన్ని మరలా అణు నీడల్లోకి తోసే ప్రమాదం ఉంది. ఇది శక్తి ప్రదర్శన కాదు వివేకం కోల్పోవడం. మానవజాతి గత శతాబ్దంలో నేర్చుకున్న అత్యంత గొప్ప పాఠం restraint నియంత్రణ. నిజమైన బలం అదే. ఇప్పుడు ఆ జ్ఞానం మళ్లీ అవసరమైంది