అజర్బైజాన్లో భారత రాయబారిగా అభయ్ కుమార్ బాధ్యతల స్వీకరణ
అజర్బైజాన్లో భారత నూతన రాయబారిగా నియమితులైన అభయ్ కుమార్ మంగళవారం బాధ్యతలు స్వీకరించారు. ఆ దేశ రాజధాని బాకు చేరుకున్న ఆయనకు అక్కడి భారత రాయబార కార్యాలయ అధికారులు ఘనస్వాగతం పలికారు. ఈ విషయాన్ని భారత ఎంబసీ తన అధికారిక సామాజిక మాధ్యమ ఖాతా ద్వారా వెల్లడించింది. బాకు బయలుదేరే ముందు ఆయన భారత రాష్ట్రపతి ద్రౌపది ముర్మును కలిసి, తన నియామక ధ్రువీకరణ పత్రాలను అందుకున్నారు.
దౌత్య రంగంలో అపార అనుభవం
2003 బ్యాచ్కు చెందిన ఇండియన్ ఫారిన్ సర్వీస్ (ఐఎఫ్ఎస్) అధికారి అయిన అభయ్ కుమార్కు దౌత్యరంగంలో విశేష అనుభవం ఉంది. గతంలో ఆయన విదేశీ వ్యవహారాల మంత్రిత్వ శాఖలో జాయింట్ సెక్రటరీగా పనిచేశారు. 2019 నుంచి 2022 వరకు మడగాస్కర్, కొమొరోస్ దేశాలకు భారత మిషన్ అధిపతిగా వ్యవహరించారు. అలాగే బ్రెజిల్ (2016-2022), నేపాల్ (2012-2016), రష్యా (2005-2010) వంటి దేశాల్లో వివిధ కీలక బాధ్యతలు నిర్వహించారు. భారత దౌత్యరంగాన్ని డిజిటల్ బాట పట్టించడంలో ఆయన కీలక పాత్ర పోషించారు. గతేడాది భారత నేతృత్వంలో జరిగిన జీ-20 సదస్సు సమయంలో సుమారు 300 సాంస్కృతిక కార్యక్రమాలను సమన్వయం చేసిన ఘనత కూడా ఆయనకు ఉంది.
భారత్-అజర్బైజాన్ మధ్య బలమైన బంధం
భారత్, అజర్బైజాన్ దేశాల మధ్య సంబంధాలు కేవలం రాజకీయానికే పరిమితం కాకుండా, సాంస్కృతిక, చారిత్రక అనుబంధంతో ముడిపడి ఉన్నాయి. పరస్పర గౌరవం, సాంస్కృతిక సారూప్యతలే ఈ రెండు దేశాల స్నేహానికి పునాదులని భారత ఎంబసీ పేర్కొంది. గత డిసెంబర్ 30న అభయ్ కుమార్ను రాయబారిగా నియమిస్తూ కేంద్రం నిర్ణయం తీసుకుంది. ఆయన రాకతో ఇరు దేశాల మధ్య మైత్రి మరింత బలపడుతుందని నిపుణులు భావిస్తున్నారు.
పెరుగుతున్న పర్యాటకం.. విమాన సర్వీసులు
ఇటీవలి కాలంలో అజర్బైజాన్ను సందర్శించే భారతీయ పర్యాటకుల సంఖ్య గణనీయంగా పెరిగింది. 2023లో దాదాపు 1.17 లక్షల మంది భారతీయులు అక్కడికి వెళ్లగా, 2024 నాటికి ఆ సంఖ్య 2.43 లక్షలకు చేరింది. అంటే ఒక్క ఏడాదిలోనే 108 శాతం వృద్ధి నమోదైంది. రష్యా, టర్కీల తర్వాత అజర్బైజాన్కు అత్యధికంగా వెళ్లే పర్యాటకులు భారతీయులే కావడం విశేషం. ప్రస్తుతం ఢిల్లీ, ముంబై నగరాల నుంచి బాకుకు వారానికి 14 నేరుగా విమాన సర్వీసులు నడుస్తున్నాయి. ఇందులో 10 సర్వీసులు ఢిల్లీ నుంచి, 4 ముంబై నుంచి అందుబాటులో ఉన్నాయి.
ఇంధన రంగంలో భారీ పెట్టుబడులు
వ్యాపార రీత్యా కూడా అజర్బైజాన్ భారత్కు ఎంతో కీలకం. భారత ప్రభుత్వ రంగ సంస్థ అయిన 'ఓఎన్జీసీ విదేశ్ లిమిటెడ్' ఇక్కడ భారీ పెట్టుబడులు పెట్టింది. అజర్బైజాన్లోని చమురు, సహజ వాయువు క్షేత్రాలతో పాటు, 'బాకు-తిబిలిసి-సెహన్' పైపులైన్ ప్రాజెక్టులో భారత్ సుమారు 1.2 బిలియన్ డాలర్ల (దాదాపు రూ.10 వేల కోట్లు) కంటే ఎక్కువ పెట్టుబడులను పెట్టింది. ఇంధన భద్రత విషయంలో అజర్బైజాన్తో ఉన్న ఈ భాగస్వామ్యం భారత్కు ఎంతో ప్రయోజనకరంగా మారింది.