అగస్టా వెస్ట్లాండ్ కేసులో క్రిస్టియన్ మిచెల్ ను విడుదల చేయండి:కోర్టు
అగస్టావెస్ట్లాండ్ వీవీఐపీ హెలికాప్టర్ కొనుగోలు కుంభకోణానికి సంబంధించిన మనీలాండరింగ్ కేసులో కీలక నిందితుడైన క్రిస్టియన్ జేమ్స్ మిచెల్(యూకే దేశస్తుడు)ను జైలు నుంచి విడుదల చేయాలని ఢిల్లీ కోర్టు శనివారం ఆదేశించింది. అయితే ఇదే కేసుకు సంబంధించిన సీబీఐ అవినీతి కేసులో కూడా నిందితుడిగా ఉన్నందున, అతడు ఇప్పటికీ జైల్లోనే ఉంటున్నాడు. సీబీఐ ప్రత్యేక న్యాయమూర్తి సంజయ్ జిందాల్, ఎన్ఫోర్స్మెంట్ డైరెక్టరేట్ (ఈడీ) నమోదు చేసిన కేసులో మిచెల్ దాఖలు చేసిన కస్టడీ విడుదల పిటిషన్ను విచారిస్తూ ఈ ఆదేశాలు జారీ చేశారు. మిచెల్పై ప్రివెన్షన్ ఆఫ్ మనీలాండరింగ్ యాక్ట్ (పీఎంఎల్ఏ) కింద కేసు నమోదై ఉండగా, ఆ నేరానికి గరిష్ఠంగా ఏడేళ్ల జైలు శిక్ష విధించవచ్చని కోర్టు గుర్తించింది. అయితే మిచెల్ ఇప్పటికే ఏడేళ్లుగా కస్టడీలో ఉన్నాడని పేర్కొంది.
క్రిమినల్ ప్రొసీజర్ కోడ్ సెక్షన్ 436ఏ లోని రెండో ప్రావిజో ప్రకారం, విచారణ లేదా ట్రయల్ సమయంలో నిందితుడిని ఆ నేరానికి విధించదగిన గరిష్ఠ శిక్ష కాలానికి మించి జైలులో ఉంచరాదని న్యాయమూర్తి స్పష్టం చేశారు. అందువల్ల డిసెంబర్ 21, 2025 తర్వాత ఈడీ కేసులో మిచెల్ను కొనసాగిస్తూ నిర్బంధించలేమని కోర్టు తెలిపింది. ఇతర ఏ కేసులో అవసరం లేకపోతే, చట్ట ప్రకారం మిచెల్ను విడుదల చేయాలని కోర్టు ఆదేశాల్లో పేర్కొంది.
అయితే, అగస్టావెస్ట్లాండ్ వ్యవహారంలో సీబీఐ నమోదు చేసిన మరో అవినీతి కేసులో కూడా మిచెల్ నిందితుడిగా ఉన్నాడు. ఆ కేసులో ఆయన దాఖలు చేసిన విడుదల పిటిషన్పై కోర్టు ఈ ఉదయం విచారణ జరిపి, సీబీఐ స్పందన దాఖలు చేయాలని ఆదేశించింది. విచారణ సందర్భంగా, విడుదలైనప్పటికీ తాను ట్రయల్కు పూర్తిగా సహకరిస్తానని మిచెల్ రాతపూర్వకంగా కోర్టుకు హామీ ఇచ్చాడు. మిచెల్ తరఫు న్యాయవాది మాట్లాడుతూ, గత 12 ఏళ్లుగా ఈడీ, సీబీఐలు ఈ కేసును విచారిస్తున్నాయని, తన క్లయింట్ గత ఏడేళ్లుగా జైలులోనే ఉన్నాడని తెలిపారు. బెయిల్ మంజూరైనా జైలు నుంచి బయటకు రాలేకపోవడం న్యాయానికి అపహాస్యమని అన్నారు.
కోర్టు వెలుపల మీడియాతో మాట్లాడిన మిచెల్, విచారణను తాను “ఎంజాయ్ చేస్తున్నాను” అని చెప్పాడు. ఈ కేసును తదుపరి విచారణ కోసం డిసెంబర్ 22కి కోర్టు వాయిదా వేసింది. గమనించదగిన విషయం ఏమిటంటే, అగస్టావెస్ట్లాండ్ కేసు 12 వీవీఐపీ హెలికాప్టర్ల కొనుగోలుకు సంబంధించి బ్రిటిష్–ఇటాలియన్ సంస్థ నుంచి ఒప్పందం పొందేందుకు అప్పటి రక్షణ శాఖ అధికారులకు లంచాలు చెల్లించారనే ఆరోపణలపై కేంద్రీకృతమై ఉంది.