అక్టోబర్లో రష్యా నుండి 2.5 బిలియన్ యూరోల చమురును కొనుగోలు చేసిన భారత్
ప్రపంచంలో రష్యా శిలాజ ఇంధనాలను అత్యధికంగా కొనుగోలు చేస్తున్న దేశాల్లో రెండవ స్థానంలో ఉన్న భారత్, అక్టోబర్ నెలలో రష్యా నుంచి ముడి చమురు కోసం 2.5 బిలియన్ యూరోలు (సుమారు రూ.25,660 కోట్లు) ఖర్చు చేసింది. ఎనర్జీ, క్లీన్ ఎయిర్పై పరిశోధనా కేంద్రం (సీఆర్ఈఏ) నెలవారీ నివేదిక ఈ వివరాలను వెల్లడించింది. పశ్చిమ దేశాల నుంచి కొత్త ఆంక్షలు ఎదురవుతున్నప్పటికీ, రాయితీతో లభిస్తున్న రష్యా చమురుపై భారతదేశం ఆధారపడటం కొనసాగిస్తున్నట్లు ఈ మొత్తం స్పష్టం చేస్తోంది. సెప్టెంబర్ నెలతో పోలిస్తే కొనుగోలులో ఎటువంటి తగ్గుదల నమోదు కాలేదు.
దిగుమతుల్లో ముడి చమురుదే ఆధిపత్యం
సీఆర్ఈఏ నివేదిక ప్రకారం, అక్టోబర్లో రష్యా నుండి భారత్ దిగుమతి చేసుకున్న మొత్తం శిలాజ ఇంధనాల్లో ముడి చమురు వాటా 81 శాతంగా ఉంది. బొగ్గు వాటా 11 శాతం (సుమారు 351 మిలియన్ యూరోలు), చమురు ఉత్పత్తులు 7 శాతం (సుమారు 222 మిలియన్ యూరోలు)గా ఉన్నాయి. సెప్టెంబర్తో పోలిస్తే అక్టోబర్లో ముడి చమురు దిగుమతులు 11 శాతం పెరిగాయి. ఇది దేశీయంగా బలమైన డిమాండ్ను సూచిస్తుంది.
రష్యా చమురు కొనుగోళ్లలో ప్రైవేట్ రిఫైనరీలు ఆధిపత్యం చెలాయిస్తున్నప్పటికీ, ప్రభుత్వ రంగ రిఫైనరీలు కూడా నెలవారీ కొనుగోళ్లను దాదాపు రెట్టింపు చేశాయి. ముఖ్యంగా, గుజరాత్లోని రోస్నెఫ్ట్ యాజమాన్యంలో ఉన్న వడినార్ రిఫైనరీ తన ఉత్పత్తి సామర్థ్యాన్ని 90 శాతానికి పెంచింది. ఈ రిఫైనరీ సెప్టెంబర్తో పోలిస్తే అక్టోబర్లో 32 శాతం అదనంగా రష్యా ముడి చమురును దిగుమతి చేసుకుంది. ప్రస్తుతం ఈ రిఫైనరీ యూరోపియన్ యూనియన్, యూకే ఆంక్షల పరిధిలో ఉంది. అయినప్పటికీ ఇది జూలై నుంచి పూర్తిగా రష్యా సరఫరాలపైనే ఆధారపడుతోంది.
రష్యా చమురు ఎగుమతులు అక్టోబర్లో పెరగడం కఠినమైన ఆంక్షల మధ్య జరిగింది. ఉక్రెయిన్పై రష్యా యుద్ధానికి నిధులు సమకూర్చకుండా నిరోధించడానికి పశ్చిమ దేశాలు చేస్తున్న ప్రయత్నాలలో భాగంగా, అక్టోబర్ 22న అమెరికా రోస్నెఫ్ట్, లుకోయిల్ వంటి రష్యాలోని అతిపెద్ద చమురు ఉత్పత్తిదారులపై విస్తృత ఆంక్షలను విధించింది.
అమెరికా అధ్యక్షుడు డొనాల్డ్ ట్రంప్ రష్యా చమురు విషయంలో కఠిన వైఖరిని అవలంబిస్తున్నారు. ఆంక్షలలో భాగంగా రోస్నెఫ్ట్, లుకోయిల్లను అమెరికా ఆర్థిక వ్యవస్థ నుండి వేరు చేశారు. రష్యా ముడి చమురును కొనుగోలు చేయడం కొనసాగించే దేశాలపై 25–50 శాతం వరకు ద్వితీయ సుంకాలను విధిస్తానని ట్రంప్ బెదిరించారు. ఈ వ్యూహం మాస్కోపై ఆదాయ వనరులను నిలిపివేసి ఒత్తిడి పెంచడం లక్ష్యంగా పెట్టుకుందని, అయితే ఇది భారతదేశంపై దౌత్యపరమైన ఒత్తిడిలో భాగమని విశ్లేషకులు భావిస్తున్నారు.
ఈ ఒత్తిళ్లకు ప్రతిస్పందనగా, భారతదేశం డిసెంబర్ నెల కోసం రష్యా ముడి చమురు ఆర్డర్లను తగ్గించడం ప్రారంభించింది. అయితే, చమురు కొనుగోలు తమకు ఆర్థికంగా లాభదాయకంగా ఉన్నంత వరకు కొనసాగిస్తామని న్యూఢిల్లీ స్పష్టం చేస్తోంది. మరోవైపు, లుకోయిల్ అమెరికా మంజూరు చేసిన 'విండ్-డౌన్' లైసెన్స్ కింద తన అంతర్జాతీయ ఆస్తులలో కొన్నింటిని విక్రయించాలని యోచిస్తున్నట్లు ప్రకటించింది.