అందరి ప్రయోజనాల కోసం కాప్–31: ఆస్ట్రేలియా

ఐక్యరాజ్యసమితి వాతావరణ మార్పుల సదస్సు (కాప్–31) అన్ని దేశాల ప్రయోజనాలకు అనుగుణంగా పనిచేసేలా చూడడమే లక్ష్యమని ఆస్ట్రేలియా హై కమిషనర్ ఫిలిప్ గ్రీన్ తెలిపారు. పసిఫిక్ దేశాలకు మద్దతు ఇవ్వడమే కాకుండా భారత్ వంటి కీలక దేశాలతో సమన్వయం పెంచుతున్నామని ఆయన వెల్లడించారు. టర్కీలోని అంటాల్యాలో జరగనున్న కాప్–31లో ఆస్ట్రేలియా చర్చలకు అధ్యక్షుడిగా వ్యవహరించనుంది. ఈ నేపథ్యంలో ఫిజీ, టువాలూ వంటి పసిఫిక్ దేశాల్లో ప్రీ-కాప్ సమావేశాలు నిర్వహించి, తరువాత ప్రధాన సదస్సు జరపనున్నట్లు గ్రీన్ చెప్పారు. ఆస్ట్రేలియా వాతావరణ చర్యలకు కట్టుబడి ఉందని పేర్కొన్న ఆయన, 2030 నాటికి దేశ విద్యుత్ ఉత్పత్తిలో 80 శాతం పునరుత్పాదక శక్తి నుంచే పొందే లక్ష్యాన్ని పెట్టుకున్నామని చెప్పారు. అలాగే 2050 నాటికి నెట్-జీరో లక్ష్యాన్ని చేరుకోవాలని, 2035కి సంబంధించి కూడా ముందంజలో ఉన్న లక్ష్యాలు నిర్ధేశించామని వివరించారు. కాప్ అధ్యక్షత వహించే ఐక్యరాజ్యసమితి ప్రాంతీయ సమూహాల మధ్య మారుతూ వస్తుందని, ఈసారి టర్కీ అధ్యక్షత్వ బాధ్యతలు తీసుకుంటే, ఆస్ట్రేలియా చర్చల బాధ్యతలు చేపట్టే ప్రత్యేక ఒప్పందం కుదిరిందని తెలిపారు.

అయితే, ఆస్ట్రేలియా భారీ స్థాయిలో బొగ్గు, గ్యాస్ ఎగుమతులు చేసే దేశం కావడంతో విమర్శలు కూడా వ్యక్తమవుతున్నాయి. అలెక్స్ రఫలోవిచ్ మాట్లాడుతూ, వాతావరణ చర్చల్లో ఆస్ట్రేలియా నాయకత్వం విశ్వసనీయంగా ఉండాలంటే తమ ఫాసిల్ ఫ్యూయల్ ప్రాజెక్టుల ప్రభావాన్ని తగ్గించే చర్యలు తీసుకోవాలని సూచించారు. కాగా, ఇటీవల జరిగిన కాప్ సదస్సుల్లో కూడా ఫాసిల్ ఫ్యూయల్ ఎగుమతిదారుల ప్రభావం ఎక్కువగా కనిపించిందని ఆయన అభిప్రాయపడ్డారు. మొత్తంగా, ప్రపంచ వాతావరణ మార్పులపై కీలక నిర్ణయాలు తీసుకునే కాప్–31 సదస్సు ముందు, అభివృద్ధి చెందుతున్న దేశాల అవసరాలు, పర్యావరణ రక్షణ లక్ష్యాలు మధ్య సమతుల్యత సాధించడం ప్రధాన సవాలుగా మారింది.