అంగరంగ వైభవంగా అర్జున్ టెండూల్కర్-సానియా చందోక్ వివాహం

క్రికెట్ దిగ్గజం సచిన్ టెండూల్కర్ తనయుడు, యువ క్రికెటర్ అర్జున్ టెండూల్కర్ (26) ఓ ఇంటివాడయ్యాడు. గత కొంతకాలంగా తనతో స్నేహంలో ఉన్న ప్రముఖ యువ పారిశ్రామికవేత్త సానియా చందోక్ (27)ను ఆయన గురువారం వివాహం చేసుకున్నారు. దక్షిణ ముంబైలోని ఒక ప్రైవేట్ వేదికపై అత్యంత సన్నిహితులు, బంధుమిత్రుల సమక్షంలో వీరి వివాహ వేడుక అత్యంత వైభవంగా జరిగింది. దేశవాళీ క్రికెట్‌లో గోవా తరఫున ఆడుతూ, ఐపీఎల్‌లో ముంబై ఇండియన్స్, లక్నో సూపర్ జెయింట్స్ జట్లకు ప్రాతినిధ్యం వహించిన అర్జున్.. ఇప్పుడు జీవితంలో సరికొత్త ఇన్నింగ్స్ ప్రారంభించారు.

ఈ వివాహ వేడుకలు మార్చి 3 నుంచే అత్యంత కోలాహలంగా ప్రారంభమయ్యాయి. అంబానీ కుటుంబం ఆధ్వర్యంలో గుజరాత్‌లోని జామ్‌నగర్‌లో ఘనంగా నిర్వహించిన గణేష్ పూజతో వేడుకలకు అంకురార్పణ జరిగింది. అనంతరం ముంబైలో మెహందీ, సంగీత్ కార్యక్రమాలను కన్నుల పండువగా నిర్వహించారు. సానియా చందోక్ విషయానికి వస్తే.. ఆమె ఒక వ్యాపారవేత్త. భారత్‌లో బాస్కిన్ రాబిన్స్ సంస్థను నిర్వహిస్తున్న 'గ్రావిస్ గ్రూప్' కుటుంబానికి చెందిన సానియా.. 'మిస్టర్ పాస్' పేరుతో లగ్జరీ పెట్ స్పాను నడుపుతున్నారు.

తరలివచ్చిన దిగ్గజాలు

టెండూల్కర్ వారసుడి పెళ్లి కావడంతో క్రీడా, సినీ రంగాలకు చెందిన ప్రముఖులు పెద్ద ఎత్తున హాజరయ్యారు. క్రికెట్ దిగ్గజాలు ఎం.ఎస్. ధోనీ, రాహుల్ ద్రవిడ్‌లతో పాటు బాలీవుడ్ మెగాస్టార్ అమితాబ్ బచ్చన్, ఏపీ మంత్రి నారా లోకేష్ వంటి ప్రముఖులు విచ్చేసి నూతన వధూవరులను ఆశీర్వదించారు. వీరితో పాటు పలువురు ఐపీఎల్ సహచరులు, సినీ ప్రముఖులు ఈ వేడుకలో ప్రత్యేక ఆకర్షణగా నిలిచారు.

సోషల్ మీడియాలో నెటిజన్ల సందడి

ఈ వివాహానికి సంబంధించిన ఫోటోలు బయటకు రావడంతో సోషల్ మీడియాలో అభిమానులు శుభాకాంక్షలు తెలుపుతున్నారు. చాలా కాలంగా స్నేహంగా ఉన్న ఈ జంట ఇప్పుడు ఒక్కటవ్వడంపై నెటిజన్లు హర్షం వ్యక్తం చేస్తున్నారు. ముఖ్యంగా అర్జున్ టెండూల్కర్ పెళ్లిలోనూ ఎంతో గంభీరంగా ఉండటంపై కొందరు అభిమానులు సరదాగా వ్యాఖ్యలు చేస్తుండగా, మరికొందరు వారి చిరకాల బంధాన్ని అభినందిస్తూ పోస్టులు పెడుతున్నారు.